ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᒥᕝᕕᐅᑉ ᐱᓀᓗᑕᖏᑦ

ᐱᒻᒪᕆᑦᑐᒥᒃ ᓄᑕᐅᓯᓕᑎᕆᓃᑦ

1984 ᐊᒻᒪᓗ 1991 ᐊᑯᓐᓂᖓᓂ, ᒥᕝᕖᑦ ᓴᓇᔭᐅᓚᐅᕐᓯᒪᔪᑦ ᑕᕐᕋᒥ ᓄᓇᓕᓐᓂ ᐃᓘᓐᓇᖏᓐᓂ ᑰᔾᔪᐊᕌᐱᒃ ᑰᔾᔪᐊᓗ ᐃᓚᐅᖕᖏᑐᑑᑎᓪᓗᒋᒃ ᑖᒃᑯᓇᓂ ᒥᕝᕕᖃᕇᓚᐅᕐᓯᒪᒻᒪᑕ. ᑌᑦᓱᒪᓂ ᐊᒻᒪᓗ ᓱᓕ ᐅᓪᓗᒥ, ᐃᓚᒋᓕᐅᑎᑦᓱᑎᒃ ᐊᓂᕐᕋᓄᑦ, ᐃᓕᓐᓂᐊᕕᓐᓄᑦ ᐊᒻᒪᓗ ᐃᓗᓯᓕᕆᕕᓐᓄᑦ ᓴᓇᔭᐅᓚᐅᕐᓯᒪᒻᒥᔪᓄᑦ ᑌᒃᑯᓇᓂᑦᓭᓇᖅ ᐊᕐᕌᒍᓂ, ᑖᒃᑯᐊ ᒥᕝᕖᑦ ᓱᕙᓪᓕᓇᕐᓂᐸᐅᓯᒪᕗᑦ ᐃᓅᓯᐅᑉ ᖃᓄᐃᓐᓂᖓᓄᑦ ᓄᓇᓕᓕᒫᓂ. ᐱᕈᕐᐸᓕᐊᔪᖅ ᓄᓇᓕᓕᒫᑦ ᑭᖕᖒᒪᑦᓯᓂᖓᑦ ᓂᐳᕐᓯᒪᑎᓚᖓᓗᒍ (ᐃᓄᐃᑦ ᐊᒥᓱᖕᖑᐸᓪᓕᐊᔪᑦ, ᐃᓗᓯᓕᕆᓂᖅ, ᓂᐅᕐᕈᑐᓕᕆᓂᖅ, ᐅᔭᕋᓐᓂᐊᓂᖅ ᐊᒻᒪᓗ ᖃᑭᓴᕐᑏᑦ ᐱᕙᓪᓕᐊᓂᖓᑦ), ᐱᒻᒪᕆᐅᑎᓂᒃ ᓄᑕᐅᓯᓕᑎᕈᑎᓂᒃ ᐊᑐᕐᓗᓂ ᑭᓯᐊᓂᐅᓕᕐᑐᖅ. ᐱᒻᒪᕆᐅᑎᓂᒃ ᓄᑕᐅᓯᓕᑎᕈᑎᓂᒃ ᐊᑐᕐᓗᓂ ᑭᓯᐊᓂᐅᓕᕐᑐᖅ. ᑕᒪᓐᓇ ᐱᑦᔪᑎᒋᑦᓱᒍ, ᓄᑕᐅᓯᓕᑎᕐᓯᒪᔪᑦ ᐸᕐᓇᓯᒪᐅᑏᑦ ᒥᕝᕖᑦ ᐱᐅᓯᒋᐊᕈᑎᑦᓴᖏᓐᓂᒃ ᒪᑭᑕᐅᓚᐅᔪᔪᑦ ᐃᖏᕐᕋᒍᑎᓕᕆᓂᕐᒧᑦ ᑐᕐᖃᑕᕐᕕᑯᓐᓄᑦ (MTQ) ᐊᒻᒪᓗ KRG-ᑯᓄᑦ 2012-ᒥ ᐊᑐᕐᓂᐊᑎᓪᓗᒋᑦ ᑎᑭᓪᓗᒍ 2017-ᒧᑦ.

ᐃᓕᒪᓇᕐᑐᓂᒃ ᕿᓂᕐᓂᖅ ᐳᕕᕐᓂᑐᒥ

ᐱᒻᒪᕆᓐᓂᒃ ᐱᐅᓯᒋᐊᕈᑎᓂᒃ ᐳᕕᕐᓂᑐᒥ ᓴᓇᓯᒪᓕᕐᑎᓗᒋᑦ ᑖᑦᓱᒪ ᓄᓇᓕᐅᑉ ᒥᕝᕕᖓ ᐊᑐᕐᑐᒪᕆᐅᓕᕐᑐᖅ ᑲᓱᕐᑕᕕᐅᓂᕐᒥᒍᑦ ᐊᐅᓚᔪᓄᑦ ᓄᓇᕕᐅᑉ ᓄᓇᓕᖏᑎᒍᑦ ᑕᓯᐅᔭᕐᔪᐊᒥ. ᑌᒣᒐᓗᐊᕐᑎᓗᒍ, ᐃᓕᒪᓇᕐᑐᓂᒃ ᕿᓂᕐᓂᑯᑦ ᐱᑦᔪᔨᒍᑎᖃᑦᔭᖏᒻᒪᑦ, ᐃᑭᒪᔪᑦ ᖃᖓᑦᑕᔫᓂ ᐳᕕᕐᓂᑐᒥᒃ ᐊᐅᓪᓚᑐᓂ ᒪᓐᑐᔨᐊᓕᐊᕐᓱᑎᒃ ᐊᕐᖁᓵᕆᐊᖃᓲᖑᕗᑦ ᐃᓕᒪᓇᕐᑐᓂᒃ ᕿᓂᕐᑏᑦ ᐱᑦᔪᔨᐅᑎᖏᑎᒍᑦ ᑰᔾᔪᐊᕌᐱᐅᑉ ᐅᕝᕙᓘᓐᓃᑦ ᑰᓐᓂᐊᑎᒃᑯᑦ ᒥᕝᕕᖏᓐᓂ. ᑕᒪᑐᒪ ᐱᐅᓯᐅᓂᖓ ᐊᑭᑦᑐᕆᐊᕐᑎᓯᕗᖅ ᖃᖓᑦᑕᔫᑦ ᑎᒥᖏᑦᑕ ᐃᖏᕐᕋᓂᕐᒥᓄᑦ ᑮᓇᐅᔭᕐᑐᓂᖓᓂᒃ ᐊᒻᒪᓗ ᐃᓱᐊᖕᖏᑐᒻᒪᕆᐅᕗᖅ ᐃᑭᒪᔪᓄᑦ ᐃᓘᓐᓀᓄᑦ ᑕᒪᒃᑯᐊ ᓂᐅᖃᑦᑕᕆᐊᖃᕐᒪᑕ ᐊᕐᖁᑎᑐᐃᓐᓇᒥᓂ ᐊᓂᒍᕐᓗᑎᓪᓗ ᐃᓕᒪᓇᕐᑐᓂᒃ ᕿᓂᕐᑎᑎᒍᑦ ᖃᖓᑦᑕᔫᒥᓄᑦ ᐃᑭᒋᐊᓪᓚᖏᓐᓂᒥᓂ.

2012-ᒥ, KRG-ᑯᑦ ᐊᑐᓕᕐᑎᓯᓚᐅᔪᔪᑦ ᑐᑭᑖᕈᑎᒥᒃ ᑐᑦᓯᕋᕐᑐᒥᒃ ᑳᓇᑕᒥᐅᑦ ᖃᖓᑦᑕᔫᒃᑯᑦ ᐅᓯᔨᓂᒃ ᓴᑑᒪᓇᕐᑎᓯᓂᕐᒧᑦ ᐊᖓᔪᕐᖄᖏᑦ (CATSA) ᐋᕐᕿᑎᑦᓯᖁᑦᓱᒋᑦ ᐃᓕᒪᓇᕐᑐᓂᒃ ᕿᓂᕐᓂᑯᑦ ᐱᑦᔪᔨᒍᑎᓂᒃ ᓄᑖᒥ ᖃᖓᑦᑕᔫᕐᓂᐊᕕᐅᑉ ᐃᓪᓗᖓᓂ ᐳᕕᕐᓂᑐᒥ. ᑎᒥᐅᔪᑦ ᐊᓯᖏᑦ, ᐆᑦᑑᑎᒋᓗᒋᑦ ᒪᑭᕝᕕᒃ ᐊᒻᒪᓗ ᓄᓇᕕᒻᒥ ᓄᓇᓕᓕᒫᑦ ᑲᑎᒪᔨᖏᑦ ᐃᓗᓯᓕᕆᓂᕐᒧᑦ ᐊᒻᒪᓗ ᐃᓄᓕᕆᓂᒃᑯᑦ ᐱᑦᔪᔨᒍᑎᓄᑦ, ᖃᓄᐃᓕᓯᒪᒻᒥᔪᑦ CATSA-ᑯᓐᓄᑦ ᑕᒪᑐᒥᖓ ᐅᖃᐅᓯᑦᓴᒥᒃ ᐱᑦᔪᑎᖃᕐᒥᓱᑎᒃ.

ᒥᕝᕕᐅᑉ ᐊᑦᑕᓀᓐᓂᖓ

ᐊᕐᕌᒍᓂ ᖃᒻᒥᖅ ᐊᓂᒍᕐᓯᒪᔪᓂ, ᓄᑖᓂᒃ ᑲᒪᒍᑎᒋᒋᐊᓕᓐᓂᒃ ᓅᑕᐅᔪᖃᕐᓯᒪᔪᖅ ᒥᕝᕕᓂᒃ ᐊᐅᓚᑦᓯᔨᓄᑦ, ᐆᑦᑑᑎᒋᓗᒋᑦ ᒥᕝᕕᒥ ᐊᑦᑕᓀᓐᓂᒥᒃ ᐊᐅᓚᑦᓯᒍᑏᑦ, ᒥᕝᕕᐅᑉ ᐊᑦᑕᓇᖕᖏᓂᖓᓂᒃ ᐸᕐᓇᓯᒪᐅᑏᑦ ᐊᒻᒪᓗ ᐊᕙᑎᒨᓕᖓᔪᑦ ᐊᐅᓚᑕᐅᓂᖓᓂᒃ ᐸᕐᓇᓯᒪᐅᑏᑦ.
ᐊᑦᑕᓀᓐᓂᒥᒃ ᐊᐅᓚᑦᓯᒍᑏᑦ ᐊᑐᓂ ᒥᕝᕕᒥ ᖃᓗᓯᓲᖑᕗᑦ ᖃᐅᑕᒫᑦ ᕿᒥᕐᕈᖃᑦᑕᓂᕐᒥᒃ, ᓱᒐᓚᑦᑐᖃᕐᐸᑦ ᑐᓴᕐᑎᓯᓂᕐᒥᒃ ᐊᒻᒪᓗ ᐃᒻᒥᓂᒃ-ᐱᑦᓯᐊᒪᖔᕐᒥ ᑲᒪᖃᑦᑕᓂᕐᒥᒃ.

ᒪᓕᓪᓗᓂ ᑳᓇᑕᒥ ᖃᖓᑦᑕᔫᑦ ᒪᓕᒐᖏᓐᓂᒃ, ᐊᖐᒡᒋᓚᕆᑦᑐᓂᒃ ᐅᐃᒪᓇᕐᑐᓯᐅᕐᓂᒥᒃ ᐃᙯᓕᓴᐅᑎᓂᒃ ᐊᑐᖃᑦᑕᕆᐊᖃᕐᖁᑦ ᒥᕝᕕᓂ ᐊᕐᕌᒍᐃᑦ ᓯᑕᒪᑦ ᑕᒫᑦ ᐊᒻᒪᓗ ᓵᑉ-ᖄᖓᓂ ᐃᙯᓕᓴᕐᓂᖃᕆᐊᖃᕐᒥᓱᑎᒃ ᐊᕐᕌᒍᑕᒫᑦ. ᑖᓐᓇ ᐱᑦᔪᔨᕕᒃ ᐋᕐᕿᓱᐃᔨᐅᕗᖅ ᑕᒪᒃᑯᓂᖓ ᐃᙯᓕᓴᐅᑎᓂᒃ ᓄᓇᓖᑦ ᒥᕝᕕᖏᓐᓂ ᐃᑲᔪᕐᑕᐅᒍᑎᒋᑦᓱᒋᑦ KRG-ᑯᑦ ᐃᓄᓕᒫᑦ ᓴᑑᒪᓂᖓᓂᒃ ᐱᑦᔪᔨᕕᖓᓄᑦ, ᑳᓇᑕᒥᐅᑦ ᐅᓇᑕᕐᑐᓴᖁᑎᖏᓐᓄᑦ, ᑲᕙᒫᐱᓐᓂ ᐃᑯᐊᓪᓚᑐᐊᕐᓂᐊᑎᓄᑦ ᐊᒻᒪᓗ ᐋᓐᓂᐊᕕᐊᐱᓐᓄᑦ (CLSCs). ᑕᒪᓐᓇ ᑐᕌᒐᓕᒃ ᐆᑦᑐᕋᕐᓂᒥᒃ ᐊᒻᒪᓗ ᐱᐅᓯᒋᐊᕆᓂᕐᒥᒃ ᓄᓇᓖᑦ ᐅᐃᒪᓇᕐᑐᓄᑦ ᓂᒫᓪᓚᑐᑦᓴᖁᑎᖏᑦᑕ ᐊᑐᐃᓐᓇᐅᓂᖓᓂᒃ.