ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑕᕆᐅᒥ ᓇᑉᐸᑕᐅᒪᔪᑦ

ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᐅᑉ ᐊᑖᒍᑦ, ᑲᕙᒪᒃᑯᑦ ᑳᓇᑕᒥ ᐊᒻᒪᓗ ᑯᐯᒻᒥ ᐊᑦᓱᖏᕈᑎᖃᓚᐅᕐᓯᒪᔪᑦ ᐱᐅᓯᒋᐊᕐᑎᓯᓛᕐᓂᒥᒃ ᑕᕆᐅᒥ ᓇᑉᐸᑎᕐᓯᒪᔪᓂᒃ ᓄᓇᕕᐅᑉ ᐃᓗᐊᓂ. ᒪᓕᑦᓱᒍ ᐃᓚᖓ 4.2-ᒥ ᐱᖃᑎᒌᒍᑎᖃᕐᓂᒧᑦ ᐊᖏᖃᑎᒌᒍᑎᒥ ᐱᑦᔪᑎᓕᒻᒥ ᒪᑭᑕᐅᑎᓂᒃ ᐊᒻᒪᓗ ᓄᓇᓕᓐᓂᒃ ᐱᕙᓪᓕᐊᑎᑦᓯᓂᕐᒥᒃ ᓄᓇᕕᐅᑉ ᐃᓗᐊᓂ (ᓴᓇᕐᕈᑎᒃ ᐊᖏᖃᑎᒌᓐᓂᖅ), ᑯᐯᒃᑯᑦ ᑲᕙᒪᖓ ᐅᖃᕐᓯᒪᔪᖅ ᐊᑭᓖᓚᖓᑦᓱᓂ 50%-ᖏᓐᓂᒃ ᓴᓇᑎᑦᓯᓂᐅᑉ ᑮᓇᐅᔭᕐᑑᑎᖏᓐᓄᑦ ᐃᓕᖓᔪᓄᑦ ᑕᒪᒃᑯᓄᖓ ᑕᕆᐅᒥ ᓇᑉᐸᑎᕐᓯᒪᔪᓄᑦ ᐊᒻᒪᓗ ᑮᓇᐅᔭᖃᕐᑎᓯᓂᐊᕐᓱᓂ ᖃᐅᑕᒫᕐᓯᐅᑎᑎᒍᑦ ᒪᑭᑕᑦᓯᐅᑏᑦ ᑮᓇᐅᔭᕐᑑᑎᖏᓂᒃ, ᖃᓗᓯᑎᓪᓗᒋᑦ ᐱᒻᒪᕆᓪᓗᒋᑦ ᓴᓇᒋᐊᓪᓚᑖᒍᑎᓂᒃ, ᑕᒪᓐᓇ ᓱᓕᓚᖓᑎᓪᓗᒍ ᑲᕙᒪᑐᖃᒃᑯᑦ ᐃᓕᔨᖃᑕᐅᒍᑎᒥᓂᒃ ᐊᑭᓖᑉᐸᑕ. 1999 ᐊᒻᒪᓗ 2011 ᐊᑯᓐᓂᖓᓂ, KRG-ᑯᑦ ᑐᑭᒧᐊᑦᑎᓯᖃᑦᑕᓚᐅᔪᔪᑦ ᓴᓇᑎᑦᓯᒍᑎᓂᒃ ᐊᑐᓂ ᓄᓇᓕᓐᓂ ᑕᒪᒃᑯᐊᓕᒫᑦ ᐊᑭᖃᕐᑎᓗᒋᑦ $91.5 ᒥᓕᐊᓐ ᑖᓚᓂᒃ. ᒪᑭᕝᕕᐅᑉ ᓴᓇᔨᖏᑦ ᑲᒪᔪᑦᓴᓕᐊᖑᓚᐅᔪᔪᑦ ᑕᒪᒃᑯᐊ ᐱᓇᓱᐊᑦᓭᑦ ᑲᔪᓯᑎᑕᐅᓂᖓᓂᒃ. ᑕᕆᐅᒥ ᓇᑉᐸᑕᐅᒪᔪᑦ ᐃᑉᐱᓇᕐᑐᓂᒃ ᐱᕙᓪᓕᓇᕐᑐᖃᕐᓯᒪᕗᑦ ᓄᓇᓕᓐᓄᑦ, ᐃᓚᖃᕐᑎᓗᒋᑦ ᐱᐅᓯᐅᒥᔪᒥᒃ ᐊᑦᑕᓇᕋᓂ ᐃᒫᓅᕈᓐᓇᓂᕐᒥᒃ ᓄᓇᕕᒻᒥᐅᑦ ᐃᓄᐃᑦ ᐊᖑᓇᓱᑦᑎᖏᓐᓄᑦ ᐊᒻᒪᓗ ᓱᑲᓐᓂᓴᒥᒃ ᐅᒥᐊᕐᔪᐊᑦ ᓂᐅᕃᒍᓐᓇᓯᓂᖓᓂᒃ.

2009-ᒥᓂᒃ, ᑖᓐᓇ ᐱᑦᔪᔨᕕᒃ ᑲᒪᔨᐅᓕᕐᑐᖅ ᐸᕐᓇᓯᒪᓂᕐᒥᒃ ᐊᒻᒪᓗ ᑐᑭᒧᐊᑦᑎᓯᓂᕐᒥᒃ ᐊᑐᖏᓐᓇᖃᑦᑕᕆᐊᓕᓐᓂᒃ ᒪᑭᑕᑦᓯᒍᑎᓂᒃ ᓄᓇᓖᑦ ᑕᕆᐅᒥ ᓇᑉᐸᑕᐅᒪᔪᖁᑎᖏᓐᓂᒃ ᑮᓇᐅᔦᑦ ᒪᓂᔭᐅᔪᑦ ᒪᓕᓪᓗᒋᑦ. ᑕᒡᒍᖓ ᑎᑭᑦᓱᒍ, ᑯᐯᒃᑯᑦ ᑲᕙᒪᖓ ᓄᐃᑦᓯᓯᒪᔪᖅ ᑮᓇᐅᔭᓂᒃ ᒪᑭᑕᑦᓯᓂᕐᒨᓕᖓᔪᓂᒃ, ᑲᕙᒪᑐᖃᒃᑯᑦ ᐃᓕᔨᓚᐅᕐᓯᒪᑎᓐᓇᒋᑦ ᓱᓕ. ᓱᓕᐅᒻᒥᔪᖅ, ᒪᓕᑦᓱᓂ ᓯᕗᓪᓕᐅᔨᓗᒍ ᐊᐅᓚᑦᔭᕈᑎᑦᓴᒥᒃ ᑯᐯᒃᑯᑦ ᑲᕙᒪᖓᑕ ᑕᕐᕋᒧᑦ ᐸᕐᓇᓯᒪᐅᑎᖓᓂ 2035-ᒧᑦ ᑎᑭᓪᓗᒍ, ᓱᕐᖁᐃᕈᒪᒧᑦ ᐊᑯᓂᐅᔪᕐᑎᒍᑦ ᑕᕆᐅᒥ ᓇᑉᐸᑕᐅᒪᔪᑦ ᐊᑐᕈᓐᓇᓚᖓᓂᖓᓂᒃ ᐃᓘᓐᓈᒍᑦ ᑐᑭᒧᐊᑎᑦᓯᔨᒻᒪᕆᒃ ᐅᖃᖃᑎᒌᓐᓂᒥᒃ ᐱᒋᐊᕐᑎᓯᓚᐅᔪᒻᒥᔪᖅ ᑕᕐᕋᒧᑦ ᐸᕐᓇᓯᒪᐅᑎᐅᑉ ᑎᒥᖓ ᐃᓚᒋᑦᓱᒍ ᐱᒐᓱᐊᕐᓱᓂ ᑮᓇᐅᔭᒋᐊᓪᓚᓂᒃ ᑐᕌᕐᑐᓂᒃ ᑕᕆᐅᒥ ᓇᑉᐸᓯᒪᔪᓂᒃ ᒪᑭᑕᑦᓯᓂᕐᒧᑦ ᐊᕐᖁᑎᖃᕐᓂᐊᒥᑎᓪᓗᒋᑦ ᓄᑖᒥᒃ ᐊᑯᓂᕆᔪᒥᒃ ᐊᖏᖃᑎᒌᓐᓂᒥᒃ.