ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᐅᒪᔭᐅᒋᐊᓕᓕᒫᑦ

KRG-ᑯᑦ ᐊᒻᒪᓗ ᑕᕐᕋᒥ ᓄᓇᓖᑦ ᐊᐅᓚᑦᓯᔨᐅᕕᖃᕐᖁᑦ ᐊᑦᑐᐊᔪᓂᒃ ᓄᓇᒃᑯᑦ, ᕿᓚᒃᑯᑦ ᐊᒻᒪᓗ ᐃᒪᒃᑯᑦ ᐃᖏᕐᕋᒍᑎᓄᑦ, ᒪᓕᑦᓱᒍ ᐱᖁᔭᖅ ᐱᑦᔪᑎᓕᒃ ᑕᕐᕋᒥ ᓄᓇᓕᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ. ᐃᖏᕐᕋᒍᑎᓕᕆᓂᕐᒥᒃ ᐱᑦᔪᔨᕕᒃ ᑌᒣᒻᒪᑦ ᐊᑐᖃᓲᖑᕗᑦ ᐊᑦᔨᒌᖕᖏᑐᓂ ᓄᓇᓕᓕᒫᑎᒍᑦ ᓄᓇᓕᑦᑎᒍᓪᓗ ᐃᖏᕐᕋᒍᑎᓅᓕᖓᔪᓂᒃ ᑲᒪᒍᑎᓂ, ᐃᓚᖃᕐᑎᓗᒋᑦ ᒥᕝᕕᓂᒃ ᐊᐅᓚᑦᓯᓂᕐᒥᒃ, ᐃᖏᕐᕋᑎᑦᓯᓂᕐᒥᒃ ᐊᒻᒪᓗ ᒪᑭᑕᑦᓯᓂᕐᒥᒃ, ᑕᕆᐅᒥ ᓇᑉᐸᑕᐅᒪᔪᓂᒃ ᒪᑭᑕᑦᓯᓂᕐᒥᒃ, ᐊᒻᒪᓗ ᐅᓯᔨᒃᑯᓂᒃ ᐋᓐᓂᐊᔪᓂᒃ-ᐅᓯᓂᒃᑯᑦ ᐊᒻᒪᓗ ᐃᓄᓐᓂᒃ-ᐅᓯᓂᒃᑯᑦ ᐱᑦᔪᔨᐅᑎᓂᒃ, ᐊᒻᒪᓗ ᐊᕐᖁᑎᐅᑉ ᓯᓚᑖᒍᑦ ᐃᖏᕐᕋᔫᑦ ᐊᑐᕐᑕᐅᓂᖓᓂᒃ ᐊᒻᒪᓗ ᑕᒪᒃᑯᓄᖓ ᐊᑦᑕᓇᕐᓯᑌᓕᓂᕐᒥᒃ.

KRG-ᑯᑦ ᑮᓇᐅᔭᕐᑖᓲᖑᕗᑦ ᐃᖏᕐᕋᒍᑎᓕᕆᔨᒃᑯᓂᒃ ᑳᓇᑕᒥ ᐊᒻᒪᓗ ᐃᑎᕐᑕᐅᔪᓂᒃ ᒥᑦᑐᑦ ᐊᒻᒪᓗ ᖃᖓᑦᑕᔫᕐᓂᐅᕕᐅᑉ ᐃᓪᓗᖓᓂᒃ ᐊᑐᕐᑐᑦ ᐊᑭᓕᐅᑎᖏᓐᓄᑦ ᑰᔾᔪᐊᑉ ᒥᕝᕕᖓ ᐱᑦᔪᑎᒋᑦᓱᒍ. ᐊᓯᖏᓐᓄᑦ ᓄᓇᓕᓕᒫᑦ ᒥᕝᕕᖏᓐᓄᑦ, ᑮᓇᐅᔭᕐᑖᓲᑦ ᐊᖏᖃᑎᒌᓐᓂᐅᑉ ᐱᑦᔪᑎᓕᐅᑉ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᖅ). ᑮᓇᐅᔦᑦ ᑐᕌᕐᑐᑦ ᐊᓯᐊᒍᑦ ᐱᑦᔪᔨᕕᐅᑉ ᐱᓇᓱᓐᓂᖏᓐᓄᑦ ᐱᓲᖑᒻᒥᔪᑦ ᐊᑦᔨᒌᑦᑎᖏᑦᑐᓂᒃ ᐊᓯᐊᒍᑦ ᑮᓇᐅᔭᕐᑖᕕᓐᓂᒃ.