ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᒥᕝᕖᑦ

ᑰᔾᔪᐊᑉ ᒥᕝᕕᖓ ᐱᒻᒪᕆᐅᕗᖅ ᑲᑕᐅᒋᔭᐅᓂᕐᒥᒍᑦ ᓄᓇᓕᓐᓄᑦ, ᓄᐃᑕᑦᓯᓱᓂ ᐊᑐᓪᓗᑐᑦᓯᐊᑐᒥᒃ ᑲᓱᕐᑕᕕᒻᒥᒃ ᐅᐃᒪᓇᕐᑎᓗᒍ ᐊᐅᓚᐅᔨᒍᑎᓄᑦ, ᐃᓄᓐᓄᑦ ᓇᒻᒥᓂᖅ ᐊᒻᒪᓗ ᐱᓇᓱᑦᓱᑎᒃ ᐊᐅᓚᔪᓄᑦ, ᐊᒻᒪᓗ ᐅᓯᓂᕐᒧᑦ ᓂᕿᒐᓚᓐᓂᒃ ᐊᒻᒪᓗ ᓂᐅᕕᑦᓴᓂᒃ. ᑰᔾᔪᐊᖅ ᐊᑐᓲᖑᒻᒥᔪᖅ ᒥᕝᕕᖓ ᓴᖑᕕᑦᓴᐅᑎᓪᓗᒍ ᓄᓇᕗᑦᓕᐊᕐᑐᓄᑦ ᖃᖓᑦᑕᔫᓄᑦ ᓯᓚ ᐱᐅᒍᓐᓀᓴᕐᓂᐊᐸᑦ. ᑖᓐᓇ ᐱᑦᔪᔨᕕᒃ ᑲᒪᔨᐅᓕᕐᑐᖅ ᐊᐅᓚᑦᓯᓂᕐᒥᒃ, ᐃᖏᕐᕋᑎᑦᓯᓂᕐᒥᒃ ᐊᒻᒪᓗ ᒪᑭᑕᑦᓯᓂᕐᒥᒃ ᑰᔾᔪᐊᑉ ᒥᕝᕕᖓᓂᒃ ᒪᓕᒍᑎᒋᑦᓱᒍ ᐃᓘᓐᓀᓂᒃ ᑲᕙᒪᑐᖃᒃᑯᑦ ᑯᐯᒃᑯᓗ ᐱᖁᔭᖏᓐᓂᒃ ᐊᒻᒪᓗ ᒪᓕᒐᖏᓐᓂᒃ.

 

ᑖᓐᓇ ᐱᑦᔪᔨᕕᒃ ᐊᐅᓚᑦᓯᓲᖑᒥᕗᖅ, ᐃᖏᕐᕋᑎᑦᓯᕗᖅ ᐊᒻᒪᓗ ᒪᑭᑕᑦᓯᕗᖅ ᒥᕝᕕᓂᒃ 13-ᓂ ᐊᓯᖏᓐᓂ ᓄᓇᓕᓐᓂ ᑕᒫᓂ ᓄᓇᒥ. ᑕᒪᒃᑯᑎᒎᓇ ᑲᒪᔨᐅᓂᖅ ᐊᒻᒪᓗ ᐊᐅᓚᑦᓯᔨᐅᓂᖅ ᓄᓇᓖᑦ ᒥᕝᕕᖏᑦᑕ ᓈᓚᕝᕕᖏᓐᓂᒃ ᐱᕕᖃᕐᑎᑕᐅᔪᖅ ᑎᓕᔨᒍᑏᑦ B.2 ᐊᒻᒪᓗ B.3 ᐊᑖᒍᑦ ᐊᖏᖃᑎᒌᓐᓂᐅᑉ ᐱᑦᔪᑎᓕᐅᑉ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂ). ᒥᕝᕖᑦ 13 ᐱᒋᔭᐅᔪᑦ ᑯᐯᒃᑯᑦ ᑲᕙᒪᖓᓄᑦ ᐊᐅᓚᑕᐅᑦᓱᑎᓪᓗ ᒪᓕᑦᑎᓱᒋᑦ ᐊᑐᕆᐊᓕᓕᒫᓂᒃ ᑲᕙᒪᑐᖃᒃᑯᑦ ᑯᐯᒃᑯᓗ ᐱᖁᔭᖏᓐᓂᒃ ᐊᒻᒪᓗ ᒪᓕᒐᖏᓐᓂᒃ.

 

ᖃᓄᑐᐃᓐᓇᖅ ᑎᒻᒥᔫᕐᓂᐊᕕᒻᒧᑦ ᖃᐅᔨᒐᓱᐊᕐᑐᑦ, ᓯᕙᓂᕐᓗᒍ 819-964-2961, ᐱᑐᑦᓯᒪᐅᑎᖓ 2300, 9 ᐅᓪᓛᑯᑦ ᐊᒻᒪᓗ 5 ᐅᓐᓄᓴᒃᑯᑦ ᐊᑯᓐᓂᖓᓂ.

 

ᐅᐃᒪᓇᕐᑐᖃᕐᐸᑦ ᐅᒃᑯᐊᓯᒪᓕᕐᑐᓗᒍ, ᓯᕙᓂᕐᓗᒍ 819-964-3434, ᖃᐅᔨᓵᕆᐅᑎᖓᑕ ᑭᑎᑦᔪᑎᖓ 154.