ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᒥᕐᖑᐃᓯᕐᕕᓂᒃ ᐱᕙᓪᓕᐊᓂᖅ ᐊᒻᒪᓗ ᐃᖏᕐᕋᑎᑦᓯᓂᖅ

2002-ᒥ, KRG-ᑯᑦ, ᒪᑭᕝᕕᒃ ᐊᒻᒪᓗ ᑯᐯᒃᑯᑦ ᑲᕙᒪᖓᑦ ᐊᑎᓕᐅᕐᕕᖃᓚᐅᔪᔪᑦ ᐱᖃᑎᒌᒍᑎᓄᑦ ᐊᖏᖃᑎᒌᒍᑎᒥᒃ ᐱᑦᔪᑎᓕᒻᒥᒃ ᒪᑭᑕᐅᑎᓂᒃ ᐊᒻᒪᓗ ᓄᓇᓕᓐᓂᒃ ᐱᕙᓪᓕᐊᑎᑦᓯᓂᕐᒥᒃ ᓄᓇᕕᐅᑉ ᐃᓗᐊᓂ (ᓴᓇᕐᕈᑎᒃ ᐊᖏᖃᑎᒌᓐᓂᖅ). ᑖᑦᓱᒪ ᐊᖏᖃᑎᒌᒍᑎᐅᑉ ᑐᕌᕐᑕᖏᑕ ᐃᓚᖓᑦ ᐃᓕᖓᔪᖅ ᐃᑲᔪᕐᓯᒪᓂᕐᒧᑦ ᓂᐅᕐᕈᑐᓕᕆᓂᐅᑉ ᐱᓇᓱᐊᒐᖓᑕ ᐱᕙᓪᓕᐊᑎᑕᐅᓂᖓᓂᒃ ᐊᕐᖁᑎᖃᕐᑎᓗᒍ ᓄᓇᕐᔪᐊᑉ ᒥᕐᖑᐃᓯᕐᕕᖏᓐᓂᒃ ᐱᖕᖑᑎᑦᓯᓂᕐᒥᒃ. ᐃᒻᒥᒍᓪᓕᑕᐅᖅ, ᐊᕐᖁᑎᖃᕐᓱᑎᒃ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᖅ) ᐊᑐᓯᓚᐅᔪᔪᖅ 2004-ᒥ, ᐅᖃᕐᓯᒪᒻᒥᔪᖅ KRG-ᑯᑦ ᒥᕐᖑᐃᓯᕐᕕᓂᒃ ᐸᕐᓇᓂᒃᑯᑦ ᐊᒻᒪᓗ ᐊᐅᓚᑦᓯᓂᒃᑯᑦ ᐊᑑᑎᖏᓐᓂᒃ ᑕᒪᑐᒨᓇ ᐱᓇᓱᖃᑎᖃᕐᓱᑎᒃ ᑐᕐᖃᑕᕐᕕᒥ ᓇᐹᕐᑐᓕᓐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ (MFFP) ᐊᒻᒪᓗ ᑕᒫᓂ ᓄᓇᒥ ᓄᓇᓕᓐᓂᒃ.

ᓯᕗᓂᕐᒧᑦ ᐊᖏᖃᑎᒌᓐᓂᖅ ᐊᒻᒪᓗ ᐊᑦᑐᐊᔪᑦ ᑯᐯᒃᑯᑦ ᐱᖁᔭᖏᑦ ᒪᓕᑦᓱᒋᑦ, ᐱᕙᓪᓕᐊᑎᑦᓯᓂᖅ ᐊᑐᓂ ᒥᕐᖑᐃᓯᕐᕕᒥᒃ ᐊᕐᖁᓵᕆᐊᖃᓲᖑᕗᖅ ᐱᒻᒪᕆᐅᑎᓂᒃ ᐊᓂᒍᕐᑎᒋᐊᓕᓐᓂᒃ. ᓯᕗᓪᓕᐹᒥᒃ, KRG-ᑯᑦ ᑲᒪᒋᐊᖃᓲᑦ ᖃᐅᔨᒪᔭᑦᓴᓂᒃ ᓄᐊᑦᓯᓂᕐᒥᒃ ᐱᑦᔪᑎᖃᕐᑎᓗᒋᑦ ᓄᓇᒨᓕᖓᔪᑦ, ᐆᒪᔪᓅᓕᖓᔪᑦ ᐊᒻᒪᓗ ᐃᓄᓐᓅᓕᖓᔪᑦ ᖃᓄᐃᓕᖓᓂᖏᓐᓂᒃ ᖃᐅᔨᓴᕐᑕᐅᔪᒥ ᓄᓇᒥ ᐊᒻᒪᓗ ᑲᑎᕐᓱᐃᓂᕐᒥᒃ ᑖᒃᑯᓂᖓ ᖃᐅᔨᒪᔭᑦᓴᓂᒃ ᖃᓄᐃᓕᖓᓂᖓᓂᒃ ᑐᓴᕐᑎᓯᒍᑏᑦ ᐃᓗᐊᓄᑦ. ᑖᒃᑯᐊ ᖃᓄᐃᓕᖓᓂᖓᓂᒃ ᑐᓴᕐᑎᓯᒍᑏᑦ ᐊᑐᕐᑕᐅᓲᑦ MFFP-ᑯᓂ ᐋᕐᕿᓱᐃᒍᑕᐅᑦᓱᑎᒃ ᐊᑐᑫᓐᓇᓚᖓᔪᒥᒃ ᐃᓂᓪᓚ-ᖓᐅᑎᒻᒪᕆᓐᓂᒃ ᐸᕐᓇᓯᒪᒍᑎᒥᒃ, ᐊᒻᒪᓗ KRG-ᑯᓄᑦ ᑲᔪᓯᑎᑦᓯᒍᑕᐅᑦᓱᑎᒃ ᐊᕙᑎᒥᒃ ᐊᒻᒪᓗ ᐃᓄᓐᓂᒃ ᓱᒻᒣᒍᑎᖏᓐᓂᒃ ᖃᐅᔨᓴᕈᑎᒥᒃ. ᒥᕐᖑᐃᓯᕐᕕᓄᑦ ᐱᖁᔭᖅ ᒪᓕᑦᓱᒍ, MFFP-ᑯᑦ ᑭᖑᓂᖓᓂ ᐃᓄᓕᒫᓂᒃ ᑐᓴᕆᐊᕐᓯᒪᒍᑎᓂᒃ ᐊᑐᓲᖑᒻᒥᔪᑦ ᐋᕐᕿᑕᐅᖁᔭᒥᓂᒃ ᑫᒥᑦᓯᒍᑎᓪᓚᕆᒻᒥᒃ ᓄᐃᑦᓯᖏᓐᓂᒥᓂ ᑯᐯᒃᑯᑦ ᑲᕙᒪᖓᓄᑦ ᐱᑦᔪᑎᖃᕐᑎᓗᒍ ᒥᕐᖑᐃᓯᕐᕕᐅᑉ ᐱᖕᖑᑎᑕᐅᓂᖓᓂᒃ. ᐊᑐᓂ ᒥᕐᖑᐃᓯᕐᕕᓴᒥᒃ ᐱᓇᓱᓐᓂᖅ ᐊᑐᕆᐊᖃᓲᖑᒻᒥᔪᖅ ᐊᕙᑎᒥᒃ ᐊᒻᒪᓗ ᐃᓄᓐᓂᒃ ᓱᒻᒣᒍᑎᖏᓐᓂᒃ ᑲᖕᖑᓇᕿᓂᐅᑉ ᐊᒻᒪᓗ ᕿᒥᕐᕈᒋᐊᑦᓯᐊᓂᐅᑉ ᐱᕐᕈᓯᖓᓂᒃ ᐃᓱᒪᒋᔭᐅᔪᒥᒃ ᐃᓚᖓᓂ 23-ᒥ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥ ᐊᒻᒪᓗ ᐊᕙᑎᐅᑉ ᐱᐅᔫᒋᐊᖃᕐᓂᖓᓄᑦ ᐱᖁᔭᒥ.

ᓄᑖᒥᒃ ᒥᕐᖑᐃᓯᕐᕕᒥᒃ ᐱᖕᖑᑎᑕᐅᔪᖃᕐᒪᑦ, KRG-ᑯᑦ ᐁᑦᑐᑕᐅᓲᖑᕗᑦ ᑲᒪᔨᐅᓂᕐᒥᒃ ᑌᑦᓱᒪ ᐊᐅᓚᑕᐅᓂᖓᓂᒃ ᓯᕗᓂᕐᒧᑦ ᐊᖏᖃᑎᒌᓐᓂᖅ ᐊᕐᖁᑎᒋᑦᓱᒍ, ᑕᒪᓐᓇ ᐃᓚᖃᕐᑎᓗᒍ ᐋᕐᕿᓱᐃᔨᐅᓂᕐᒥᒃ ᐃᖏᕐᕋᑎᑕᐅᓂᖓᓄᑦ ᐸᕐᓇᓯᒪᐅᑎᓂᒃ, ᐱᓇᓱᑦᑎᖃᕐᓂᖓᓂᒃ ᐊᒻᒪᓗ ᓇᑉᐸᑎᕐᓯᒪᔪᖁᑎᖏᓐᓂᒃ. ᐃᓛᒃᑰᑐᒥᒃ ᑕᒪᑐᒧᖓᑐᐊᖅ ᐃᓕᖓᔪᒥᒃ ᐊᖏᖃᑎᒌᒍᑎᒥᒃ ᐊᑎᓕᐅᕐᕕᐅᔪᖃᓲᖑᒻᒥᔪᖅ KRG-ᑯᑦ MFFP-ᑯᓗ ᐊᑯᓐᓂᖓᓂ ᑐᓂᔨᒍᑕᐅᑎᓪᓗᒍ KRG-ᑯᓄᑦ, ᒪᓕᑦᓱᓂ ᐃᓚᖓᓂᒃ 6-ᒥᒃ ᒥᕐᖑᐃᓯᕐᕕᓄᑦ ᐱᖁᔭᒥ, ᓄᑭᓂᒃ ᐊᒻᒪᓗ ᑮᓇᐅᔭᓂᒃ ᐊᑐᕐᑐᓴᓂᒃ ᐱᕙᓪᓕᐊᒍᑏᑦ, ᐱᖁᑎᒻᒪᕇᑦ ᐊᒻᒪᓗ ᒪᑭᑕᑎᑦᓯᓃᑦ ᐱᓇᓱᑦᑕᐅᓂᖏᓐᓄᑦ ᒥᕐᖑᐃᓯᕐᕕᐅᑉ ᐃᓗᐊᓂ.

ᑲᔪᓯᑦᓭᓇᕐᑐᒥᒃ ᐃᓱᒪᑦᓴᓯᐅᖃᑦᑕᓂᖅ ᐊᒻᒪᓗ ᖃᐅᔨᒪᔭᑦᓴᓂᒃ ᐁᑦᑐᑑᑎᑦᓯᐊᓂᖅ ᐱᒻᒪᕆᐅᑦᓱᓂ ᐅᐊᕈᑕᐅᕗᖅ ᒥᕐᖑᐃᓯᕐᕕᓂᒃ ᐱᕙᓪᓕᐊᓂᕐᒧᑦ ᐊᒻᒪᓗ ᐃᖏᕐᕋᑎᑦᓯᓂᕐᒧᑦ. ᐊᑐᓂ ᒥᕐᖑᐃᓯᕐᕕᒥᒃ ᐱᓇᓱᒍᑎᒧᑦ, KRG-ᑯᑦ ᐱᓇᓱᖃᑎᒌᑦᑐᓴᓂᒃ ᐱᖕᖑᐃᓲᑦ ᐃᓐᓄᓯᒪᑎᓪᓗᒋᑦ ᓄᓇᓕᐅᑉ, KRG-ᑯᑦ, ᒪᑭᕝᕕᐅᑉ ᐊᒻᒪᓗ ᑯᐯᒃᑯᑦ ᑲᕙᒪᖓᑕ ᑭᒡᒐᖏᓐᓂᒃ. ᐊᑐᓂ ᒥᕐᖑᐃᓯᕐᕕᒃ ᐱᖕᖑᑎᑕᐅᑐᐊᕐᒪᑦ, ᐃᖏᕐᕋᓯᑎᑦᓯᓯᐊᕐᓂᒧᑦ ᑲᑎᒪᔨᐊᐲᑦ ᐊᑦᔨᒌᖕᖏᑐᓂᒃ ᓄᓇᓕᒻᒥᐅᓂᒃ ᑭᒡᒐᑐᕐᑎᑖᕐᓱᒋᑦ ᒪᑭᑕᐅᓲᖑᒻᒥᔪᑦ ᓄᐃᑕᑦᓯᔨᐅᓚᖓᑎᓪᓗᒋᑦ ᐃᓱᒪᓕᐅᕐ-ᓂᒍᑎᓂᒃ ᒥᕐᖑᐃᓯᕐᕕᒥᒃ ᐊᐅᓚᑦᓯᓂᐅᑉ ᑐᑭᐊᒍᑦ. ᓯᕗᓂᕐᒧᑦ ᐊᖏᖃᑎᒌᓐᓂᐅᑉ ᑎᓕᔨᒍᑎᖓ ᐱᕕᓕᐅᕐᓯᒪᒻᒥᔪᖅ ᖃᓄᐃᓘᖃᑎᒌᓂᒃ ᑲᑎᒪᔨᐊᐱᓐᓂᒃ ᐃᓄᖃᕐᑎᓗᒋᑦ KRG-ᑯᑦ ᐊᒻᒪᓗ MFFP-ᑯᑦ ᑭᒡᒐᖏᓐᓂᒃ ᑖᒃᑯᐊ ᐸᐸᑦᓯᔨᐅᑎᓪᓗᒋᑦ ᑲᔪᓯᑎᑦᓯᒍᓯᑎᓂᒃ KRG-ᑯᑦ ᒥᕐᖑᐃᓯᕐᕕᓂᒃ ᐱᕙᓪᓕᐊᑎᑦᓯᔨᐅᓂᖓᓂᒃ ᐊᒻᒪᓗ ᐃᖏᕐᕋᑎᑦᓯᔨᐅᓂᖓᓂᒃ.

ᖃᐅᔨᒋᐊᓪᓚᕈᒪᒍᕕᑦ ᓄᓇᕕᐅᑉ ᒥᕐᖑᐃᓯᕐᕕᖏᑦᑕ ᐊᒻᒪᓗ ᒥᕐᖑᐃᓯᕐᕕᒥᒃ ᐱᓇᓱᐊᕈᑕᐅᔪᑦ ᒥᑦᓵᓄᑦ ᑕᒫᓂ ᓄᓇᒥ, ᖃᐅᔨᒋᐊᕐᓗᑎᑦ ᓄᓇᕕᒻᒥ ᒥᕐᖑᐃᓯᕐᕕᓄᑦ ᖃᕆᑕᐅᔦᑦ ᐅᒃᑯᐃᕕᖓᓂᒃ ᐅᕙᓂ www.nunavikparks.ca (ᐃᓄᒃᑎᑐᑦ, ᐅᐃᒍᐃᑎᑐᑦ ᐊᒻᒪᓗ ᖃᓪᓗᓈᑎᑐᑦ ᐊᓪᓚᓯᒪᔪᑦ) ᐊᒻᒪᓗ Facebook-ᑯᑦ ᒪᑉᐱᕕᖓᓂᒃ.

 

 

 

nunavikparks