ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᐅᒪᔭᐅᒋᐊᓕᓕᒫᑦ

ᐱᖕᖑᐊᓂᓕᕆᕕᒃ ᑲᔪᓯᑎᑦᓯᓲᖅ ᐱᖕᖑᐊᓃᑦ ᓄᐃᑎᕐᑕᐅᓂᖏᓐᓂᒃ ᑐᕌᖓᔪᓂᒃ ᐃᓘᓐᓀᓄᑦ ᓄᓇᕕᒻᒥᐅᓄᑦ, ᑭᓯᐊᓂ ᐱᓗᐊᕐᑐᒥᒃ ᐅᕕᒃᑲᓄᑦ. ᑕᒪᓐᓇ ᐱᕙᓪᓖᓯᐊᕐᓇᒪᑦ ᐃᓗᓯᕐᓱᓂᕐᒥᒃ ᐊᒻᒪᓗ ᕿᑲᑐᐃᓐᓇᖏᑦᑐᑦ ᐃᓅᖃᑎᒌᓐᓂᖏᓐᓂᒃ ᑫᓪᓗᑐᐃᑦᓱᑎᓪᓗ ᐃᓚᐅᒍᓐᓇᑎᓪᓗᒋᑦ ᐊᑦᔨᒌᖕᖏᑐᓄᑦ ᐱᓕᐅᑎᓂᕐᓄᑦ ᐊᒻᒪᓗ ᐱᖕᖑᐊᓂᕐᓄᑦ. ᐱᓇᓱᕝᕕᐅᑉ ᑐᕌᒐᖏᑦ ᓄᓇᓕᓐᓂ ᐱᔭᐅᒐᓱᐊᓲᑦ ᐃᑲᔪᕐᑎᓪᓗᒋᑦ ᓄᓇᓖᑦ ᑲᕙᒫᐱᖏᑦ ᐊᒻᒪᓗ ᓄᓇᓕᓕᒫᑎᒍᑦ ᐊᕐᖁᑎᒋᑦᓱᒋᑦ ᐱᓇᓱᒉᑦ ᐆᑦᑑᑎᒋᑦᓱᒋᑦ ᓯᕿᓂᖅ ᐱᓇᓱᒐᖅ, ᓄᓇᕕᒻᒥ ᖃᖓᑦᑕᔫᖕᖑᐊᑰᕐᑐᓄᑦ ᐃᑕᒐᒻᒥᒍᑦ ᓯᐊᕐᕆᔭᐅᓯᔭᕐᓱᑎᒃ, ᓄᓇᕕᒻᒥ ᑐᓴᕐᓂᔮᕐᑎᓯᔨᐅᒋᐅᕐᓴᑎᑦᓯᓂᕐᒧᑦ ᐱᓇᓱᒐᖅ, ᐊᒻᒪᓗ ᓄᓇᕕᒃ-ᑯᐯᒃ ᐱᖕᖑᐊᑎᖏᑦᑕ ᐃᓚᐅᓂᖏᑦ ᐅᑭᐅᕐᑕᑐᒥ ᐅᑭᐅᒥ ᐱᖕᖑᐊᓂᕐᔪᐊᓄᑦ.
ᐱᓇᓱᒐᖅ ᑮᓇᐅᔭᕐᑖᓲᖅ ᐃᖏᕐᕋᑎᑦᓯᓚᕆᓐᓂᒥᓄᑦ ᐊᒻᒪᓗ ᐱᓇᓱᐊᕐᑕᖏᑦᑕ ᐅᓄᕐᓂᓴᖏᓐᓄᑦ ᐊᕐᖁᑎᒋᑦᓱᒍ ᐊᖏᖃᑎᒌᒍᑎᒃ ᐃᓕᖓᔪᖅ ᐃᓗᐃᒃᑲᓂᒃ ᑮᓇᐅᔭᖃᕐᑎᓯᓂᕐᒧᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᒍᑎᒃ). ᑮᓇᐅᔭᒋᐊᓪᓓᑦ ᐱᔭᐅᕙᒻᒥᔪᑦ ᑫᐋᔩᑉ ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᓕᕆᕕᖓ, ᓄᓇᕕᒻᒥ ᓄᓇᓕᓕᒫᓂ ᐃᓗᓯᕐᓱᓂᕐᒧᑦ ᑲᑎᒪᔩᑦ (ᐃᓗᓯᕐᓱᓂᓕᕆᔨᒃᑯᑦ), ᑲᓇᑕᒥ ᑲᑎᒪᔩᑦ ᑕᑯᒥᓇᕐᑐᓕᕆᓂᕐᓄᑦ, ᐊᒻᒪᓗ ᐊᑦᔨᒌᖕᖏᑐᑦ ᑲᔪᓯᑎᑦᓯᖃᑕᐅᔩᑦ ᓄᓇᕕᒃ-ᑯᐯᒻᒥ ᐱᖕᖑᐊᑏᑦ ᐊᑐᐃᓐᓇᕈᕐᑎᓂᖏᓐᓂᒃ ᐅᑭᐅᕐᑕᑐᒥ ᐅᑭᐅᒥ ᐱᖕᖑᐊᓂᕐᔪᐊᓄᑦ.