ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓯᕿᓂᖅ ᐱᓂᐊᕈᑎᖓ

ᓱᓇᐅᕚᑦ ᓯᕿᓂᒃᑯᑦ ᐱᓇᓱᐊᕐᓂᖏᑦ?

ᓯᕿᓂᒃᑯᑦ ᑲᓲᒪᔪᒥᒃ ᑐᑭᖃᕐᐳᖅ ᖃᓪᓗᓈᑎᑐᑦ ᐅᖃᐅᓯᕐᒥᒃ ᑕᑯᕋᓐᓈᑎᑦᓯᔩᑦ (circus) ᐊᒻᒪᓗ ᐃᓄᒃᑎᑐᑦ ᐅᖃᐅᓯᖅ ᓯᕿᓂᖅ (sun). ᐃᒣᑦᑑᕗᑦ, ᓯᕿᓂᖅ ᐃᓅᑦᓱᑎᒃ ᑕᑯᕋᓐᓈᑎᑦᓯᓂᕐᒥᒃ ᐱᓇᓱᐊᕐᓂᖃᕐᐳᑦ ᐱᓇᓱᐊᕈᑎᖃᕐᓱᑎᒃ ᐃᓄᐃᑦ ᐱᐅᓯᑐᖃᖏᓐᓂᒃ ᐊᒻᒪᓗ ᐱᖕᖑᐊᕈᓯᖏᓐᓂᒃ. ᓯᕿᓂᒃᑯᑦ ᐱᓇᓱᐊᕐᓂᖓ ᐱᒋᐊᕐᑎᑕᐅᓚᐅᕐᓯᒪᕗᖅ 2009-ᒥ ᐊᕐᕌᒍᓄᑦ ᑕᓪᓕᒪᓄᑦ ᐊᖏᖃᑎᒌᒍᑕᐅᓯᒪᑦᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᖏᓐᓄᑦ (KRG) ᐊᒻᒪᓗ ᓯᖁ ᑎᐅ ᒫᓐᑎ-ᑯᓐᓄᑦ (Cirque du Monde-ᑯᑦ) ᐱᓇᓱᐊᕐᑎᑦᓯᓂᖏᓐᓄᑦ ᐊᑑᑎᓕᕐᑎᑕᐅᓯᒪᑦᓱᑎᒃ ᓯᖁ ᑎᐅ ᓱᓕᐅᓪ-ᑯᓐᓄᑦ Cirque du Soleil-ᑯᓐᓄᑦ ᐃᓅᓱᑦᑐᓕᕆᔨᓄᑦ. ᓇᓗᓀᕆᐊᓪᓚᓗᒋᑦ, ᓯᕿᓂᒃᑯᑦ ᐱᓇᓱᐊᕐᓂᖓ ᐊᑑᑎᓕᕐᑎᑕᐅᓯᒪᕗᖅ KRG-ᑯᑦ ᓱᖃᑦᓯᓂᓕᕆᔨᖏᑦᑕ ᐱᑦᔪᑦᔨᕕᖓᓄᑦ ᐃᓱᒻᒥᑐᕐᑕᐅᖃᑦᑕᓱᑎᒃ ᐃᑲᔪᕐᑕᐅᑦᓱᑎᓪᓗ ᓯᖁ ᑎᐅ ᒫᓐᑎ-ᑯᓐᓄᑦ (Cirque du Monde-ᑯᓐᓄᑦ).

ᐃᓅᓯᓕᕆᓂᒃᑯᑦ ᐱᓇᓱᐊᕐᓂᖓ

ᑕᑯᕋᓐᓈᑎᑦᓯᓂᒃᑯᑦ ᑕᑯᓐᓇᒐᑦᓴᓕᐅᖃᑦᑕᓱᑎᒃ, ᑖᒃᑯᐊ ᓯᕿᓂᒃᑯᑦ ᐱᓇᓱᐊᕐᓂᖓ ᐃᓅᓱᑦᑐᓂᒃ ᐱᕕᑦᓴᑖᕐᑎᑦᓯᓯᒪᕗᑦ ᐃᒻᒥᓐᓂᒃ ᖃᓄᐃᑦᑑᓂᕐᒥᓐᓂᒃ ᓇᓗᓀᕈᓐᓇᓯᑎᑦᓯᓱᑎᒃ ᐊᒻᒪᓗ ᖃᓄᖅ ᐱᓇᓱᒍᓐᓇᑕᒥᓐᓂᒃ ᐱᔪᓐᓇᖕᖏᑕᒥᓐᓂᓪᓗ ᓇᓗᓀᕐᓯᒍᓐᓇᓯᑦᓱᑎᒃ. ᖃᓄᑐᐃᓐᓇᖅ ᐊᑐᕐᑕᐅᓲᓂᒃ ᐱᖃᓯᐅᑦᔨᓂᖃᑦᓯᐊᓱᑎᒃ ᖁᕕᐊᒋᔭᐅᔪᓂᒃ, ᐃᓕᓭᖃᑦᑕᓱᑎᒃ ᐊᑦᔨᒌᖏᑦᑐᓂᒃ ᐱᖕᖑᐊᕐᑕᐅᔪᑦᓴᓂᒃ ᑕᑯᔭᑦᓴᖃᕐᑎᑦᓯᑦᓱᑎᓪᓗ ᖃᓄᑐᐃᓐᓇᖅ, ᒪᑯᐊ ᐃᓚᒋᔭᐅᑎᓪᓗᒋᑦ ᐃᓪᓗᑭᓵᕐᓃᑦ, ᐃᙯᓕᓴᕐᓃᑦ, ᑖᓂᓯᕐᓃᑦ, ᓂᑦᔭᓗᑦᑖᕐᓃᑦ, ᐊᓐᓄᕌᕐᓯᒪᓗᑳᓐᓃᑦ ᒥᖑᐊᕐᓯᒪᑦᓱᑎᒃ ᓴᓇᖕᖑᐊᕐᓯᒪᓗᑳᓐᓃᑦ. ᓄᐃᑕᑎᑦᓯᓱᑎᒃ ᐃᓄᐃᑦ ᐱᐅᓯᑐᖃᖏᓐᓂᒃ, ᐃᒻᒥᓐᓂᒃ ᓲᔪᕆᑦᓯᐊᕐᓂᒥᒃ, ᐃᓄᓐᓄᑦ ᐃᓚᒋᔭᐅᑎᑦᓯᐊᕐᓂᓂᒃ, ᑕᑯᕋᓐᓂᑐᓂᒃ ᓄᐃᑕᑎᑦᓯᓂᕐᓂᒃ ᐊᒻᒪᓗ ᑲᑦᓱᙰᕐᓯᒪᑦᓯᐊᓂᕐᒥᒃ, ᓯᕿᓂᒃᑯᑦ ᐱᓇᓱᐊᕐᓂᖏᑦ ᓄᐃᑎᑦᓯᓯᒪᕗᑦ ᐃᓅᓯᒃᑯᑦ ᐱᓇᓱᐊᒐᑦᓴᐅᔪᓂᒃ ᓂᕈᐊᕐᑕᐅᔪᓐᓇᑐᓂᒃ ᑖᒃᑯᓄᖓ ᐱᖕᖑᐊᖃᑕᐅᔪᓄᑦ ᐊᒻᒪᓗ ᑐᑭᖃᑦᓯᐊᑐᒥᒃ ᓄᐃᑕᑎᑦᓯᓱᑎᒃ ᐅᐱᓐᓇᑐᓂᒃ ᓄᓇᓕᒥᓐᓄᑦ. ᐱᓇᓱᐊᕐᓂᐅᔪᑦ ᓯᕗᓂᖃᕐᐳᑦ ᐃᓄᓲᑦᑐᓕᒫᓄᑦ, ᒪᑯᐊ ᐃᓚᐅᑎᓪᓗᒋᑦ ᐃᓕᓐᓂᐊᓂᕐᒧᑦ ᓄᕐᙯᓐᓇᓂᑰᔪᐃᑦ.

ᐃᒻᒥᓂᕐᓱᕈᓐᓇᓃᑦ ᓄᐃᑕᑎᑦᓯᓂᐅᔪᓪᓗ ᐃᓄᐃᑦ ᐱᐅᓯᑐᖃᖏᓐᓂᒃ

ᑌᒪᖕᖓᓂᑦ ᐱᒋᐊᓚᐅᕐᓂᖏᓐᓂᑦ, ᓯᕿᓂᒃᑯᑦ ᐱᓇᓱᐊᕐᓂᖏᑦ ᑲᔪᓯᑎᑦᓯᓱᑎᒃ ᐱᖃᓯᐅᑦᔨᖃᑦᑕᐳᑦ ᑲᔪᖏᕐᓭᒐᓱᐊᕐᓱᑎᒃ ᓄᓇᕕᒻᒥᐅᑦ ᐃᓅᓱᑦᑐᖁᑎᖏᓐᓂᒃ ᐱᕕᑦᓴᖃᕐᑎᓯᒐᓱᐊᕐᓱᑎᒃ ᐃᓕᓐᓂᐊᕈᑎᑦᓴᐅᖁᓪᓗᒋᑦ ᑲᔪᓯᑎᑦᓯᓂᖃᕈᓐᓇᓗᑎᒃ ᑲᑦᓱᙰᓕᑎᑦᓯᓂᕐᒥᒃ ᐱᑎᑦᓯᔪᓐᓇᖁᓪᓗᒋᑦ, ᐃᓄᐃᑦ ᐅᓂᒃᑲᐅᓯᑐᖃᖏᓐᓂᒃ  ᐅᓂᒃᑳᕐᑐᐊᖏᓐᓂᓪᓗ.

ᑕᑯᓐᓇᕋᓱᐊᕐᓱᑕ ᐱᕙᓪᓕᐊᑎᑦᓯᓂᕐᒥᒃ ᐃᒻᒥᒎᕐᑐᓂᒃ ᑕᑯᕋᓐᓈᑕᐅᖃᑦᑕᑐᑦᓴᓂᒃ ᑕᑯᕋᓐᓂᑐᓂᒃ ᐱᓇᐊᓱᕐᓂᐅᔪᑎᒍᑦ ᓄᓇᓕᓕᒫᓂ, ᐅᐱᕐᖔᒃᑯᑦ ᐃᓕᓭᔪᖃᖃᑦᑕᐳᖅ ᐅᑯᓇᖕᖓᑦ ᐱᓯᒪᔪᓂᒃ Cirque du Soleil-ᑯᓐᓂᑦ ᓄᓇᓖᑦ ᐳᓛᕆᐊᕐᑕᐅᖃᑦᑕᐳᑦ ᐃᓕᓭᔭᕐᑐᑐᓂᒃ ᐃᓅᓱᑦᑑᓂᕐᓴᓂᒃ ᐃᓕᓭᔪᓐᓇᓯᒐᔭᕐᑐᓂᒃ. ᑖᒃᑯᐊ ᓄᑲᕐᓰᑦ ᐃᓅᓱᑦᑐᐃᑦ ᐃᓕᓭᔩᑦ ᐱᓇᓱᐊᕐᓂᖃᕐᑎᑦᓯᔪᓐᓇᓯᖁᓪᓗᒋᑦ ᓄᓇᓕᒥᓐᓂ ᐱᓇᓱᐊᕐᓂᖃᕐᑎᓯᓂᒃᑯᑦ ᐊᖓᔪᒃᓯᓄᑦ ᐃᓕᓭᔨᓄᑦ ᓇᔪᕐᑕᐅᖏᒃᑲᓗᐊᕈᑎᒃ, ᑕᒪᒃᑯᐊ ᐊᖓᔪᒃᓰᑦ ᐊᓯᖏᓐᓄᑦ ᐃᑲᔪᕆᐊᓪᓚᒍᓐᓇᖁᓪᓗᒋᑦ ᐊᓯᖏᓐᓂᒃ ᐱᑦᔪᑎᖃᕐᒥᑎᓪᓗᒋᑦ.

ᑕᒡᒐᓂ 2015-ᒥ, KRG-ᑯᑦ ᐳᓛᕆᐊᓛᕐᓂᐊᐳᑦ ᓄᓇᓕᓐᓄᑦ ᐃᓘᓐᓇᖏᓐᓄᑦ ᖁᓕᓪᓗ ᓯᑕᒪᓪᓗᓄᑦ ᓄᓇᕕᒻᒥᐅᓄᑦ ᐃᑲᔪᕆᐊᓪᓚᒋᐊᕐᑐᓗᑎᒃ ᑲᔪᓯᑎᑦᓯᓗᑎᓪᓗ ᐱᔪᒪᒐᔭᕐᑐᓂᒃ ᓯᕿᓂᒃᑯᑦ ᐱᓇᓱᐊᕐᓂᖏᓐᓄᑦ ᐱᔪᓐᓇᑕᖏᑦᑎᒍᓪᓗ. ᐊᒻᒪᓗᑦᑕᐅᖅ, ᓄᑖᒥᒃ ᑎᓕᔭᐅᓯᒪᐅᑎᒥᒃ ᓯᕗᓂᖃᕐᑐᒥᒃ ᐃᓄᐃᑦ ᐱᐅᓯᑐᖃᖏᓐᓄᑦ ᐊᑦᑐᐊᒋᐊᓪᓚᓂᕐᓴᒥᒃ ᐱᓇᓱᐊᕐᑎᑦᓯᒍᓐᓇᓂᕐᒥᒃ ᑕᒪᓐᓇ ᐃᓘᓐᓇᖏᓐᓄᑦ ᐃᓱᒪᒋᔭᐅᓯᒪᓕᕐᒪᑦ ᐱᓇᓱᐊᕐᑕᐅᒍᒪᑦᓱᓂ ᓯᕿᓂᒃᑯᑦ ᐱᓇᓱᐊᕐᓂᖏᓐᓄᑦ.

ᓯᕿᓂᒃᑯᑦ ᐱᓇᓱᐊᕐᓂᖏᑦ 2015-ᒥ – ᐱᓇᓱᐊᓪᓚᕆᑦᑕᖏᑦ ᐱᓇᓱᐊᕐᓂᐅᔪᑎᒍᑦ

ᐅᑭᐅᒃᑯᑦ ᐊᒻᒪᓗ ᐅᑭᐊᑦᓵᒃᑯᑦ ᐊᕐᕕᑕᕐᓂᖅ

ᐳᓛᕆᐊᖃᑦᑕᓛᕐᓂᐊᐳᑦ ᐃᓘᓐᓇᖏᓐᓄᑦ ᖁᓕᓪᓗ ᓯᑕᒪᓪᓗᓄᑦ ᓄᓇᓕᓐᓄᑦ ᓄᓇᕕᒻᒥᐅᓄᑦ ᐃᓕᓭᔭᕐᑐᓗᑎᒃ ᓄᑲᕐᓯᐅᔪᓂᒃ ᐃᓕᓭᔪᑦᓴᓂᒃ ᐊᒻᒪᓗ ᐋᖅᑭᓱᐃᒋᐊᕐᑐᓗᑎᒃ ᐱᒋᐅᕐᓴᔭᐅᖃᑦᑕᓚᖓᔪᓂᒃ ᐃᓅᓱᑦᑐᓄᑦ ᑕᑯᕋᓐᓈᑎᑦᓯᔪᑦᓴᓄᑦ ᐊᕐᕌᒍᓕᓐᓄᑦ ᖁᓕᓪᓗ ᐱᖓᓱᓄᑦ ᐅᖓᑖᓄᓪᓗ.

ᐅᑭᐅᒃᑯᑦ:

  • ᐳᕕᕐᓂᑐᖅ
  • ᑲᖏᕐᓱᐊᓗᑦᔪᐊᖅ
  • ᐃᕗᔨᕕᒃ
  • ᖁᐊᕐᑕᖅ
  • ᑲᖏᕐᓱᔪᐊᖅ
  • ᐃᓄᒃᔪᐊᖅ
  • ᓴᓪᓗᐃᑦ

ᐅᑭᐊᑦᓵᑯᑦ:

  • ᑰᑦᔪᐊᖅ
  • ᐊᐅᐸᓗᒃ
  • ᑲᖏᕐᓱᒃ
  • ᐊᑯᓕᕕᒃ
  • ᐅᒥᐅᔭᖅ
  • ᑰᑦᔪᐊᕌᐱᒃ

ᐃᓪᓗᓕᒻᒥᐅᓂᒃ ᑕᐅᕐᓰᖃᑎᖃᕐᓂᖅ

ᓯᑕᒪᐅᔪᖕᖏᒐᕐᑐᓂᒃ ᓄᑲᕐᓯᓂᒃ ᐃᓕᓭᔨᓂᒃ, ᑲᒪᒋᔭᐅᓗᑎᒃ ᒪᕐᕉᓐᓄᑦ ᐃᓄᒻᒪᕇᓐᓄᑦ ᐃᓕᓭᔩᓐᓄᑦ, ᐃᒡᓗᓕᓕᐊᕐᑐᖃᓛᕐᐳᖅ, ᑌᑲᓂ ᐱᒋᐊᕐᑎᑦᓯᒋᐊᕐᑐᓗᑎᒃ ᑕᑯᕋᓐᓈᑎᑦᓯᓂᕐᒥᒃ ᐃᒡᓗᓕᒻᒥᐅᓄᑦ ᐱᓇᓱᐊᖃᑎᖃᕐᓗᑎᒃ ᐊᑎᖃᕐᑐᓂᒃ ᐋᕐᑦᓯᖅ ᐱᓇᓱᐊᕐᓂᖏᓐᓂᒃ (Artcirq).

 

ᓯᕿᓂᒃᑯᑦ ᐅᐱᕐᖔᒃᑯᑦ ᐊᐅᓪᓛᓯᒪᑎᑦᓯᓂᖏᑦ

ᐱᖓᓲᔪᕐᑐᒋᓕᕐᑕᖓᓂᒃ ᓯᕿᓂᒃᑯᑦ ᐅᐱᕐᖔᒃᑯᑦ ᐊᐅᓪᓛᓯᒪᑎᑦᓯᓂᕐᒥᒃ ᐋᖅᑭᓱᐃᓛᕐᓂᐊᐳᑦ ᑕᒡᒐᓂ ᐊᕐᕌᒍᒥ ᑲᖏᕐᓱᐊᓗᑦᔪᐊᒥ ᐱᒋᐊᕐᓗᑎᒃ ᔪᓓ 21-ᒥᑦ - 27-ᒧᑦ. ᐅᓄᕐᓂᖃᕐᓗᑎᒃ 40-ᒥᑦ 50-ᒧᑦ ᐊᑯᓐᓂᖏᓐᓂ ᐃᓅᓱᑦᑐᐃᑦ ᓇᑭᑐᐃᓐᓈᕐᓯᒪᔪᑦ ᓄᓇᕕᒻᒥᑦ ᐱᖃᑕᐅᓛᕐᓂᐊᐳᑦ ᐃᓕᓴᕐᑐᓄᑦ ᐃᓚᒋᔭᐅᓗᑎᒃ ᐊᒻᒪᓗ ᐱᒋᐊᕐᓴᖃᑕᐅᓗᑎᒃ ᐱᕙᓪᓕᐊᑎᑦᓯᔪᓐᓇᖁᓪᓗᒋᑦ ᑕᑯᓐᓇᐅᒐᕐᑕᐅᑎᑦᓯᓂᕐᒥᒃ ᐊᒻᒪᓗ ᐱᔭᕆᐅᕐᓴᕆᐊᓪᓚᓗᑎᒃ ᐱᖕᖑᐊᕈᑎᑦᓴᒥᓐᓂᒃ. ᐱᓇᓱᐊᕈᓯᓕᒫᒥ ᐊᐅᓪᓛᓯᒪᓗᑎᒃ, ᑖᒃᑯᐊ ᐱᖃᑕᐅᔪᑦ ᐱᒋᐊᕐᑎᑦᓯᓛᕐᓂᐊᐳᑦ ᑭᖑᓪᓕᐹᒥᒃ ᑕᑯᕋᓐᓈᑎᑦᓯᓂᑦᓴᒥᒃ. ᑕᒡᒐᓂᓗ ᑲᑎᖕᖓᓂᕐᒥ ᐋᖅᑭᓱᐃᓛᕐᓂᐊᕆᕗᑦ ᐅᖃᐅᓯᖃᕈᒫᕐᓂᐊᓗᑎᒃ ᐃᒻᒥᓂᐊᕐᓂᒥᒃ ᓄᖅᑲᑎᑦᓯᒐᓱᐊᕐᓂᒥᒃ, ᐃᒥᐊᓗᒻᒥᒃ ᐋᖓᔮᕐᓇᑐᓂᓪᓗ ᐅᐃᕆᓯᒪᓂᕐᒥᒃ ᓄᖅᑲᑎᑦᓯᒐᓱᐊᕐᓂᒥᒃ, ᐊᒻᒪᓗ ᓂᕿᑦᓯᐊᓂᒃ ᓂᕆᖃᑦᑕᕆᐊᖃᕐᓂᒥᒃ.

ᐱᓇᓱᐊᖃᑎᒌᓐᓂᖅ – ᑲᔪᓯᑎᑦᓯᑦᓯᐊᕈᓐᓇᖁᓪᓗᒋᑦ ᓯᕿᓂᒃᑯᑦ ᐱᓇᓱᐊᕐᓂᖏᓐᓂᒃ

ᐱᓪᓚᕆᐅᔪᒥᒃ ᐃᑲᔪᕐᓯᔭᐅᓚᐅᕋᑦᑕ ᐊᑦᔨᒌᖏᑦᑐᓂᑦ ᓄᓇᓕᓕᒫᓂᑦ ᓄᓇᓕᓐᓂᓪᓗ ᑎᒥᐅᔪᓂᑦ ᑕᒪᒃᑯᐊ ᑲᒪᒋᖕᖏᓯᕐᑐᕐᖃᔭᖏᓐᓇᑦᑎᒍ. ᑕᒪᒃᑯᑎᒎᓇᑦ ᓯᕿᓂᒃᑯᑦ ᐱᓇᓱᐊᕐᓂᖓ ᑲᔪᓯᒍᓐᓇᑎᑕᐅᒪᑦ, ᐊᒻᒪᓗ ᓄᓇᕕᒻᒥᐅᑦ ᐃᓅᓱᑦᑐᖏᓐᓂᒃ ᓯᕗᓂᖃᕐᓱᑎᒃ, ᑲᔪᓯᑎᑕᐅᖁᓪᓗᒋᑦ. ᑕᒪᒃᑯᐊ ᐊᑖᓂ ᐊᓪᓚᓯᒪᔪᑦ ᓄᐃᑕᑎᑕᐅᕗᑦ ᓯᕿᓂᒃᑯᑦ ᐱᓇᓱᐊᕐᓂᖏᓐᓄᑦ ᐃᑲᔪᕐᓯᒪᔪᑦ ᐊᒻᒪᓗ ᓀᑦᑐᒥᒃ ᐅᖃᐅᓯᒐᓛᐱᑦᓯᒪᑦᓱᑎᒃ ᖃᓄᐃᓪᓗᐊᑐᓂᒃ ᐃᑲᔪᕐᓯᓯᒪᓂᖏᓐᓂᒃ.

ᐃᓄᐃᑦ ᖃᖓᑦᑕᔫᖏᑦ (ᑎᒻᒥᔫᖏᑦ)

ᐃᓄᐃᑦ ᖃᖓᑦᑕᔫᖏᑦ ᐃᑲᔪᕐᓯᓚᐅᕐᐳᑦ 30%-ᓄᑦ ᖃᖓᑦᑕᐅᑎᓂᒃ ᐊᑭᑭᓕᒋᐊᕐᑎᑦᓯᓱᑎᒃ ᐃᓘᓐᓇᖏᓐᓄᑦ ᖃᖓᑦᑕᔫᕈᑕᐅᔪᓄᑦ ᓯᕿᓂᒃᑯᑦ ᐱᓇᓱᐊᕐᓂᖏᓐᓄᑦ.

Cirque du Monde-ᑯᑦ (Cirque du Soleil-ᑯᓪᓗ)

ᐃᓚᓕᐅᑎᑦᓱᑎᒃ ᐃᓅᓯᓕᕆᓂᕐᒥᒃ ᐱᓇᓱᐊᕈᓐᓇᓂᕐᒥᒃ ᖃᐅᔨᒪᓂᖏᑦ, ᑖᒃᑯᐊ ᐃᓅᓯᒃᑯᑦ ᐱᖕᖑᐊᓱᑎᒃ ᑕᑯᕋᓐᓈᑕᐅᔪᓄᑦ ᐃᓕᓭᔩᑦ ᐱᔪᓐᓇᒪᑕ ᖃᐅᔨᒪᓂᕐᒥᒍᑦ ᐱᓪᓗᑯᒋᐊᓕᑦᑎᒍᑦ ᐱᓇᓱᐊᕈᓐᓇᓂᕐᒥᒍᑦ, ᐊᑦᑕᓈᕿᑦᑌᓕᓂᕐᒧᑦ ᒪᓕᒐᖃᕐᓱᑎᒃ ᐃᓕᓭᒍᑎᒥᒍᓪᓗ ᐊᑑᑎᔭᖏᑦ ᓈᒻᒪᓈᕐᓯᒪᑦᓯᐊᓱᑎᒃ ᐱᓇᓱᐊᕐᑕᐅᔪᓄᑦ ᐱᖃᑕᐅᔪᓄᓪᓗ. ᐱᓇᓱᐊᕐᓂᐅᔪᑦ ᒪᓕᑦᑎᑕᐅᓯᒪᕗᑦ ᓄᓇᓕᓕᒫᓄᑦ ᐊᑐᓂᑦ ᐱᕙᓪᓕᓇᕐᑐᒥᒃ ᐱᑎᑦᓯᖁᓪᓗᒋᑦ ᐃᓅᓱᑦᑐᐃᑦ ᐃᓅᓯᖏᓐᓄᑦ ᐱᖃᑕᐅᔪᓕᒫᖑᔪᓄᑦ.

ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒃ

ᑕᒡᒐᓂ 2011-ᒥ, ᓯᕿᓂᒃᑯᑦ ᐱᓇᓱᐊᕐᓂᖓ ᐊᒻᒪᓗ ᐅᖓᕙᒥ ᑐᓚᑦᑕᕕᒃ ᐋᓐᓂᐊᕕᒃ ᐃᑲᔪᕐᑎᒌᓚᐅᔪᕗᑦ ᐃᓅᓱᑦᑐᐃᑦ ᐱᖃᑕᐅᔪᑦ ᐊᑐᐃᓐᓇᖃᖁᓪᓗᒋᑦ ᐃᓅᓯᓕᕆᔨᒃᑯᓐᓂᑦ ᐃᑲᔪᕐᑕᐅᓂᕐᒥᒃ. ᐅᖓᕙᒥ ᑐᓚᑦᑕᕕᐅᑉ ᐃᓅᓯᓕᕆᔨᖏᑦ ᐱᖃᑕᐅᓚᐅᕐᐳᑦ ᓯᕿᓂᒃᑯᑦ ᐱᓇᓱᐊᕐᑕᖏᓐᓄᑦ ᐃᑲᔪᕐᓂᒥᓐᓂᒃ ᓄᐃᑕᑎᑦᓯᑦᓱᑎᒃ ᐊᒻᒪᓗ ᑐᕋᐃᓐᓇᑐᒥᒃ ᐃᑲᔪᕈᓐᓇᖁᓪᓗᒋᑦ ᐃᓅᓱᑦᑐᓂᒃ ᐱᖃᑕᐅᔪᓂᒃ, ᑌᒫᒃ ᐱᖁᔭᐅᓯᒪᓂᕐᒥᒍᑦ.

ᑲᑎᕕᒃ ᐃᓕᓴᕐᓂᓕᕆᔨᒃᑯᑦ

ᓄᓇᕕᒻᒥ ᐃᓕᓴᕖᑦ ᐃᑲᔪᕐᑐᓯᒪᑦᓯᐊᐳᑦ ᓯᕿᓂᒃᑯᑦ ᐱᓇᓱᐊᕐᑎᑦᓯᓂᖏᓐᓄᑦ, ᐱᕕᑦᓴᖃᕐᑎᑦᓯᓂᕐᒥᒍᑦ ᐃᓕᓴᕇᕐᓯᒪᓕᕐᑎᓪᓗᒋᑦ ᐃᓕᓴᕖᑦ ᐱᖕᖑᐊᕕᖏᓐᓂᒃ ᐊᑐᕐᑕᐅᒍᓐᓇᑎᑦᓯᓱᑎᒃ ᐊᑭᖃᖕᖏᑎᓪᓗᒋᑦ ᓯᕿᓂᒃᑯᑦ ᐱᓇᓱᐊᕐᓂᖏᓐᓄᑦ. ᓱᓕᒋᐊᓪᓚᓗ, ᐃᓕᓴᕖᑦ ᐊᐅᓚᑦᓯᔨᖏᑦ ᑌᒪᖕᖓᑦ ᙯᖁᔨᖃᑦᑕᓚᐅᕐᐳᑦ ᑕᑯᕋᓐᓈᑕᐅᓂᕐᒧᑦ ᐃᓕᓭᔨᖏᓐᓂᒃ ᐱᖃᑕᐅᖁᔨᑦᓱᑎᒃ ᐃᓕᓴᕕᐅᑉ ᐃᙯᓕᓴᕐᓂᒧᑦ ᐱᓇᓱᐊᕐᑎᑦᓯᓂᖏᓐᓄᑦ. ᓯᕿᓂᒃᑯᑦ ᐱᓇᐊᓱᕐᑎᑦᓯᔨᖏᑦᑕ ᐱᓇᓱᑦᑎᖏᑦ ᖃᐅᔨᒪᖃᑎᙯᓐᓇᖃᑦᑕᐳᑦ ᑲᔪᓯᑦᓱᑎᒃ ᑌᒪᖕᖓᑦ ᐃᓕᓴᕖᑦ ᑲᑎᒪᔨᖏᓐᓂᒃ ᖃᐅᔨᒪᑎᑦᓯᑦᓯᐊᕋᓱᐊᕐᓱᑎᒃ ᓯᕿᓂᒃᑯᑦ ᐱᓇᓱᐊᕐᓂᕆᒐᔭᕐᑕᖏᓐᓂᒃ ᐊᕝᕕᐊᓯᖁᓇᒋᑦ ᐃᓕᓴᕖᑦ ᐅᓪᓗᖁᑎᖏᑦᑎᒍᑦ ᒪᓕᒐᓕᐊᕆᓯᒪᔭᖏᓐᓂᒃ ᐊᒻᒪᓗ ᐃᓕᓭᔩᑦ ᖃᐅᔨᒪᑎᑦᓯᐊᖃᑦᑕᓱᒋᑦ ᐱᕙᓪᓕᐊᓂᕆᔭᒥᓐᓂᒃ.

ᑕᕐᕋᒥ ᓄᓇᓖᑦ ᒥᓂᓯᐹᓚᑎᒃᑯᑦ

ᓄᓇᓕᓐᓂ ᓱᖃᑦᓯᓂᓕᕆᓂᕐᒧᑦ ᑲᒪᔨᐅᔪᑦ ᐃᑲᔪᖃᑦᑕᓚᐅᕐᐳᑦ ᓯᕿᓂᒃᑯᑦ ᐃᓅᓱᓐᓂᓭᑦ ᐃᓕᓭᔨᖏᓐᓂᒃ ᐱᓇᓱᐊᕐᓂᓕᒫᖏᓐᓂ ᐊᒻᒪᓗ ᐊᑐᐃᓐᓇᕈᕐᑎᕆᓕᑐᐊᕐᒪᑕ ᑕᑯᕋᓐᓈᑎᑦᓯᓂᕆᓚᖓᔭᖏᓐᓂᒃ.

ᐊᕙᑕᒃᑯᑦ ᐱᐅᓯᑐᖃᓕᕆᔨᖏᑦ

ᑕᑯᕋᓐᓇᑕᐅᔪᓄᑦ ᐃᓕᓭᔩᑦ ᐊᒻᒪᓗ ᐋᖅᑭᓯᒪᑎᑦᓯᔨᐅᔪᑦ ᐊᕙᑕᒃᑯᑦ ᐱᐅᓯᑐᖃᓕᕆᔨᖏᓐᓄᑦ ᐱᖃᑕᐅᖃᑦᑕᓚᐅᕐᐳᑦ ᓯᕗᓪᓕᐹᒥᒃ ᑕᒡᒐᓂ 2014-ᒥ ᓯᕿᓂᒃᑯᑦ ᐅᐱᕐᖔᒥ ᐊᐅᓪᓛᓯᒪᑎᑦᓯᓂᖓᓂ. ᑕᒪᓐᓇᓗ ᐱᓇᓱᐊᕐᓂᐅᔪᑦ ᐱᕈᕐᐸᓪᓕᐊᑎᑕᐅᖏᓐᓇᓚᖓᕗᖅ ᓯᕿᓂᒃᑯᑦ ᐱᓇᓱᐊᕐᑎᑦᓯᓂᖏᑦ ᐃᓚᓕᐅᑦᔨᓯᒪᖃᑦᑕᖁᓪᓗᒋᑦ ᐃᓄᐃᑦ ᐱᐅᓯᑐᖃᖏᓐᓂᒃ ᑌᒪᖕᖓᑦ ᐱᕙᓪᓕᐊᖏᓐᓇᓗᑎᒃ ᐃᓕᓭᓂᖃᓕᑐᐊᕋᐃᑉᐸᑕ ᐱᓇᓱᐊᓕᕋᐃᑉᐸᑕᓗ ᓄᓇᓕᓐᓂ. ᐊᕙᑕᒃᑯᑦ ᐱᐅᓯᑐᖃᓕᕆᔨᖏᑦ ᐃᓕᔨᓯᒪᒻᒪᑕ ᐃᓚᒋᔭᐅᓪᓚᕆᓕᕐᑎᑦᓯᑦᓱᑎᒃ ᑲᓇᑕᒥ ᐱᓇᓱᐊᕐᑕᐅᔪᓄᑦ ᐊᒻᒪᓗ ᓇᓂᓕᒫᖅ ᐱᐅᓯᑐᖃᓕᕆᓂᕐᒧᑦ ᓯᕗᓕᕐᑎᐅᓪᓚᕆᓕᕐᑎᓯᑦᓱᑎᒃ. ᐊᕙᑕᒃᑯᑦ ᐱᓇᓱᐊᕐᒪᑕ ᓄᓇᕕᒻᒥᐅᑦ ᐃᓄᖏᑦᑕ ᐱᐅᓯᑐᖃᖏᑦ ᑲᔪᓯᑎᑕᐅᖁᓪᓗᒋᑦ ᐱᕙᓪᓕᐊᑎᑕᐅᖁᓪᓗᒋᓪᓗ ᓯᕗᓂᕐᒥ ᐃᓅᓛᕐᑐᓄᑦ ᑲᔪᓯᑎᑕᐅᔪᓐᓇᖁᓪᓗᒋᑦ ᐱᕙᓪᓕᐅᑕᐅᓯᒪᔪᓐᓇᖁᓪᓗᒋᓪᓗ ᐱᐅᓯᖏᑦᑕ ᐱᓪᓚᕆᐊᓘᓂᖏᑦ ᓯᓚᑐᓂᖏᓪᓗ ᐊᑑᑎᔭᐅᔪᓐᓇᖁᓪᓗᖏᑦ ᑭᖑᕚᕆᔭᖏᓐᓄᑦ.

 


logo_CIRQINIQ.80

facebook                              

ᐊᐱᖅᓲᑎᑦᓴᖃᕆᐊᓪᓚᒍᕕᑦ ᐅᕝᕙᓗ ᖃᐅᔨᒋᐊᓪᓚᒍᒪᒍᕕᑦ: