ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓄᓇᓕᓐᓂᒃ ᐱᓪᓗᑯᒋᐊᖃᕐᑐᑎᒍᑦ ᐃᑲᔪᕐᓯᒪᔩ

ᒪᓕᑦᓱᒍ ᑎᓕᔭᐅᒪᐅᑎᒃ ᐱ.10 ᓯᕗᓂᕐᒧᑦ ᐊᖏᖃᑎᒌᓐᓂᒥ, ᐱᒍᑦᔨᕕᒃ ᑲᔪᓯᑎᑦᓯᓲᖅ ᐱᓪᓗᑯᒋᐊᓕᓐᓂᒃ ᐃᑲᔪᕐᓯᐅᑎᖃᕐᓱᓂ ᐃᒥᕐᑕᐅᓲᑦ ᐃᒪᐅᑉ ᐊᐅᓚᑕᐅᓂᖏᓐᓄᑦ, ᐊᓂᑦᓯᕖᑦ, ᓴᓃᑦ ᐊᒻᒪᓗ ᐱᒋᐅᕐᓴᑎᑦᓯᓂᖅ ᐃᒥᕐᑕᐅᒍᓐᓇᑐᒥᒃ ᐃᒪᕐᒥ ᐃᒥᕐᑕᕖᑦ ᐊᐅᓚᑦᓯᔨᖏᓐᓂᒃ. ᐊᒻᒪᓗᒋᐊᓪᓚᒃ, ᒪᓕᑦᓱᑎᒃ ᑎᓕᔭᐅᒪᐅᑎᒥᒃ ᐱ.15-ᒥ ᓯᕗᓂᕐᒧᑦ ᐊᖏᖃᑎᒌᒍᑎᒥ, ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᑦ ᐃᑲᔪᕐᓯᒪᓲᑦ ᐱᒋᐅᕐᓴᑎᑕᐅᓂᖏᓐᓂᒃ ᑕᕐᕋᒥ ᓄᓇᓕᓐᓂ ᐅᑯᓇᓂ ᐱᓇᓱᒐᕐᓂ: ᐱᖁᔭᓕᕆᓂᕐᒥ ᐊᐅᓚᑦᓯᓂᕐᒥᒃ ᐊᒻᒪᓗ ᒪᓂᓯᐹᓚᑏᑦ ᐊᓪᓚᑯᕕᓕᕆᔭᐅᓂᖏᓐᓂᒃ, ᓄᓇᐅᑉ ᐊᑐᕐᑕᐅᓂᖓᑕ ᐸᕐᓇᑕᐅᓂᖓᓂᒃ ᐊᒻᒪᓗ ᐱᕙᓪᓕᐊᑎᑕᐅᓂᖓᓂ ᓄᓇᓕᐅᑉ, ᐊᒻᒪᓗᒋᐊᓪᓚᒃ ᓴᓇᒻᒪᓴᕐᓂᒃ. ᐱᒍᑦᔨᕕᒃ ᑲᒪᒋᔭᖃᓲᖅ ᓴᓇᒻᒪᓭᑦ ᐱᓇᓱᑦᑕᐅᓂᖏᓐᓂᒃ, ᑌᓗᒋᑦ ᐊᐅᓚᑦᓯᓂᕐᒥᒃ ᓯᖁᒥᓯᒪᔪᕐᓂᐊᑕᐅᓂᖏᓐᓂᓗ ᒪᓂᓯᐹᓚᑏᑦ ᐃᓪᓗᖁᑎᖏᑦ ᓄᓇᒃᑰᔪᖏᓪᓗ.

ᐃᒪᖅ ᐃᒥᕐᑕᐅᓲᖅ

ᐱᒍᑦᔨᕕᒃ ᐃᑲᔪᕐᓯᒪᓲᖅ ᑕᕐᕋᒥ ᓄᓇᓕᓐᓂᒃ ᐊᐅᓚᑦᓯᓂᖓᓂᒃ ᓯᖁᒥᓯᒪᔪᕐᓂᐊᑕᐅᓂᖏᓐᓂᓗ ᐃᒥᕐᑕᕕᐅᑉ ᐃᓪᓗᖁᑎᖏᑦ, ᑲᒪᒋᔭᐅᓂᖏᑦ ᐃᒥᕐᑕᑕᐅᓂᖏᓐᓂᓗ ᐃᒥᕐᑕᐅᓲᑦ ᐃᒣᑦ, ᐊᒻᒪᓗᒋᐊᓪᓚᒃ ᐱᓇᓱᐊᕈᓯᑕᒫᑦ ᐃᒥᕐᑕᐅᓲᖅ ᐃᒣᑦ ᐱᐅᔫᒐᓗᐊᕐᒪᖔᑕ ᐃᑉᐱᒍᓱᒐᓱᐊᕐᓱᑎᒃ. ᑖᒃᑯᐊ ᐱᓇᓱᑦᑕᐅᔪᑦ ᑲᒪᒋᔭᐅᓲᑦ ᑕᕐᕋᒥ ᓄᓇᓕᓐᓄᑦ. ᓱᕐᖁᐃᓯᒐᓱᐊᕐᕕᒃ ᐅᖔᕙ ᑐᓚᑦᑕᕕᒃ ᑲᔪᓯᑎᑦᓯᓲᖅ ᑕᕐᕿᑕᒫᑦ ᖃᐅᔨᒐᓱᐊᕐᓱᓂ ᐃᒪᖅ ᖃᓄᐃᓕᕐᒪᖔᑦ ᓱᕐᖁᐃᓯᒐᓱᐊᕐᓱᓂ ᐅᑦᑐᕋᐅᑎᓂᒃ ᑐᓂᔭᐅᓲᓂᒃ ᐃᓗᓐᓇᖏᓐᓂᒃ ᓄᓇᓕᓐᓄᑦ ᐃᒥᕐᑕᕖᑦ ᐊᐅᓚᑦᓯᔨᖏᓐᓂᒃ ᐱᔪᓂᑦ. ᑕᒪᑐᒪ ᐃᓗᐊᒍᑦ, ᐱᒍᑦᔨᕕᒃ ᑲᒪᓲᖅ ᐱᓇᓱᑦᑕᖏᓐᓂᒃ ᐊᑦᔨᒌᖏᑐᑦ ᐱᓇᓱᑦᑏᑦ, ᐱᓗᐊᕐᑐᖅ ᑕᕐᕋᒥ ᓄᓇᓕᓐᓂ, ᐱᑕᙯᓐᓇᕈᓐᓇᑐᑦ ᐱᕙᓪᓕᐊᔭᐊᓂᖏᓐᓄᑦ, ᐊᕙᑎᓕᕆᓂᕐᒧᑦ, ᐆᒪᔪᓕᕆᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓗ ᑐᕐᖃᑕᕐᕕᒃᑯᓐᓂᒃ ᐊᒻᒪᓗ ᓄᓇᕕᒃ ᓄᓇᓕᓕᒫᑦ ᑲᑎᒪᔨᖏᑦ ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᒍᑦᔨᕕᒻᒥ.

ᓱᓕᒋᐊᓪᓚᒃ, ᒪᕐᕉᒃ ᐱᓇᓱᑦᑏᒃ - ᐃᓕᓐᓂᐊᑎᑦᓯᔩᑦ ᐱᒋᐅᕐᓴᑎᑦᓯᓲᒃ ᒪᓂᓯᐹᓚᑏᑦ ᐊᐅᓚᑦᓯᔨᖏᓐᓂᒃ ᐊᐅᓚᑦᓯᒍᓐᓇᖁᑦᓱᒋᑦ ᑲᔪᓯᑎᑦᓯᓗᑎᓪᓗ ᐃᒥᕐᑕᐅᓲ ᐃᒣᑦ ᐃᓪᓗᖁᑎᖓᓂᒃ, ᐊᒻᒪᓗ ᐃᑲᔪᕆᐊᒥᒃ ᐊᑐᐃᓐᓇᐅᓲᒍᒐᓗᐊᕐᓱᑎᒃ ᑐᕃᓐᓇᑐᒃᑯᑦ ᐊᐅᓚᑦᓯᓂᕐᒧᐊᖓᔪᓕᒫᓄᑦ ᓯᖁᒥᓯᒪᔪᐃᓪᓗ ᐋᕐᕿᓱᕆᐊᖃᓕᕐᒪᑕ (ᐃᒣᑦ ᑐᕐᓱᐊᖏᑦ ᓯᖁᒥᑐᐊᕐᒪᑕ ᖁᐊᑐᐊᕐᒪᑕᓗᓐᓃᑦ, ᐊᓯᖏᓪᓗ), ᓯᕗᓪᓕᐸᐅᑎᓪᓗᒍ ᐱᔭᑦᓴᖓ ᐃᓕᓐᓂᐊᑎᑦᓯᓂᖅ ᒪᓂᓯᐹᓚᑎᒃ ᐊᐅᓚᑦᓯᔨᓂᒃ ᑖᒃᑯᐊ ᐱᓇᓱᑦᑕᐅᒍᓯᖏᓐᓂᒃ. ᑕᒪᓐᓇ ᑲᔪᓯᑎᑕᐅᒋᐊᖃᕐᓂᖓ ᐊᑐᕐᑐᒪᕆᐊᓗᒃ ᐃᑉᐱᒋᑦᓱᒋᑦ ᐱᐅᓯᐅᓯᒪᔪᑦ ᐊᒻᒪᓗ ᐸᕐᓇᑕᐅᓯᒪᔪᑦ ᐃᓪᓗᖁᑏᑦ ᑮᓇᐅᔭᕐᑑᑎᐅᓯᒪᔪᑦ. ᐅᑦᑑᑎᒋᓗᒍ, ᐱᓇᓱᑦᑕᐅᔪᕕᓂᐅᑦᓱᑎᒃ 2013-ᒥ ᑲᖏᕐᓱᕐᒥ ᑕᓯᐅᔭᕐᒥᓗ ᓄᑕᐅᓪᓕᑐᕐᑕᐅᔪᕕᓃᒃ ᐃᒥᕐᑕᕕᖏᑦ ᒪᓕᑦᑎᓯᑦᓱᒋᒃ ᑯᐯᒃ ᑲᕙᒪᒃᑯᑦ ᒪᓕᒐᓕᐊᕆᓯᒪᔭᖏᓐᓂᒃ, ᐱᒍᑦᔨᕕᒃ ᐃᑲᔪᕐᓯᒪᐅᑎᓚᐅᔪᔪᖅ ᐃᑲᐅᕐᓂᓂ ᐊᒥᓱᒐᓛᓂᒃ ᐱᓇᓱᑦᑏᑦ ᐱᒋᐅᕐᓴᑎᑦᓱᒋᑦ ᐊᐅᓚᑕᐅᒍᓱᖓᓂᒃ ᐃᓪᓗᖁᑏᑦ.

ᓄᐃᑕᐅᑦᓱᑎᒃ 2011-ᒥ, Positive Reinforcement Program ᐃᒥᕐᑕᐅᓲᒥ ᐃᒪᕐᒥᒃ ᐃᓪᓗᖁᑎᖏᑦᑕ ᐊᐅᓚᑦᓯᔨᖏᑦ ᐃᓕᑕᕐᓯᓚᖓᔪᑦ ᐱᓇᓱᓐᓂᒥᓂᒃ ᐱᐅᓯᐅᒥᓯᒪᔪᓂᒃ ᒪᓂᓯᐹᓚᑎᒃᑯᑦ ᐱᓇᓱᑦᑎᖏᓐᓂᒃ. ᑕᕝᕙᓂ ᐊᕐᕌᒍᕐᒥ, ᐱᖓᓱᐃᑦ ᐃᒥᕐᑕᕕᒻᒥ ᐊᐅᓚᑦᓯᔩᑦ ᓴᓪᓗᓂ, ᐃᓄᑦᔪᐊᒥ, ᑰᑦᔪᐊᕌᐱᒥᓗ ᓇᓪᓕᑳᕐᑕᐅᔪᕕᓃᑦ ᐱᒋᐅᓴᕆᐊᕐᑐᓚᖓᓗᑎᒃ ᓅᕕᒻᐱᕆ 28-ᒥᑦ ᑎᓯᒻᒪᐱᕆ 3-ᒧᑦ Saint Laurent ᐃᓕᓐᓂᐊᕕᒻᒪᕆᖓᓂᒃ ᖁᐱᕐᕈᓂ ᑕᑯᑦᓴᐅᖏᑐᓂᒃ ᐃᔨᒧᑦ, ᐃᑯᒪᓐᓂ ᓄᐃᑕᑎᑦᓯᒍᓐᓇᑐᓂᒃ ᐃᔨᒧᑦ ᑕᑯᔭᐅᕐᖃᔭᖏᓂᒃ ᐊᒻᒪᓗ ᓈᒻᒪᓯᓕᑎᐅᑎᓂᒃ, ᐊᒻᒪᓗ ᑕᑯᓂᐊᓛᕐᓱᑎᒃ ᐊᑦᔨᒌᖏᑐᓂᒃ ᐃᒪᕐᓂ ᐃᒥᕐᑕᐅᓲᓂᒃ ᐊᓂᑦᓯᕖᓪᓗ ᐃᓪᓗᖁᑎᖏᓐᓂᒃ ᒫᓐᑐᔨᐊᓪᒥ.

ᐊᒻᒪᓗᒋᐊᓪᓚᒃ, ᑕᒪᓐᓇ ᐃᑲᔪᕐᓯᒪᖁᓗᒍ ᑲᔪᓯᑎᑕᐅᓂᖓ ᑎᓕᔭᐅᒪᐅᑎᒃ ᐱ.10 ᓯᕗᓂᕐᒧᑦ ᐊᖏᖃᑎᒌᓐᓂᒥ, ᐃᒥᕐᑕᕖᑦ ᐃᓪᓗᖁᑎᖏᓐᓂᒃ ᐊᐅᓚᑦᓯᔩᑦ ᐱᒋᐅᕐᓴᑎᑕᐅᓂᖓ ᓯᕗᒧᐊᕆᐊᕐᑎᑕᐅᓚᐅᔪᔪᖅ 2013-ᒥ ᐱᓇᓱᑦᑎᑖᕐᓱᑎᒃ ᐅᓪᓗᓕᒫᕐᓯᐅᑎᒥᒃ ᐃᓕᓐᓂᐊᑎᑦᓯᔨᒥᒃ. ᐱᑕᙯᓐᓇᕈᓐᓇᑐᑦ ᐱᕙᓪᓕᐊᔭᐊᓂᖏᓐᓄᑦ, ᐊᕙᑎᓕᕆᓂᕐᒧᑦ, ᐆᒪᔪᓕᕆᓂᕐᒧᑦ ᒥᕐᖑᐃᓯᕐᕕᓕᕆᓂᕐᒧᓗ ᑐᕐᖃᑕᕐᕕᒃᑯᓐᓂᒃ ᒪᓕᒐᖃᕐᒪᑕ ᐊᐅᓚᑦᓯᔩᑦ ᐱᔪᓐᓇᐅᑎᖃᕆᐊᖃᕐᒪᑕ.

ᓄᓇᒃᑯᔫᑦ ᐃᓪᓗᐃᓗ

ᐱᒍᑦᔨᕕᒃ ᐱᓇᓱᑦᑎᖃᓲᖅ ᒪᕐᕉᓂᒃ ᓄᓇᒃᑰᔪᓕᐅᕐᑏᓂᒃ - ᐃᓕᓐᓂᐊᑎᑦᓯᔨᐅᑦᓱᑎᒃ ᐊᕐᕕᑕᓲᓂᒃ ᓄᓇᓕᓐᓄᑦ ᐱᒋᐅᕐᓴᑎᑦᓯᒋᐊᕐᑐᓱᑎᒃ ᓄᓇᓕᓐᓂ ᓴᓇᔨᓂᒃ ᓄᓇᒃᑰᔪᓂᒃ ᐃᑲᔪᕆᐊᕐᓱᒋᓪᓗ ᐱᓇᓱᑦᑎᓗᒋᑦ. ᐊᒥᓱᒐᓛᑦ ᑕᕐᕋᒥ ᓄᓇᓕᓐᓂ ᐱᕕᑦᓴᖃᓚᐅᕐᑐᖅ ᑕᒪᑐᒥᖓ ᐱᒍᑦᔨᓂᕐᒥᒃ ᐱᐅᓯᐅᒥᒋᐊᕐᓱᒍ ᑕᕝᕙᓂ ᐊᕐᕌᒍᕐᒥ, ᐃᑲᔪᕐᓯᒪᑦᓱᑎᒃ ᐋᕐᕿᓱᕐᑕᐅᓂᒋᐊᖃᕐᓂᖏᓐᓂᒃ ᐱᐅᒃᒍᑏᑦ ᓯᖁᑦᑎᓚᕆᖕᖏᓂᖏᓐᓂ ᐋᕐᕿᒋᐊᑦᑕᓴᐅᑎᒋᖃᑦᑕᓱᒋᑦ ᐊᒻᒪᓗ ᓯᖁᒥᓯᒪᖕᖏᓂᕐᓴᐅᓕᕐᓱᑎᓪᓗ. ᑕᕝᕙᓂ ᐊᕐᕌᒍᕐᒥ, ᐱᒍᑦᔨᕕᒃ ᐸᕐᓀᓯᒪᒻᒥᔪᖅ ᐱᒋᐅᕐᓴᑎᑦᓯᓂᐊᕐᓱᓂ ᓄᓇᓕᓐᓂ ᓄᓇᒃᑰᔪᓕᐅᕐᑎᓂᒃ ᐊᕐᕌᒎᓚᕐᑐᒥ. ᑭᖑᓪᓕᐹᒥ, ᐃᑲᔪᕐᓯᔭᐅᓚᐅᕐᒥᔪᑦ ᒪᓂᓯᐹᓚᑏᑦ ᑲᒪᔨᖏᑦ ᐃᓚᑦᓴᓂᒃ ᑎᑭᓭᒋᐊᒥᒃ, ᐊᑐᐃᓐᓇᕈᕐᑎᕆᒋᐊᒥᓪᓗ ᓇᓕᑭᓐᓂᐸᐅᓕᐅᑎᓚᖓᔪᓂᒃ ᓄᓇᒃᑰᔫᑦ ᐃᓚᑦᓴᖏᓐᓄᑦ, ᐊᒻᒪᓗ ᐱᓇᓱᑦᑎᑖᕐᓂᒧᑦ ᓄᓇᒃᑰᔪᓕᐅᕐᑎᓂᒃ.

ᐱᒍᑦᔨᕕᒃ ᐱᓇᓱᑦᑎᖃᓲᖅ ᒪᕐᕉᓂᒃ ᐱᓪᓗᑯᒋᐊᓖᓐᓂᒃ - ᐃᓕᓐᓂᐊᑎᑦᓯᔩᓐᓂᒃ ᐃᑲᔪᕐᓯᒪᓚᖓᔫᓐᓂᒃ ᒪᓂᓯᐹᓚᑎᓂ ᐱᓇᓱᑦᑎᓂᒃ ᑲᔪᓯᖁᓗᒋᑦ ᓯᖁᒥᓯᒪᔪᖃᓕᕐᐸᑦ ᐋᕐᕿᓱᐃᓚᖓᑎᓪᓗᒋᑦ ᐱᖕᖑᐊᕕᓐᓂᒃ (ᖁᐊᓴᕐᕕᓂᒃ, ᓄᓇᓕᓐᓂ ᐱᖕᖑᐊᕕᓐᓂᒃ ᐳᐃᑦᔪᕋᕐᕕᓂᓪᓗ). ᐱᒍᑦᔨᕕᒃ ᐃᑲᔪᕐᓯᒪᓲᒍᒻᒥᔪᖅ ᑕᕐᕋᒥ ᓄᓇᓕᓐᓂ ᓂᐅᕕᕋᓱᐊᓕᕐᒪᑕ ᓄᑕᐅᓪᓕᑐᐃᓕᕐᒪᑕᓗ ᐃᓪᓗᖁᑏᑦ ᐃᑲᔪᕐᓯᒪᔭᐅᖕᖏᑐᑦ ᐊᓯᖏᓐᓄᑦ ᑮᓇᐅᔭᕐᑑᑎᓄᑦ ᐊᐅᓚᑕᐅᓲᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᓄᑦ. ᐅᑦᑑᑎᒋᓗᒍ, ᑕᕐᕋᒥ ᓄᓇᓕᖏᑦ ᐊᐅᐸᓗᒻᒥ ᐃᑲᔪᕐᓯᒪᔭᐅᓚᐅᔪᔪᖅ ᓴᓇᔭᐅᑎᓪᓗᒍ ᐃᑳᕈᑎᒃ.