ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᐅᒪᔭᐅᒋᐊᓕᓕᒫᑦ

ᐱᖁᔭᓕᕆᓂᕐᒥᒃ, ᐃᓄᐃᑦ-ᐱᖁᔭᑎᒎᕐᓂᖓᓂᒃ ᐊᒻᒪᓗ ᑲᕙᒫᐱᓐᓂᒃ ᐊᐅᓚᑦᓯᓂᕐᒥᒃ ᐱᑦᔪᔨᕕᐅᑉ ᐊᑑᑎᒻᒪᕆᖓ ᐃᓕᖓᕗᖅ ᓱᕐᖁᐃᓂᕐᒧᑦ ᐱᖁᔭᓄᑦ ᐊᑦᑐᐊᔪᓂᒃ KRG-ᑯᑦ ᐊᐅᓚᑦᓯᒍᑎᖏᑦᑕ ᒪᓕᓐᓂᖓᓂᒃ ᐱᖁᔭᓂᒃ. ᐅᖃᑦᓯᐊᓗᒍ, ᑖᓐᓇ ᐱᑦᔪᔨᕕᒃ ᐱᓇᓱᖃᑎᖃᓲᖑᕗᖅ KRG-ᑯᑦ ᐱᑦᔪᔨᕕᓕᒫᖏᑦᑕ ᑐᑭᒧᐊᑦᑎᓯᔨᖏᓐᓂᒃ ᐊᒻᒪᓗ ᐃᓘᓐᓈᒍᑦ ᑐᑭᒧᐊᑦᑎᓯᔨᒻᒪᕆᒻᒥᒃ ᑖᒃᑯᐊ ᐊᖏᕐᑎᓯᒐᓱᐊᕐᑎᓗᒋᑦ ᐊᓪᓚᑎᓪᓗᒋᓪᓗ ᐊᖏᖃᑎᖐᒍᑎᓂᒃ ᐊᑦᑐᐊᔪᓂᒃ ᐱᑦᔪᔨᕕᓐᓄᑦ ᑲᕙᒪᑐᖃᒃᑯᑦ ᑯᐯᒃᑯᓗ ᑲᕙᒪᖏᓐᓂ. ᐋᕐᕿᓱᐃᓲᖅ ᑐᑭᑖᕈᑎᓂᒃ ᐊᒻᒪᓗ ᐱᖁᔭᓂᒃ ᐊᑐᓕᕐᑎᑕᐅᓚᖓᔪᓂᒃ KRG-ᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑐᑭᑖᕈᑎᓂᒃ ᐊᑐᓕᕐᑎᑕᐅᓚᖓᔪᓂᒃ ᐳᕐᑐᓂᕐᓴᓄᑦ ᑲᑎᒪᔨᓄᑦ. ᑖᓐᓇ ᐱᑦᔪᔨᕕᒃ ᐊᓪᓚᓲᖑᒻᒥᔪᖅ ᐱᓇᓱᑦᑎᓯᒍᑎᓂᒃ ᐊᑎᓕᐅᕐᕕᐅᒋᐊᓕᓐᓂᒃ KRG-ᑯᓄᑦ ᐊᒻᒪᓗ ᑲᒪᔨᐅᒻᒥᓱᓂ ᐊᑭᑭᓐᓂᐹᕐᓯᐅᓂᒃᑯᑦ ᕿᓂᕈᑎᓕᒫᓂᒃ ᐃᓕᖓᔪᓂᒃ ᓂᐅᕕᕐᓂᓴᖓᓄᑦ ᐱᖁᑎᓂᒃ ᐱᑦᔪᔭᐅᒍᑎᓂᓪᓗ. ᑭᖑᓪᓕᐹᖅ, ᐊᑐᓲᖑᒻᒥᔪᖅ ᐱᖁᔭᓕᕆᓂᒃᑯᑦ ᖃᐅᔨᒪᔨᐅᑦᓱᓂ ᐊᒻᒪᓗ ᓴᐳᒻᒥᔨᐅᑦᓱᓂ KRG-ᑯᑦ ᑲᑎᒪᔨᖏᓐᓄᑦ, ᐳᕐᑐᓂᕐᓴᓄᓪᓗ ᑲᑎᒪᔨᓄᑦ ᐊᒻᒪᓗ ᐊᓯᖏᓐᓄᑦ ᑎᒥᐅᑉ ᐱᑦᔪᔨᕕᖏᓐᓄᑦ.

ᑕᒪᒃᑯᐊ ᐱᓇᓱᐊᑦᓭᑦ ᖁᓛᒍᑦ, ᑖᓐᓇ ᐱᑦᔪᔨᕕᒃ ᐊᐅᓚᑦᓯᒥᔪᖅ KRG-ᑯᑦ ᐊᒻᒪᓗ ᑕᕐᕋᒥ ᓄᓇᓖᑦ ᓴᑑᑎᑦᓴᖃᕈᑎᖏᓐᓂᒃ. ᑲᒪᖃᑦᑕᕆᐊᓕᒃ ᐱᓪᓗᑯᒋᐊᓕᓐᓄᑦ ᐃᑲᔪᕐᓯᒪᓂᐅᑉ ᐱᓂᐊᕐᓂᖓᑕ ᐱᖁᔭᓕᕆᐅᑎᖏᓐᓂᒃ ᐊᒻᒪᓗ ᐊᐅᓚᑕᐅᓂᖓᓂᒃ ᐊᒻᒪᓗ ᑲᕙᒫᐱᓐᓂ ᑮᓇᐅᔭᓕᕆᓂᕐᒧᑦ ᐊᑦᑐᐊᓂᖓᓂᒃ. ᑖᓐᓇ ᐱᑦᔪᔨᕕᒃ ᑐᑭᒧᐊᑦᑎᓯᔪᖅ ᐱᓂᕐᓗᕈᑎᓂᒃ ᐊᐅᓚᑦᓯᔩᑦ ᐊᓪᓚᕕᖓᓂᒃ, ᓴᐳᒻᒥᔩᑦ ᐱᓂᕐᓗᕈᑎᓄᑦ ᐋᓐᓂᑕᐅᒪᔪᑦ ᐃᑲᔪᕐᑎᖏᑦᑕ ᐊᓪᓚᕕᖓᓂᒃ ᐊᒻᒪᓗ ᐃᓄᐃᑦ ᓄᓇᓕᖏᓐᓄᑦ ᐃᓚᒋᓕᐅᑎᒋᐊᑦᓯᐊᓂᕐᒥᒃ ᑲᒪᔨᓂᒃ. ᓱᓕᒋᐊᓪᓚᒃ, ᐃᓚᒋᔭᐅᒻᒥᔪᖅ ᐃᕐᖃᑐᐃᓂᓕᕆᓂᕐᒥᒃ ᐱᓇᓱᐊᖃᑎᒌᓄᑦ ᓄᓇᕕᒻᒥ

ᑖᓐᓇ ᐱᑦᔪᔨᕕᒃ ᐱᓇᓱᐊᖃᑕᐅᕗᖅ ᒪᑭᕝᕕᒧᑦ ᑲᔪᓯᓕᕐᑎᓯᖃᑎᒋᑦᓱᒋᑦ ᐃᓚᖏᓐᓂᒃ ᐃᓗᓕᕐᓂᒃ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒧᑦ ᐊᒻᒪᓗ, ᑌᒣᓕᐅᒥᔭᕐᓱᓂ, KRG-ᑯᑦ ᑲᑎᒪᔨᖏᓐᓄᑦ ᒪᓂᔨᓲᖑᕗᖅ ᑫᒥᑕᐅᖁᔭᒥᓂᒃ ᐱᖁᔦᑦ ᐋᕐᕿᒋᐊᕈᑎᑦᓴᖏᓐᓂᒃ, ᐱᓗᐊᕐᑐᒥᒃ ᐊᑦᑐᐊᑎᓪᓗᒋᑦ ᐱᖁᔭᒧᑦ ᐱᑦᔪᑎᓕᒻᒧᑦ ᑕᕐᕋᒥ ᓄᓇᓕᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᓂᐳᕐᑎᓯᓂᕐᓴᐅᖁᑦᓱᒍ ᓄᓇᕕᒻᒥᐅᓄᑦ ᑭᖕᖒᒪᓇᕐᑐᓂᒃ. ᑫᒥᑕᐅᖁᔨᒍᑎᖏᑦ ᐊᖏᕐᑕᐅᑐᐊᕐᒪᑕ ᑐᓂᔭᐅᓲᑦ ᑯᐯᒃᑯᑦ ᑲᕙᒪᖓᓄᑦ.

ᑖᑦᓱᒪ ᐱᑦᔪᔨᕕᐅᑉ ᑮᓇᐅᔭᖏᑦ ᐊᒧᓲᖑᕗᑦ ᐊᖏᖃᑎᒌᒍᑎᓂᒃ ᐊᑦᑐᐊᔪᓂᒃ ᐊᑦᔨᒌᖕᖏᑐᓄᑦ ᑲᕙᒣᑦ ᐱᑦᔪᔨᕕᖏᓐᓄᑦ ᐊᒻᒪᓗ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᒥᒃ), ᐊᒻᒪᓗ ᐊᐅᓚᑦᓯᓂᕐᒧᑦ ᐊᑭᓖᑎᑦᓯᒍᑎᓂᒃ KRG-ᑯᑦ ᐊᑭᓕᕐᑕᐅᑎᓲᖏᓐᓂᒃ ᐊᑐᕐᓱᑎᒃ ᐊᑦᔨᒌᑦᑎᖏᑦᑐᓂᒃ ᐊᖏᖃᑎᒌᒍᑎᓂᒃ ᑖᑦᓱᒪ ᑎᒥᐅᑉ ᑎᒍᒥᐊᕐᑕᖏᓐᓂᒃ ᑕᒪᖏᓐᓂ ᖁᓪᓕᕇᓐᓂ ᑲᕙᒫᓐᓂ.