ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑮᓇᐅᔭᖃᐅᑎ

ᑮᓇᐅᔭᓕᕆᔨᐅᑉ ᐱᓇᓱᐊᑦᓴᖏᑦ, ᑖᓐᓇᓗ ᑎᒡᒍᐊᑕᐅᓲᖑᑦᓱᓂ KRG-ᑯᑦ ᑲᑎᒪᔨᖏᓐᓄᑦ, ᐅᖃᕐᑕᐅᕗᑦ ᐃᓚᖏᓐᓂ 308-ᒥᒃ ᐱᒋᐊᕐᓱᒍ 314-ᒧᑦ ᑎᑭᑦᓱᒍ ᐱᖁᔭᒥ ᐱᑦᔪᑎᓕᒻᒥ ᑕᕐᕋᒥᐅᑦ ᓄᓇᓕᖏᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ. ᐅᖃᑦᓯᐊᓗᒍ, ᑮᓇᐅᔭᓕᕆᔨ ᓴᖑᐊᑦᓯᔨᐅᕗᖅ KRG-ᑯᑦ ᑮᓇᐅᔭᖃᐅᑎᖓᓂᒃ, ᑎᒍᓚᔨᐅᑦᓱᓂ ᑮᓇᐅᔭᓕᒫᓂᒃ ᐊᑭᓕᕆᐊᓕᓐᓂᒃ KRG-ᑯᓄᑦ ᐊᒻᒪᓗ, ᒪᓕᒐᖃᕐᓱᓂ ᐊᓯᓕᒫᖏᓐᓂᒃ ᐱᖁᔭᑎᒍᑦ ᐋᕐᕿᓯᒪᔪᓂᒃ, ᑐᕐᖁᐊᑎᕆᔨᐅᕗᖅ ᑕᒪᒃᑯᓂᖓ ᐱᖁᔭᕐᑎᒍᑦ ᑎᒥᖕᖑᑕᐅᓯᒪᔪᒧᑦ ᑮᓇᐅᔭᒃᑯᕕᒻᒧᑦ, ᑮᓇᐅᔭᓕᕆᓂᒃᑯᓘᓐᓃᑦ ᐱᑦᔪᔨᔩᑦ ᑲᑐᑦᔨᖃᑎᒌᖓᓄᑦ ᐅᕝᕙᓘᓐᓃᑦ ᐸᐸᑦᓯᔨᐅᑦᓱᓂ ᑎᒥᒧᑦ ᑲᑎᒪᔩᑦ ᑎᒡᒍᐊᑕᖓᓄᑦ ᑖᒃᑯᐊ ᑮᓇᐅᔦᑦ ᐊᑐᕐᑎᑕᐅᖕᖏᓂᖏᓐᓂ ᐊᑭᓕᕐᑕᐅᒍᑎᕕᓂᖏᓐᓄᑦ ᐅᕝᕙᓘᓐᓃᑦ ᐱᔭᐅᒍᑎᕕᓂᖏᓐᓄᑦ, ᐅᕝᕙᓘᓐᓃᑦ ᐊᑐᕐᑕᐅᖏᓐᓂᖏᓐᓂ ᑲᑎᒪᔨᓄᑦ. ᐅᓪᓗᐃᑦ 30 ᐃᓗᐊᓂ KRG-ᑯᓂ ᑮᓇᐅᔭᓕᕆᓂᐅᑉ ᐊᕐᕌᒍᖓ ᐃᓱᓕᓚᐅᕐᑎᓗᒍ, ᑮᓇᐅᔭᓕᕆᔨ ᐋᕐᖀᓲᖑᕗᖅ ᑕᒻᒪᓯᒪᔪᕐᓯᐅᓯᒪᔪᓂᒃ ᑮᓇᐅᔭᓕᕆᐅᑏᑦ ᐅᖃᕈᑎᖏᓐᓂᒃ ᐱᓇᓱᖃᑎᖃᕐᓱᓂ ᐃᒻᒥᒎᕐᑐᒥᒃ ᑕᒻᒪᓯᒪᔪᕐᓯᐅᑏᑦ ᑎᒥᖓᓂᒃ. ᑕᒪᒃᑯᐊ ᐱᑦᔪᑕᐅᑎᓪᓗᒋᑦ ᐊᒻᒪᓗ ᐱᓇᓱᖃᑎᖃᕐᓱᓂ ᐃᓘᓐᓈᒍᑦ ᑐᑭᒧᐊᑦᑎᓯᔨᒻᒪᕆᒻᒥᒃ, ᐊᓯᖏᑕᓗ ᐱᑦᔪᔨᕖᑦ ᑐᑭᒧᐊᑦᑎᓯᔨᖏᓐᓂᒃ ᐊᒻᒪᓗ ᐳᕐᑐᓂᕐᓴᓂᒃ ᑲᑎᒪᔨᓂᒃ, ᑮᓇᐅᔭᓕᕆᔨ ᓇᑉᐸᑎᕆᔨᐅᕗᖅ ᒪᓂᑎᕆᔨᐅᑦᓱᓂᓗ ᑲᑎᒪᔨᓄᑦ ᑭᖑᓪᓕᖅ ᑮᓇᐅᔭᓕᕆᓂᐅᑉ ᐊᕐᕌᒍᖓ ᐱᒋᐊᖕᖏᓂᖓᓂ ᐊᕐᕌᒍᓕᒫᒥ ᑐᕌᒐᑦᓴᓂᒃ ᐊᒻᒪᓗ ᐊᑯᓓᑦᑐᒥᒃ ᑲᒪᓇᓱᑦᑎᐅᕗᖅ ᑎᒥᐅᑉ ᑮᓇᐅᔭᑎᒍᑦ ᖃᓄᐃᓕᖓᓂᖓᓂᒃ ᑕᒪᓐᓇ ᒥᓇᕈᑎᒋᓲᕆᑦᓱᒍ ᑲᑎᒪᔨᓄᑦ, ᐳᕐᑐᓂᕐᓴᓄᓪᓗ ᑲᑎᒪᔨᓄᑦ, ᐃᓘᓐᓈᒍᑦ ᑐᑭᒧᐊᑦᑎᓯᔨᒧᑦ ᐊᒻᒪᓗ ᐱᑦᔪᔨᕖᑦ ᑐᑭᒧᐊᑦᑎᓯᔨᖏᓐᓄᑦ.