ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐃᓗᓐᓈᒍᑦ ᑐᑭᓯᒪᒐᑦᓴᐃᑦ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG) ᐱᙳᑎᑕᐅᓯᒪᕗᖅ 1978-ᒥ ᒪᓕᑦᓱᓂ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᒥᒃ ᓄᐃᑕᑦᓯᔪᑦᓴᐅᓱᓂ ᐃᓄᓕᒫᓂᒃ ᐱᑦᔪᔨᒍᑎᓂᒃ ᓄᓇᕕᒻᒥᐅᓄᑦ. ᐊᒥᓱᑦ KRG-ᑯᑦ ᑲᒪᒋᒋᐊᓕᖏᑦ ᐅᖃᕐᑕᐅᓯᒪᔪᑦ ᐱᖁᔭᒥ ᐱᑦᔪᑎᓕᒻᒥ ᐅᑭᐅᕐᑕᑐᒥᐅᑦ ᓄᓇᓕᖏᓐᓂᒃ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᑲᑎᕕᐅᑉ ᐱᖁᔭᖓᓂ). ᐊᓯᐊᒍᑦ ᑎᓕᔭᐅᒪᒍᑎᒋᐊᓪᓚᖏᑦ ᑐᓂᓯᒪᒻᒥᔪᑦ KRG-ᒧᑦ ᑕᒫᓂ ᓄᓇᒥ ᑲᕙᒪᐱᓐᓂᒃ ᐊᒻᒪᓗ ᑯᐯᒃᑯᑦ ᑲᕙᒪᖓᓂᒃ. ᐱᑦᔪᔨᐅᑏᑦ KRG-ᑯᑦ ᐅᓪᓗᒥᐅᑎᓪᓗᒍ ᐱᓇᓱᐊᕐᐸᑕᖏᑦ ᒪᑯᓂᖓ ᐃᓚᓖᑦ:

•    ᒥᕝᕕᓂᒃ ᐊᐅᓚᑦᓯᓂᖅ ᐊᒻᒪᓗ ᑕᕆᐅᒥ ᓇᑉᐸᑎᕐᓯᒪᔪᓂᒃ ᒪᑭᑕᑦᓯᓂᖅ.
•    ᓄᓇᓕᒫᓂ ᐊᒻᒪᓗ ᓄᓇᓕᓐᓂ ᒪᑭᑕᐅᑎᓂᒃ ᐱᕙᓪᓕᐊᓂᖅ, ᐊᒻᒪᓗ ᑮᓇᐅᔭᓕᐅᕐᑎᓂᒃ ᐱᕙᓪᓕᐊᓂᖅ.
•    ᐳᓖᓯᖃᕐᑎᓯᓂᖅ ᐊᒻᒪᓗ ᐃᓄᓐᓂᒃ ᐊᑦᑕᓇᕐᑐᒦᑎᑦᓯᑌᓕᓂᖅ.
•    ᐱᓂᕐᓘᑎᓄᑦ ᐋᓐᓂᑕᐅᒪᔪᓂᒃ ᐃᑲᔪᕐᓯᒪᓂᖅ.
•    ᐃᓄᐃᑦ ᐆᒪᔪᕐᓂᐊᓂᖏᓐᓂᒃ, ᐃᖃᓗᓐᓂᐊᓂᖏᓐᓂᒃ ᐊᒻᒪᓗ ᒥᑭᒋᐊᕐᓂᐊᓂᖏᓐᓂᒃ ᓴᐳᒻᒥᓂᖅ, ᐆᒪᔪᓄᓪᓗ ᐊᕐᖃᓓᓐᓂᖅ.
•    ᐊᕙᑎᒥᒃ ᐊᒻᒪᓗ ᓯᓚᐅᑉ ᐊᓯᑦᔨᐸᓪᓕᐊᓂᖓᓂᒃ ᖃᐅᔨᓴᕐᓂᖅ.
•    ᒥᕐᖑᐃᓯᕐᕕᓂᒃ ᐱᕙᓪᓕᐊᓂᖅ ᐊᒻᒪᓗ ᐊᐅᓚᑦᓯᓂᖅ.
•    ᐱᓇᓱᒐᓕᕆᓂᖅ, ᐱᒋᐅᕐᓴᐅᑎᓕᕆᓂᖅ ᐊᒻᒪᓗ ᑮᓇᐅᔭᕐᑖᓂᒃᑯᑦ ᓴᐳᒻᒥᓯᓂᖅ.
•    ᐱᐊᕋᓕᕆᓂᒃᑯᑦ ᐱᑦᔪᔨᐅᑏᑦ.
•    ᑲᕙᒫᐲᑦ ᓇᑉᐸᑎᕐᓯᒪᔪᖏᓐᓂᒃ ᐱᕙᓪᓕᐊᓂᖅ ᐊᒻᒪᓗ ᐃᒪᑦᓯᐊᑐᕐᑕᐅᔪᒥᒃ ᐸᐸᑦᓯᓂᖅ.
•    ᖃᕆᑕᐅᔦᑦ ᐱᑑᕕᖓᓄᑦ ᐊᒻᒪᓂᖅ.
•    ᐱᙳᐊᓂᖅ ᐊᒻᒪᓗ ᓱᖃᑦᓯᓂᖅ.

KRG-ᑯᑦ ᐊᖏᔫᒻᒥᑎᓪᓗᒍ ᐱᔭᑦᓴᖃᕐᒥᔪᑦ ᒪᓂᑎᕆᓂᕐᒥᒃ ᐱᓪᓗᑯᑦᑐᑎᒍᑦ ᐃᑲᔪᕐᓯᒪᓂᕐᒥᒃ 14-ᓄᑦ ᐅᑭᐅᕐᑕᑐᒥᐅᑦ ᓄᓇᓕᖏᓐᓄᑦ ᐊᑦᑐᐊᓱᑎᒃ ᐊᐅᓚᑦᓯᓂᕐᒧᑦ ᐊᒻᒪᓗ ᑳᕙᒪᐱᒃᑯᑦ ᑮᓇᐅᔭᓕᕆᓂᓂᖏᓐᓄᑦ, ᓄᓇᐅᑉ ᐊᑐᕐᓂᓴᖏᓐᓂᒃ ᐸᕐᓇᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᓯᓂᕐᒧᑦ, ᐱᖁᔭᓕᕆᓂᕐᒧᑦ, ᓴᓇᒻᒪᓂᓕᕆᓂᕐᒧᑦ ᐊᒻᒪᓗ ᐃᓄᓕᒫᓂᒃ ᐅᓯᒍᑎᓕᕆᓂᕐᒧᑦ, ᐱᓇᓱᐊᒉᑦ ᐃᓓᓐᓇᖏᐅᓐᓃᑦ ᐅᖃᕐᓗᒋᑦ.

2003-ᒥ, KRG-ᑯᑦ ᑎᒡᒍᐊᑕᐅᓚᐅᕐᓯᒪᔪᑦ, ᐊᑐᕐᓱᒍ ᐱᖁᔭᖅ ᐱᑦᔪᑎᓕᒃ ᒥᓂᔅᑕᒥᒃ ᓄᓇᓕᓐᓄᑦ, ᓄᓇᖁᑎᓄᑦ ᐊᒻᒪᓗ ᓄᓇᐅᑉ ᓇᔪᕐᑕᐅᓂᖓᓄᑦ, ᓄᓇᓕᓕᒫᓄᑦ ᑲᑎᑦᑕᐅᕕᐅᓂᐊᓕᕐᓱᑎᒃ ᓂᕈᐊᕐᑕᐅᒪᔪᓄᑦ ᐊᖓᔪᖅᑳᓄᑦ ᑲᑎᕕᐅᑉ ᓄᓇᖓᓂ. ᑕᒪᑐᒨᓇ ᐊᑑᑎᒥᒍᑦ, ᑖᒃᑯᐊᓚᕆᐅᔪᑦ ᑭᒡᒐᕆᔭᐅᑦᓱᑎᒃ ᑯᐯᒃ ᑲᕙᒪᖓᓄᑦ ᐊᒻᒪᓗ ᐃᓕᑕᕆᔭᐅᑦᓱᑎᒃ ᐊᑐᕐᑐᒪᕆᒻᒥᒃ ᐃᑲᔪᕐᓯᔨᐅᒋᐊᖏᑦ ᓄᓇᓕᓕᒫᓂ ᐱᕙᓪᓕᐊᒍᑏᑦ ᐱᓇᓱᑦᑕᐅᒍᑎᖏᓐᓂᒃ.

KRG-ᑯᑦ ᐊᐅᓚᑦᓯᓲᑦ ᐊᓪᓚᕕᒻᒪᕆᒻᒥᒃ, ᑐᑦᑕᕕᖓᓂᓪᓗ ᑲᑎᕕᒃ ᓄᓇᓕᓕᒫᑦ ᐳᓖᓯᒃᑯᖏᑕ (KRPF) ᐊᒻᒪᓗ ᒥᕝᕕᒥᒃ ᐊᑐᓂ ᓄᓇᓕᒻᒥ. ᐊᕐᕌᒍᑕᒫᕐᓯᐅᑎᓂᒃ ᑐᕌᒐᖃᓲᖅ $200 ᒥᓕᐊᓐ ᐅᖓᑖᓃᓕᕐᑐᓂᒃ. ᑖᒃᑯᐊ ᑮᓇᐅᔦᑦ ᑎᒍᓲᖏᑦ ᐊᑐᕐᓱᑎᒃ 40 ᐅᖓᑖᓃᑦᑐᓂᒃ ᐃᓕᒃᑰᕈᑎᔪᓂᒃ ᐊᖏᖃᑎᒌᒍᑎᓂᒃ, ᐃᓚᒋᔭᐅᑎᓪᓗᒍ ᐊᖏᖃᑎᒌᓐᓂᖅ ᐱᑦᔪᑎᓕᒃ ᐃᓗᐃᒃᑲᓂᒃ ᑮᓇᐅᔭᕐᑖᑎᑦᓯᓂᕐᒥᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ (ᓯᕗᓂᕐᒧᑦ ᐊᖏᖃᑎᒌᓐᓂᖅ).

KRG-ᑯᑦ ᓯᕗᓕᕐᑕᐅᔪᑦ 17-ᓂᒃ ᐃᓄᓕᓐᓄᑦ ᑲᑎᒪᔨᓄᑦ ᑖᒃᑯᐊ ᑕᖏᖃᕐᑎᑕᐅᑎᓪᓗᒋᑦ ᓂᕈᐊᕐᑕᐅᒪᔪᓄᑦ ᑲᕙᒫᐱᓐᓂ ᐊᖓᔪᕐᖃᐅᓂᕐᒧᑦ ᐊᑐᓂ ᐅᑭᐅᕐᑕᑐᒥᐅᑦ ᓄᓇᓕᖏᓐᓂᒃ ᑎᒡᒍᐊᑕᐅᓯᒪᑦᓱᑎᒃ ᐊᒻᒪᓗ ᓇᔅᑳᐲᑦ ᓄᓇᓕᑐᖃᑦᓴᔦᑦ ᑲᑎᒪᔨᒃᑯᖏᓐᓂᒃ ᑳᒍᐊᒍᐊᑦᓯᑲᒪᑦᔅᒥ. ᑕᓪᓕᒣᓂᒃ ᐃᓄᓕᓐᓂᒃ ᐳᕐᑐᓂᕐᓴᓂᒃ ᑲᑎᒪᔨᓕᒃ ᑎᒡᒍᐊᑕᐅᓲᓂᒃ ᑖᒃᑯᐊ ᐃᒻᒧᐊᓂᒃ ᐊᒻᒪᓗ ᑖᒃᑯᓄᖓ ᑲᑎᒪᔨᓄᑦ ᐊᐅᓚᑦᓯᔨᖃᕐᓱᑎᒃ ᐊᖓᔪᖅᑳᒪᕆᒻᒥᒃ ᐊᒻᒪᓗ ᐊᖓᔪᖅᑳᒪᕆᐅᑉ ᑐᖓᓕᐊᓂᒃ ᑖᒃᑯᐊ, ᒪᓕᓪᓗᒍ ᑲᑎᕕᐅᑉ ᐱᖁᔭᖓ, ᐱᓇᓱᓐᓂᓕᒫᒥᓂᒃ ᓵᙵᑎᑦᓯᒋᐊᖃᕐᑎᓗᒋᒃ ᐱᑦᔪᔨᓂᕐᒧᑦ KRG-ᒥᒃ. ᐳᕐᑐᓂᕐᓭᑦ ᑲᑎᒪᔩᑦ ᑲᒪᔨᐅᕗᑦ ᐊᐅᓚᑦᓯᓂᕐᒥᒃ KRG-ᑯᑦ ᓱᓂᓕᒫᖏᓐᓂᒃ ᐊᒻᒪᓗ ᓱᕐᖁᐃᑎᐅᑦᓱᑎᒃ ᑐᑭᑖᖑᓯᒪᔪᑦ ᑲᑎᒪᔨᓄᑦ ᑲᔪᓯᑎᑕᐅᓂᖏᓐᓂᒃ.

KRG-ᑯᑦ 10-ᓂᒃ ᐱᓇᓱᕝᕕᖁᑎᓖᑦ ᐊᒻᒪᓗ 400-ᓄᑦ ᖃᓂᑦᑐᓂᒃ ᐱᓇᓱᑦᑎᖃᕐᓱᑎᒃ. ᐃᓚᐅᑎᓐᓇᒋᑦ KRPF-ᑯᑦ ᐱᓇᓱᑦᑎᖏᑦ, 65%-ᑲᓴᖏᑦ ᑕᒡᒐᓂ ᑎᒥᒥ ᐱᓇᓱᑦᑏᑦ ᐃᓅᕗᑦ ᐊᒻᒪᓗ 44%-ᖏᑦ ᐊᕐᓇᐅᓱᑎᒃ. ᓱᓕᐅᒻᒥᔪᖅ, KRG-ᑯᑦ ᐱᓇᓱᑦᑎᓕᒫᖏᓐᓂ ᕿᑎᕐᖃᖏᑕ ᐅᖓᑖᓄᑦ ᐃᓂᖃᕐᒥᔪᑦ ᓄᓇᓕᓐᓂ ᑰᑦᔪᐊᑉ ᐊᓯᖏᓐᓂ, KRG-ᑯᑦ ᐊᓪᓚᕕᒻᒪᕆᖃᕐᕕᖓᑕ.

ᑲᑎᕕᐅᑉ ᓄᓇᖓ ᑯᐯᒃᒥ ᐅᑭᐅᕐᑕᓂᒻᒪᕆᐅᕗᖅ. ᐅᓕᐸᑳᕐᓯᔪᖅ 500,164-ᓂᒃ ᓯᒃᑭᑕᐅᓈᕐᓗᒋᑦ ᑭᓛᒥᑕᓂᒃ ᐊᖏᓂᓕᒻᒥᒃ ᓄᓇᒥᒃ 55 ᓴᓂᒧᑦ ᖁᓛᓃᑦᑐᒥᒃ. ᑕᒪᓐᓇ ᓄᓇ 14-ᓂᒃ ᓄᓇᓕᓕᒃ ᑲᑎᓕᒫᕐᓱᒋᑦ ᐃᓄᓕᓐᓂᒃ 11,000 ᒥᑦᓵᓃᑦᑐᓂᒃ. ᑰᑦᔪᐊᖅ ᓄᓇᓕᓐᓂ ᐊᖏᓂᕐᐸᐅᔪᖅ (ᐃᓄᖃᕐᓱᓂ 2300-ᑲᓵᓂᒃ) ᐊᒻᒪᓗ ᐊᐅᐸᓗᒃ ᓄᓇᓕᐊᕉᓂᕐᐸᐅᓱᓂ (200 ᒥᑦᓯᑎᓐᓄᑦ ᐃᓄᓕᒃ). ᐃᓄᐃᑦ ᓄᐃᑕᑦᓯᔪᑦ 91% ᐊᑖᓂᙱᑐᓂᒃ ᐃᓄᓕᒫᑦᓯᐊᑎᒍᑦ.

ᓄᓇᒃᑯᑦ ᐊᕐᖁᑎᓂᒃ ᑲᓱᕐᓂᓕᐅᕐᓯᒪᙱᑐᑦ ᓄᓇᓖᑦ ᐊᑯᓐᓂᖏᓐᓂ, ᓯᕿᓂᐅᕐᒥᐅᓄᓪᓘᓃᑦ ᑯᐯᒃᒥ. ᖃᖓᑦᑕᔫᒃᑯᑦ ᐅᑦᓯᔩᑦ ᓄᓇᓕᓐᓄᑦ ᐱᑐᑦᓯᒪᐅᑕᐅᔪᑦ ᐊᕐᕌᒍᓕᒫᑉ ᐃᓗᐊᓂ. ᐅᐱᕐᖔᒥ ᐅᒥᐊᕐᔪᐊᑯᑦ ᑎᑭᑦᑐᑦ ᓱᕐᖁᐃᕈᑕᐅᔪᑦ ᒪᓂᔭᐅᓂᖏᓐᓂᒃ ᐱᒋᐊᓖᑦ ᓱᒃᑯᕈᐊᙱᑐᑦ ᓂᖀᑦ ᐊᒻᒪᓗ ᐊᑐᕐᑐᓴᒐᓓᑦ. ᓄᓇᓕᓐᓂ, ᐃᓄᐃᑦ ᐊᑐᕐᑐᑦ ᓯᑭᑐᓂᒃ, ᓯᑕᒪᓕᐊᐱᓐᓂᒃ ᐊᒻᒪᓗ ᐊᐅᓚᐅᑎᓕᓐᓂᒃ ᐅᒥᐊᓂᒃ ᓂᕿᑦᓴᓂᒃ ᐆᒪᔪᕐᓯᐅᓂᕐᒧᑦ ᐊᒻᒪᓗ ᐃᖃᓗᓐᓂᐊᓂᕐᒧᑦ ᐱᓇᓲᑎᒋᑦᓱᒋᑦ.