ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐸᕐᓇᓯᒪᐅᑎᒃ

ᑎᒥᐅᔪᓕᒫᑦ ᑲᑎᒪᓂᖓᓂᑦ ᕕᑉᕗᐊᕆ 4, 5 ᐊᒻᒪᓗ 6, 2014

ᐊᖑᒻᒪᑎᑎᑦᓯᒋᐊᕈᑎᒃ--ᐊᑑᑎᖃᑎᐅᓪᓗᑐᒋᐊᓕᒃ ᐸᕐᓇᓯᒪᐅᑎᒥᒃ ᐱᓇᓱᐊᕐᓂᓄᑦ

ᓯᑉᑎᒻᐱᕆ 2012-ᒥ, ᑎᒥᐅᔪᓕᒫᑦ ᐊᖏᖃᑎᒌᒍᑎᓚᐅᔪᒻᒪᑕ ᑭᙴᒪᓇᕐᓂᖓᓂᒃ ᐸᕐᓇᓯᒪᐅᑎᒥᒃ ᖃᐅᔨᓴᕈᑎᓂᒃ ᐊᕐᕕᑕᕐᑐᖃᕆᐊᖃᕐᓂᖓᓂᒃ, ᑐᙵᕕᒋᓗᒋᑦ ᐸᕐᓂᖅ ᓄᓇᕕᒻᒥ ᐊᒻᒪᓗ ᐊᓯᖏᑦ ᓇᓗᕐᑕᐅᓯᒪᔪᑦ ᐱᓇᓱᐊᕐᑕᐅᔪᑦ, ᓇᓗᕐᓯᒍᑎᒋᒍᒪᒧᑦ ᓯᕗᓂᕐᒧᑦ ᑐᑭᒧᐊᕐᕕᒋᓗᒍ ᑕᐅᑐᕐᖂᑕᖃᕈᑎᒥᒃ ᓄᓇᓕᓕᒫᑦ ᐱᕙᓪᓕᐊᓂᖓᓅᓕᖓᔪᓂᒃ ᒪᓕᑦᓱᒋᑦ ᐃᓄᐃᑦ ᐃᓗᕐᕈᓯᖓᑦ, ᑭᓇᐅᓂᖓ, ᐅᖃᐅᓯᖓ, ᐱᐅᓯᑐᖃᕐᒥᒍᓪᓗ ᐃᓅᓯᖓ ᓴᐳᒻᒥᓯᓯᒪᒍᒪᒧᑦ ᐅᓪᓗᒥ ᐊᒻᒪᓗ ᐱᐅᓯᓕᐅᒥᒋᐊᓪᓚᑎᒻᒥᓗᒋᑦ ᓯᕗᓂᕐᒥ, ᐊᒻᒪᓗ ᓴᐳᑦᔨᓯᒪᓂᕐᒧᑦ ᐊᕙᑎᒥᒃ. 2012-ᒥ ᐅᑭᐊᑦᓴᐅᑎᓪᓗᒍ, ᐅᓂᒃᑳᑕᖃᕈᑎᓂᒃ ᑲᑎᒪᑦᓯᒍᑎᖃᖃᑦᑕᓚᐅᔪᔪᐃᑦ ᓄᓇᓕᓕᒫᓄᐊᖓᔪᓂᑦ ᑎᒥᐅᔪᓂᒃ ᐊᒻᒪᓗ, 2013-ᖑᑎᓪᓗᒍ, ᐅᓪᓗᓂᒃ-ᐱᖓᓱᓂᒃ ᑲᑎᒪᓂᐊᕈᓯᖃᕐᑎᓯᒍᑏᑦ ᐋᕐᕿᑕᐅᓯᒪᓚᐅᔪᑦᓱᑎᒃ ᐃᓘᓐᓇᖏᓐᓂᑦ ᓄᓇᕕᒻᒥ ᓄᓇᓕᓐᓂᑦ ᐊᒻᒪᓗ ᑲᑎᙵᑎᑕᐅᒻᒥᓱᑎᒃ ᐃᓄᐃᑦ ᓯᓵᓯᐱᒥᐅᑦ ᒪᓐᑐᕆᐊᓪᒥᐅᓪᓗ. ᑐᑭᓯᒪᑎᑦᓯᒍᑎᓂᒃ ᑲᑎᙵᑎᑦᓯᓚᐅᔪᒻᒥᔪᑦ ᑳᒍᐊᒍᐊᑦᓯᑲᒫᒃᒥ.

ᐃᓘᓐᓇᖏᓐᓂᑦ ᓄᓇᓕᓐᓂ ᓯᕗᓕᕐᑎᖏᑦ ᑲᑎᒪᖃᑎᐅᓪᓗᑐᕐᓱᑎᒃ ᐃᓚᐅᖃᑦᑕᓚᐅᔪᕗᑦ ᐸᕐᓇᓯᒪᐅᑎᒥᒃ ᑲᑎᒪᑎᑦᓯᒍᑎᖃᕐᑎᓗᒋᑦ ᐱᓇᓱᐊᕐᑎᓗᒋᓪᓗ, ᐊᒥᓱᒋᐊᓪᑦ ᓄᓇᕕᒻᒥᐅᑦ ᐃᓱᒪᒋᔭᒥᓂᒃ ᐆᒃᑐᕋᑦᓴᐅᔪᕆᔭᒥᓂᓪᓗ ᐅᖃᐅᓯᖃᓚᐅᔪᔪᑦ, ᐊᒻᒪᓗ ᓄᓇᓕᒻᒦᑐᓕᒫᑦ ᓈᓚᖃᑦᑕᓚᐅᔪᔪᐃᑦ ᖃᓄᐃᓘᕐᓂᖏᓐᓂᒃ ᐱᓇᓱᕝᕕᒥᓃᑦᓱᑎᒃ ᐊᓂᕐᕋᓯᒪᑦᓱᑎᓪᓘᓃᑦ ᓄᓇᓕᐅᑉ ᑐᓴᐅᑎᖓᒍᑦ ᓂᑦᔮᑎᑕᐅᑎᓪᓗᒋᑦ. ᓈᓚᒋᐊᕐᓯᒪᔪᓂᒃ ᐅᖃᐅᓯᐅᔪᐃᑦ ᑲᑎᒪᑎᑦᓯᖃᑦᑕᑎᓪᓗᒋᑦ ᑲᑎᕐᓱᑕᐅᓯᒪᓕᕐᑐᑦ ᐊᒻᒪᓗ ᐊᑐᐃᓐᓇᕈᐃᒍᑎᐅᓚᖓᑦᓱᑎᒃ ᑭᖑᓪᓕᐹᖓᓂᒃ ᐸᕐᓇᓯᒪᐅᑎᒥᒃ ᑐᓴᕐᑎᓯᒍᑎᓕᐊᖑᓛᕐᑐᓂᒃ, ᓐᓇᓗ ᐸᕐᓂᖅ ᓄᓇᕕᒻᒥ ᐃᓚᒋᔭᐅᓪᓗᑐᓚᖓᒻᒥᓱᓂ ᑖᒃᑯᓄᖓ.

ᖃᓄᐃᙱᓯᐊᕐᓂᐅᑉ ᐊᒻᒪᓗ ᓄᑕᐅᓯᓕᕐᓂᓄᑦ ᖃᓄᐃᓕᖓᓂᕆᒋᐊᓕᖏᑦ

ᑰᒃᔪᐊᒥ ᑕᒡᒐᓂ ᐱᓇᓱᐊᕈᓯᕐᒥ, ᓯᕗᓕᕐᑎᖏᑦ ᐅᑯᐊ ᒪᑭᕝᕕᒃ ᑯᐊᐳᕇᓴᓐ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ, ᑲᑎᕕᒃ ᐃᓕᓐᓂᐊᓂᓕᕆᓂᖅ, ᓄᓇᕕᒃ ᓄᓇᓕᓕᒫᑦ ᑲᑎᒪᔨᖏᑦ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᓂᕐᓄᑦ, ᓄᓇᕕᒻᒥ ᓄᓇᒥ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓ, ᐊᕙᑕᖅ ᐱᐅᓯᑐᖃᓕᕆᕕᒃ, ᓄᓇᕕᒻᒥ ᐃᓄᑐᑦ ᑲᑐᑦᔨᖃᑎᒌᓐᓂᖓ. ᓴᑐᕐᕖᑦ ᐊᕐᑦ ᑲᑐᑦᔨᖃᑎᒌᓐᓂᖓ, ᑕᕐᕋᒥᐅᑦ ᓂᐱᖓᑦ ᑎᒥᖁᑎᖓ, ᐊᖑᕕᒐᒃ ᐆᒻᒪᔪᕐᓂᐊᓂᕐᒧᑦ, ᐃᖃᓗᓐᓂᐊᓂᕐᒧᑦ ᒥᑭᒋᐊᕐᓂᐊᓂᕐᒧᓗ ᑲᑐᑦᔨᖃᑎᒌᓐᓂᖓ, ᓴᐳᑏᑦ ᐃᓅᓱᑦᑐᐃᑦ ᑲᑐᑦᔨᖃᑎᒌᓐᓂᖓ, ᓄᓇᕕᒻᒥ ᐃᓅᓱᑦᑐᐃᑦ ᐃᓪᓗᖏᓐᓄᑦ ᑲᑐᑦᔨᖃᑎᒌᓐᓂᖅ, ᑲᑎᕕᒃ ᓄᓇᓕᓕᒫᑦ ᐃᓪᓗᓕᕆᓂᕐᒧᑦ ᐊᒡᓚᕕᒻᒪᕆᖓ, ᓄᓇᕕᒻᒥ ᐅᔭᕋᓐᓂᐊᕋᑦᓴᓯᐅᕐᓂᒧᑦ ᑮᓇᐅᔭᖁᑎᖓ ᐊᒻᒪᓗ ᐃᓚᒌᓴᒃᑯᑦ ᑯᐊᑦ ᑲᑐᑦᔨᖃᑎᒌᓐᓂᖓ ᑲᑎᙵᓚᐅᔪᒻᒪᑕ ᐸᕐᓇᓯᒪᐅᑎᒃ ᐱᓇᓱᐊᕈᑎᐅᔪᕕᓂᐅᑎᓪᓗᒍ ᖃᓄᐃᓘᕆᐊᒍᑎᑦᓴᐅᔪᕆᓕᕐᑕᒥᓂᒃ ᐅᖄᒍᑎᖃᕐᓱᑎᒃ. ᐸᕐᓇᓯᒪᐅᑎᒃ ᖃᐅᔨᓴᕐᓂᒥᒃ ᑲᑎᙵᑎᑦᓯᓃᑦ ᐊᑐᕐᓂᖃᓚᐅᔪᕗᑦ, ᓄᓇᕕᒻᒥ ᐃᓄᐃᑦ ᐱᒍᓐᓇᕕᕐᑖᑎᑦᓱᒋᑦ ᐅᖃᐅᓯᖃᕐᓂᒥᒃ ᐃᓱᒪᒋᔭᕐᒥᓂᒃ ᐊᒥᓱᐃᓕᕐᕿᖓᔪᓂᒃ ᐊᑑᑎᓕᕐᑎᑕᐅᒋᐊᖃᓚᖓᔪᓂᒃ ᑐᙵᕕᓕᕈᑎᐅᓗᑎᒃ ᓄᓇᓕᓕᒫᓂ ᖃᓄᐃᙱᓯᐊᕐᓂᕆᓂᐊᕐᑕᖏᓐᓄᑦ, ᐊᒻᒪᓗ ᐋᕐᕿᓱᐃᒍᑎᐅᓗᑎᒃ ᖃᓄᐃᓕᖓᓂᕆᓂᐊᕐᑕᖏᓐᓂᒃ ᓄᑕᐅᓯᓕᕈᑎᐅᓂᐊᕐᑐᐃᑦ ᓄᓇᕕᐅᑉ ᐱᓇᓱᐊᖃᑎᖃᕈᓐᓇᓂᖓᓂᒃ ᑲᓇᑕᒥᒃ, ᑯᒻᒥᒃ ᐊᒻᒪᓗ ᐱᓇᓱᐊᕐᓂᒪᕆᑎᒍᑦ ᐱᕙᓪᓕᐊᓂᐊᕐᑐᓂᒃ ᐃᓱᒪᒋᓗᒋᑦ ᐊᑯᓂᐅᓕᕐᑐᖅ-ᐱᒍᒪᓯᒪᓕᕐᑕᖏᑦ ᓄᓇᕕᒻᒥ ᐃᓄᐃᑦ ᐃᒻᒥᓂᕐᓱᒍᓐᓇᓯᒍᒪᓂᕆᓲᕆᓕᕐᑕᒥᓄᑦ.

ᓄᓇᓕᓕᒫᓂᑦ ᑎᒥᐅᔪᐃᑦ ᓯᕗᓕᕐᑎᖏᑦ ᐅᖃᓚᐅᕐᒥᔪᑦ ᐱᒍᒪᓪᓚᕆᓐᓂᒥᓂ ᐊᐅᓚᑦᔭᕆᐊᕈᑎᒋᓪᓗᑐᕈᒪᑦᓱᒋᑦ ᓴᐳᒻᒥᓯᒍᑎᐅᒐᔭᕐᑐᓂᒃ ᐊᓯᐅᑐᐃᓐᓇᓕᑎᑦᓯᒍᑎᐅᒐᔭᕐᑐᓂᓪᓗ ᐃᓄᒃᑎᑑᕐᑐᒥᒃ ᐅᖃᐅᓯᕐᒥᒃ, ᐊᒻᒪᓗ ᓴᐳᒻᒥᓯᑦᓱᑎᒃ ᐃᓕᑕᕆᔭᐅᓂᓕᐅᑉ ᐃᓄᒃᑎᑐᑦ ᐅᖃᐅᓯᓕᕆᓂᐅᑉ ᐊᐅᓚᑦᓯᕕᒻᒪᕆᑦᑕᓴᖓᑕ ᓄᐃᑕᐅᒋᐊᖃᕐᓂᖓᓂᒃ.

ᐱᓇᓱᐊᕐᑕᐅᒋᐊᖃᓚᖓᓕᕐᒥᔪᑦ

ᑐᑭᓯᒪᖃᑎᒌᒍᑎᐅᓗᓂ ᓱᓇᒥᑦᓯᔪᒥᒃ ᑕᐅᑐᕐᖂᑕᖃᕈᑎᒥᒃ ᓄᓇᓕᓕᒫᓂ ᐱᕙᓪᓕᐊᑎᑦᓯᓂᕐᒧᑦ ᐱᔭᕇᕐᑕᐅᒍᓐᓇᓯᖁᓗᒍ, ᒪᑯᐊ ᐱᓇᓱᐊᕐᑕᐅᒋᐊᓚᖓᓕᕐᒥᔪᐃᑦ:

  • ᓄᓇᓕᓕᒫᑎᒍᑦ-ᑐᓴᕐᓴᐅᓗᑎᒃ ᓈᓚᐅᑎᒃᑯᑦ ᐅᖄᓚᑲᑦᑕᑎᑦᓯᓗᑎᒃ ᑕᕐᕋᒥᐅᑦ ᓂᐱᖓᑦ ᐊᕐᖁᑎᒋᓗᒍ ᖃᐅᔨᒐᓱᐊᕐᓗᓂ ᐋᒥᑕᐅᓗᐊᕐᓯᒪᔪᓂᒃ ᐅᖃᕐᑕᐅᖏᓗᐊᕐᓯᒪᔪᓂᓘᓐᓃᑦ ᐃᓚᒋᔭᐅᒋᐊᖃᕐᓱᑎᒃ ᑕᐅᑐᕐᖂᑕᖃᕈᓯᕐᒥᑦ ᓄᓇᓕᓕᒫᓂ ᐱᕙᓪᓕᐊᑎᑦᓯᓂᕐᒧᑦ ᐊᒻᒪᓗ ᓄᐊᑦᓯᒥᓪᓗᑎᒃ ᐃᓱᒪᒋᔭᐅᔪᓂᒃ ᓯᕗᓪᓕᐸᐅᑦᔭᐅᒋᐊᖃᕐᑐᕆᔭᐅᔪᓂᒃ (ᕕᑉᕗᐊᕆ).
  • ᐃᓅᓱᑦᑐᐃᑦ ᑲᑎᒪᓂᒻᒪᕆᖓᓂ ᐳᑯᕝᕕᒋᓗᒋᑦ ᐃᓱᒪᒋᔭᐅᔪᓂᒃ ᓯᕗᓪᓕᐸᐅᑦᔭᐅᒋᐊᖃᕐᑐᕆᔭᖏᓐᓂᒃ ᑕᐅᑐᕐᖂᑕᖃᕈᑎᐅᔪᓂᒃ ᓄᓇᓕᓕᒫᓂ ᐱᕙᓪᓕᐊᑎᑦᓯᓂᕐᒧᑦ (ᒫᑦᔨ)
  • ᐊᖑᒻᒪᑎᑎᑦᓯᒋᐊᕈᑎᒃ ᒪᓂᔭᐅᔪᓂᒃ ᓯᕗᓪᓕᐸᐅᑦᔭᐅᒋᐊᖃᕐᑐᖁᑎᒋᔭᐅᔪᓂᒃ ᑕᐅᑐᕐᖂᑕᖃᕈᑎᒥᒃ ᓄᓇᓕᓕᒫᓂ ᐱᕙᓪᓕᐊᑎᑦᓯᓂᕐᒧᑦ ᑐᓂᔭᐅᓛᕐᑎᓗᒋᑦ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᒪᓂᒻᒪᕆᖓᓂ ᒪᑭᕝᕕᒃ ᑯᐊᐳᕇᓴᒃᑯᑦ ᐊᒻᒪᓗ ᐃᓱᒪᒋᔭᐅᔪᐃᑦ ᐃᓚᐅᒻᒥᑎᓪᓗᒋᑦ (ᒫᑦᔨ)
  • ᑭᖑᓪᓕᐹᒥᒃ ᑐᓴᕐᑎᓯᒍᑎᓕᐊᖑᓛᕐᑑᑉ ᐊᑐᐃᓐᓇᕈᕐᑎᑕᐅᓂᖏᑦ ᐊᖏᕐᑕᐅᓂᖏᓪᓗ (ᕆᓕᒥᑦ ᓯᑉᑎᒻᐱᕆᒧᑦ).

ᐱᓇᓱᐊᖃᑎᒌᒍᑎᖃᕐᓂᖅ ᑲᔪᓯᒃᓂᕐᓗ

ᑕᒪᒃᑯᐊ ᑎᑭᐅᑎᒋᐊᕈᒪᓪᓗᒋᑦ, ᑲᑎᙵᓂᕐᒥ ᐃᓚᐅᔪᐃᑦ ᐊᖏᖃᑎᒌᒍᑎᓖᑦ ᐃᒫᒃ ᓄᓇᓕᓐᓂ ᑎᒥᐅᔪᐃᑦ ᑲᔪᓯᐅᑦᔨᒋᐊᖃᕐᒪᑕ ᐱᓇᓱᐊᖃᑎᒌᑦᓯᐊᓂᕐᒥᓂᒃ ᐸᕐᓇᓯᒪᐅᑎᒥᒃ ᐱᓇᓱᐊᕐᑕᐅᔪᓂᒃ, ᑲᔪᓯᒃᓗᑎᒃ, ᑎᓕᔨᒍᑎᒋᓗᒋᑦ ᐱᓇᓱᑦᑐᓴᓂᒃ ᒋᐊᖃᕐᐸᑦ, ᐊᒻᒪᓗ ᐃᑲᔪᕐᓯᓯᒪᓗᑎᒃ ᑮᓇᐅᔭᖃᕐᑎᓯᓂᒃᑯᑦ, ᐊᑐᓂ ᑎᒥᐅᔪᐃᑦ ᐱᒍᓐᓇᕕᒻᒥᓂᑎᒎᕐᓗᑎᒃ.