ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓄᓇᕕᒻᒥ ᖃᐅᒻᒪᕆᒃᑐᖅ ᐱᔪᒥᓇᕐᓯᒋᕗᖅ ᑌᔭᐅᔪᖅ “ᑕᕐᕋᒥ ᑐᓱᓐᓇᑐᖅ” ᐱᓕᐅᑦᔨᒍᑎ!

CPAWS-ᑯᑦ ᑯᐯᒻᒥ ᐱᓇᓱᐊᖃᑎᖏᓪᓗ, ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᖏᑦ (KRG), ᐃᓚᒌᓴᒃᑯᓪᓗ ᑯᐊᐸᒃᑯᑦ ᑯᐯᒻᒥ (FCNQ), ᐊᒻᒪᓗ ᕗᕐᔅ ᐃᐊᒃᑯᑦ ᖃᖓᑦᑕᔫᖏᑦ ᐊᓕᐊᑦᓱᑎᒃ ᐅᖃᐅᓯᖃᕈᒪᕗᑦ ᐅᓪᓗᒥ ᐱᔪᒥᓇᕐᑐᖁᑎᒥᓐᓂᒃ “ᑕᕐᕋᒥ ᑐᓱᓐᓇᑐᒥᒃ” ᐱᓕᐅᑦᔨᒍᑎ, ᓵᓚᖃᐅᓯᐊᕋᔭᕐᑐᖅ ᒪᕐᕉᓐᓄᑦ ᖃᖓᑦᑕᐅᑏᓐᓂᒃ ᐱᖑᐊᓗᓐᓄᑦ ᒥᕐᖑᐃᓯᖅᕕᒻᒧᑦ, ᐊᑭᖃᓪᓗᐊᕋᔭᕐᑎᓪᓗᒍ ᐃᒣᓪᓗᐊᑲᓵᑦᑐᓂᒃ $15,000.00!

ᓱᒻᒪᑦ ᐱᓕᐅᑦᔨᒍᑕᐅᕙ?
ᓯᓚᐅᑉ ᐊᓃᕈᒥᓇᕐᓂᖓ ᓄᓇᖓᓗ ᑕᑯᔪᒥᓇᕐᑑᓂᖓ, ᓄᓇᕕᒻᒥ ᐆᒪᔪᐊᕈᕐᓂᒃ ᕿᒥᕐᕈᕕᑦᓴᐅᑦᓱᓂ, ᐸᕝᕕᓴᑦᑕᐅᖁᔪᒥᓇᖏᑦᑑᑦᓱᓂ. “ᓄᓇᕕᒻᒥ ᑌᒣᓕᖓᔪᑐᖃᖅ ᓱᓇᑐᐃᓐᓇᓂᒃ ᕿᒥᕐᕈᔭᑦᓴᑕᓕᒃ, ᐊᒻᒪ ᐊᑦᔨᒌᖏᑦᑐᓄᑦ ᐱᓇᓱᐊᕐᕕᐅᕙᓪᓕᐊᑐᐃᓐᓇᓕᕐᓱᓂ ᐅᔭᕋᓐᓂᐊᕐᓂᐅᔪᓄᑦ, CPAWS-ᑯᑦ ᐃᑲᔪᖅᑐᒻᒪᕆᑉᐳᑦ ᐃᓄᐃᑦ ᐱᔪᒪᔭᖏᓐᓂᒃ ᓄᓇᓕᓐᓂ ᐱᓇᓱᐊᖃᑕᐅᔪᖃᖁᓪᓗᒍ ᑕᒪᒃᑯᓄᖓ ᓄᓇᓄᑦ ᓴᐳᒻᒥᔭᐅᒐᓱᐊᕐᑐᓄᑦ. ᐊᕙᑎᒥᐅᑕᕆᔭᑦᑕ ᐅᖓᑖᓄᑦ, ᐃᖅᑲᐅᒪᔭᕆᐊᖃᕐᐳᒍᑦ ᓱᓇᑐᐃᓐᓇᓂᒃ ᐊᑦᔨᒌᖏᑦᑐᓂᒃ ᕿᒥᕐᕈᔭᑦᓴᑕᖃᕐᓂᖅ ᐃᓗᕐᖁᓯᑐᖃᕐᓄᑦ ᑐᖕᖓᕕᓪᓚᕆᐅᒻᒪᑦ, ᐃᓅᓯᕆᔭᐅᑦᓱᓂᓗ, ᓂᕿᑦᓴᖃᕐᕕᓪᓚᕆᐅᓱᓂᓗ ᑕᒪᒃᑯᓄᖓ ᓄᓇᓕᓐᓄᑦ”, ᓇᓗᓀᕐᓯᓚᐅᕐᐳᖅ ᐹᑦᑐᕆᒃ ᓇᑑ, ᐳᕐᑐᓂᕐᓴᓂ ᑲᒪᔨᒻᒪᕆᐅᔪᖅ CPAWS-ᑯᓐᓄᑦ ᑯᐯᒻᒥ.
 
“ᓄᓇᕕᒻᒥ ᑕᑯᑦᓴᓪᓚᕆᐅᒻᒪᑦ ᐱᕙᓪᓕᐊᓂᖅ, ᓄᑖᓪᓗ ᐱᓇᓱᐊᕐᓂᐅᔪᑦ ᓄᐃᕙᓪᓕᐊᑦᓱᑎᒃ ᓄᓇᓕᓐᓂ », ᐅᖃᓚᐅᕐᐳᖅ ᓖᓴ ᖁᐱᕐᕈᐊᓗᒃ, ᐊᐅᓚᑦᓯᔨᓄᑦ ᐊᖓᔪᖅᑳᖑᔪᖅ, ᑐᓴᕈᑎᓕᕆᓂᕐᓄᑦ ᓇᐅᓕᒫᓄᓪᓗ ᐃᓚᐅᑎᑦᓯᓂᕐᓄᑦ ᐃᓚᒌᓴᒃᑯᓐᓂ. ᑲᔪᓯᑎᑕᐅᔪᓐᓇᓂᐊᕐᑐᓂᒃ ᐳᓚᕋᑦᑐᓕᕆᓂᕐᓂᒃ ᐱᕕᑦᓴᑖᕐᐸᓪᓕᐊᓂᖅ ᐊᖏᓕᕙᓪᓕᐊᒻᒪᑦ ᐱᔭᑦᓴᕈᕐᐸᓪᓕᐊᑦᓱᓂᓗ, ᑯᐊᐸᒃᑯᓪᓗ ᑐᔪᕐᒥᐅᕕᖁᑎᖏᑦ ᓯᓂᑦᑕᕖᑦ ᐊᑐᐃᓐᓇᐅᑦᓱᑎᒃ 13-ᓂ ᑕᕐᕋᒥ ᓄᓇᓕᓐᓂ. ᐊᒥᓲᒍᓐᓇᕕᓕᒫᖏᓐᓄᑦ ᐃᓄᓐᓂᒃ ᙯᖁᔨᕗᒍᑦ ᖃᐅᔨᓂᐊᕐᒪᑕ ᑕᕐᕋᒥ ᓄᓇᑦᑕ ᑕᑯᒥᓇᕐᑐᐊᓘᓂᖓᓂᒃ!”

ᑕᒪᓐᓇ ᐱᑦᔪᑎᒋᑦᓱᒍ – ᑯᐯᒻᒥᐅᓂᒃ ᐃᑲᔪᕋᓱᐊᕐᓱᑕ ᖃᐅᔨᑎᒐᓱᐊᕐᐸᕗᑦ ᓄᓇᕕᒻᒥᒃ, ᐃᒃᐱᒍᓱᓕᕐᑎᒐᓱᐊᕐᓱᒋᓪᓗ ᓄᓇᒥᒃ ᓱᒃᑯᑕᐅᑦᑌᓕᑎᑦᓯᓂᕐᒧᑦ ᑲᒪᑦᓯᕆᐊᖃᕐᓂᑦᑎᓐᓂᒃ ᐊᒻᒪᓗ ᑮᓇᐅᔭᑎᒍᑦ ᒪᑭᒪᒐᓱᐊᕆᐊᖃᕐᓂᑦᑎᓐᓂᒃ– ᑖᒃᑯᐊ CPAWS-ᑯᑦ ᑯᐯᒻᒥ ᐱᓇᓱᐊᖃᑎᖏᓪᓗ ᐃᓱᒪᓚᐅᕐᒪᑕ ᐋᖅᑭᓱᐃᒋᐊᖃᕐᑐᕆᑦᓱᑎᒃ ᑕᒪᑦᓱᒥᖓ “ᑕᕐᕋᒥ ᑐᓱᓐᓇᑐᒥᒃ” ᐱᓕᐅᑦᔨᑎᑦᓯᓂᕐᒥᒃ.

ᖃᓄᖅ ᐱᓇᓱᐊᖃᑕᐅᔪᓐᓇᐹᑦ
ᑯᐯᒻᒥ ᓄᓇᖃᕐᑐᓕᒫᑦ ᐱᓇᓱᐊᖃᑕᐅᔪᓐᓇᐳᑦ “ᑕᕐᕋᒥ ᑐᓱᓐᓇᑐᒥᒃ” ᐱᓕᐅᑦᔨᓂᕐᒧᑦ. ᐱᓇᓱᐊᖃᑕᐅᔪᑦ ᖃᕆᑕᐅᔭᑎᒍᑦ ᐱᑐᕝᕕᖃᕆᐊᖃᑐᐃᓐᓇᕋᔭᕐᑐᑦ ᐅᕗᖓ www.northerninspiration.ca ᓀᑦᑐᓂᒃ ᐊᓪᓚᓗᑎᒃ 1200 ᒥᑦᓵᓂ ᐊᓪᓚᓯᒪᔪᕐᑕᖃᕐᑎᓪᓗᒋᑦ, ᓇᓗᓀᕐᓯᓗᑎᒃ ᓱᒻᒪᑦ ᓄᓇᕕᒻᒧᐊᕈᒪᒻᒪᖔᑕ ᓱᒻᒪᓪᓗ ᓴᐳᒻᒥᒋᐊᖃᕐᒪᖔᑕ ᐆᒪᔪᐊᕈᕐᓂᒃ ᕿᒥᕐᕈᔭᐅᒍᓐᓇᑐᓂᒃ. ᐅᖃᐅᓯᐅᔪᑦ ᐊᓪᓚᑕᐅᔪᓐᓇᑐᑦ ᖃᓪᓗᓈᑎᑐᑦ ᐅᕝᕙᓗ ᒍᐃᒍᐃᑎᑐᑦ ᐅᕗᖓ ᐊᐅᓪᓚᑎᓪᓗᒋᑦ (www.lenordminspire.ca). ᐅᖃᐅᓯᐅᓯᒪᔪᓂᒃ ᐊᓪᓚᓯᒪᔪᓂᑦ ᐱᐅᓂᕐᐸᐅᔪᖅ ᓵᓚᖃᕋᔭᕐᑎᓪᓗᒍ ᐊᐅᓪᓚᕈᓐᓇᓯᓗᓂ, ᓂᕈᐊᕐᑕᐅᔪᖅ ᖃᐅᔨᓴᕐᑎᓄᑦ ᒪᑯᓂᖓ ᒪᓕᓪᓗᑎᒃ ᑐᖕᖓᕕᖃᕋᔭᕐᑐᑦ, ᐃᓱᒪᑖᑦᓯᐊᓇᕐᑐᓘᑎᒃ, ᐅᓂᒃᑲᐅᓯᓪᓚᕆᐅᓗᑎᒃ ᐃᓚᐅᕐᑐᑕᐅᓯᒪᖏᓪᓗᑎᒃ, ᐊᓪᓚᓯᒪᑦᓯᐊᕐᑑᓗᑎᒡᓗ.
 
“ᕗᕐᔅ ᐃᐊᒃᑯᑦ ᖃᖓᑦᑕᔫᖏᑦ ᐃᖏᕐᕋᓂᖏᓐᓂᒃ ᑲᒪᒐᔭᕐᑐᑦ ᓵᓚᖃᕐᑐᑦ ᐳᓛᕆᐊᕈᓐᓇᖁᓪᓗᒋᑦ ᐱᐅᔪᓪᓚᕆᐊᓗᒻᒥᒃ ᐱᖑᐊᓗᓐᓂᒃ ᒥᕐᖑᐃᓯᕐᕕᒻᒥᒃ. ᑕᕐᕋᒥ ᖃᖓᑦᑕᔫᕆᔭᐅᒐᒥᒃ, ᑕᒪᓐᓇ ᐱᕕᑦᓴᖃᕐᕕᒋᑦᓯᐊᕐᒥᒐᑦᑎᒍ ᖃᐅᔨᔭᐅᑎᑦᓯᔪᓐᓇᓗᑕ ᑐᓂᓯᒪᓪᓚᕆᓐᓂᑎᓐᓂᒃ ᐃᓅᓯᓕᕆᓂᕐᒧᑦ ᑲᒪᒋᔭᖃᓪᓚᕆᓐᓂᒥᒃ ᐊᒻᒪᓗ ᓯᕗᓕᕈᓐᓇᓂᑦᑎᓐᓂᒃ ᑕᕐᕋᒥ ᐃᖏᕐᕋᐅᑎᓕᕆᓂᕐᒧᑦ ᐱᒍᑦᔨᓂᕐᒧᑦ”, ᐅᖃᓚᐅᕐᐳᖅ ᓯᓕ ᑎ ᑲᕆᐊ, (Shelly De Caria), ᕗᕐᔅ ᐃᐊᒃᑯᑦ ᖃᖓᑦᑕᔪᓕᕆᔨᖏᑦᑕ ᐊᐅᓚᑦᓯᔨᖓ ᐱᓯᓇᓯᖃᕐᓂᒧᑦ ᐱᕙᓪᓕᐊᑎᑦᓯᓂᕐᒥ ᓄᓇᕕᒻᒥ.

ᑕᒪᓐᓇ ᐱᓕᐅᑦᔨᓂᖅ ᐅᒃᑯᐃᖓᓂᐊᕐᑐᖅ ᒣ 31, 2014 ᐅᓐᓄᐊᖓᓄᑦ ᕿᑎᕋᓕᕐᒧᑦ ᑎᑭᓪᓗᒍ. ᓵᓚᖃᕐᑐᖅ ᖃᐅᔨᔭᐅᑎᑕᐅᓛᕐᑐᖅ ᔫᓂ 2014-ᒥ, ᐅᑯᑎᒎᓇᖅ CPAWS-ᑯᑦ ᑯᐯᒻᒥ ᖃᕆᑕᐅᔭᖏᑦᑎᒍᑦ.

                                             - 30 -

CPAWS-ᑯᑦ (ᑲᓇᑕᒥᐅᑦ ᒥᕐᖑᐃᓯᕐᕕᓕᕆᔨᖏᑦ ᐊᒻᒪᓗ ᓄᓇᒧᑦ ᓱᕙᓪᓕᓯᒪᖏᑦᑐᓄᑦ ᐱᓇᓱᐊᖃᑎᒌᑦ) ᑲᓇᑕᒥ ᓂᐱᒋᔭᐅᕗᑦ ᓄᓇᓄᑦ ᓱᕙᓪᓕᑕᐅᓯᒪᖏᑦᑐᓄᑦ ᑖᒃᑯᑐᐊᕐᓗ ᑲᓇᑕᓕᒫᒥ ᐱᓇᓱᐊᕐᑎᐅᑦᓱᑎᒃ ᓄᓇᐅᑉ ᓴᐳᒻᒥᔭᐅᒋᐊᖃᕐᓂᖓᓄᑦ ᐊᖅᑯᑎᖃᕐᓱᑎᒃ ᑲᓇᑕᓕᒫᒥ ᓄᓇᐅᓪᓗ ᐊᕕᑦᓯᒪᓂᖏᓐᓂ ᒥᕐᖑᐃᓯᕐᕕᐅᔪᓂ ᐊᓯᖏᓐᓂᓗ ᓱᕙᓪᓕᑕᐅᓯᒪᖏᑦᑐᓂ ᓄᓇᓂ ᑲᒪᔨᐅᔪᓂᒃ. ᐱᒋᐊᕐᓯᒪᔪᑦ 1963-ᒥ, ᑕᓯᐅᕐᓯᓯᒪᓕᕐᐳᒍᑦ ᑲᓇᑕᐅᑉ ᓄᓇᖓᓂ ᓴᐳᒻᒥᔭᐅᒋᐊᖃᕐᓂᖏᓐᓄᑦ ᕿᑎᕐᖃᒥᑦ ᐊᖏᓂᕐᓴᐅᔪᒥᒃ 2/3-ᒥᑦ ᐊᖏᓂᕐᓴᒥᒃ. ᑲᓇᑕᓕᒫᒥ ᖁᓕᓪᓗ ᐱᖓᓱᓂᒃ 13-ᓂᒃ ᐊᕕᑦᑐᓯᒪᔪᖁᑎᖃᕐᓱᑕ, 60,000-ᓂᒃ ᐃᑲᔪᕐᑎᖃᕐᓱᑕ 100-ᓗᐊᕐᑐᓂᓪᓗ ᐃᒻᒥᓐᓂᒃ ᑐᓂᓯᒪᔪᓂᒃ ᐃᑲᔪᕐᑎᖃᕐᓱᑕ, CPAWS-ᑯᑦ ᐱᓇᓱᐊᖃᑎᖃᓲᖑᕗᑦ ᑲᕙᒪᒃᑯᓐᓂᒃ, ᓄᓇᓕᐅᔪᓂᒃ, ᐱᓇᓱᕝᕕᓪᓚᕆᐅᔪᓂᒃ ᓄᓇᖃᕐᖄᓯᒪᔪᓂᓪᓗ ᓴᐳᒻᒥᑦᓱᑕ ᓄᓇᑦᑎᓐᓂᒃ ᐱᐅᔪᐊᓗᓐᓂᒃ ᓱᕙᓪᓕᑕᐅᓯᒪᖏᑦᑐᓂᒃ ᑕᑯᒥᓇᕐᑐᔪᐊᓂᒃ ᐅᐸᒐᑦᓴᐅᔪᓂᒃ.

ᑖᒃᑯᐊ KRG-ᑯᑦ ᓇᐅᓕᒫᓄᑦ ᐱᒍᑦᔨᔨᐅᒻᒪᑕ ᐱᒋᐊᓚᐅᕐᓯᒪᔪᑦ 1978-ᖑᑎᓪᓗᒍ, ᔦᒥᔅ ᐯ ᑯᐯᓪᓗ ᑕᕐᕋᖓᓂ ᐊᖏᖃᑎᒌᓐᓂᖓᒍᑦ. ᑲᒪᒋᔭᖃᕐᓱᑎᒡᓗ ᑯᐯᒻᒥ ᓄᓇᐅᑉ 55 ᖁᓛᒍᑦ ᑎᑎᕐᓯᒪᓂᖓᓂ ᑲᕙᒫᐱᓕᕆᓂᕐᒥᒃ, ᐃᖏᕐᕋᐅᑎᓕᕆᓂᕐᒥᒃ, ᐊᕙᑎᒥᐅᑕᓕᕆᓂᕐᒥᒃ, ᐳᓖᓯᖃᕐᓂᒥᒃ, ᐱᓇᓱᑦᑐᓕᕆᓂᕐᒥᒃ, ᐱᓇᓱᑦᑏᓪᓗ ᐱᒋᐅᕐᓴᑎᑕᐅᓂᖏᓐᓂᒃ, ᑮᓇᐅᑦᔭᓵᖃᕐᓂᕐᒥᒃ, ᐯᕆᑦᓯᕕᓕᕆᓂᕐᒥᒃ, ᓄᑕᐅᓯᓕᕈᓐᓇᑐᓕᕆᓂᕐᒥᒃ, ᓄᓇᐅᓪᓗ ᐊᑐᕐᑕᐅᓂᖓᓄᑦ ᐸᕐᓀᓂᕐᒥᒃ, ᐃᓄᐃᓪᓗ ᐊᑦᑕᓇᖏᑦᑐᒦᒋᐊᖃᕐᓂᖏᓐᓂᒃ ᑮᓇᐅᔭᑎᒍᓪᓗ ᒪᑭᒪᒐᓱᐊᕐᓂᓕᕆᓂᕐᒥᒃ. ᐅᓪᓗᒥ, ᓄᓇᕕᒻᒥ ᒥᕐᖑᐃᓯᕐᕖᑦ ᐱᓇᓱᐊᖃᑦᑕᐳᑦ ᓴᐳᒻᒥᒐᓱᐊᕐᓱᑎᒃ ᑕᒪᒃᑯᓂᖓ ᑕᑯᔪᒥᓇᕐᑐᓂᒃ ᖃᐅᔨᒍᒥᓇᕐᑐᓂᓪᓗ ᐊᒻᒪᓗ ᑲᒪᒋᔭᖃᕐᓱᑎᒃ ᓄᓇᐅᑉ ᖃᕐᖃᖏᑕ ᐅᕕᖓᓂᖏᑦᑕ ᓴᕐᖃᖏᓐᓂᒃ ᐃᓄᓐᓄᑦ ᐱᓇᓱᐊᕐᕕᐅᓗᐊᕐᑎᑦᓯᑦᑌᓕᑦᓱᑎᒃ ᖃᐅᔨᓇᓱᐊᕐᕕᐅᓗᐊᕐᑎᑦᓯᑦᑌᓕᑦᓱᑎᓪᓗ. ᓴᐳᒻᒥᔭᐅᖁᔭᐅᓯᒪᔪᓂᒃ ᓄᓇᕕᒻᒥ ᒥᕐᖑᐃᓯᕐᕕᓕᕆᔨᐅᔪᓄᑦ ᑕᑯᓐᓇᓱᑎᒃ ᓄᓇᐅᑉ ᓱᒃᑯᑕᐅᑦᑌᓕᒋᐊᖃᕐᓂᖏᓐᓂᒃ ᐃᓕᓐᓂᐊᕈᑎᑦᓴᐅᔪᓐᓇᑐᓂᒃ ᓱᖃᑦᓯᓂᕐᒨᓕᖓᔪᓄᓪᓗ ᐱᓇᓱᐊᕐᕕᐅᔪᓐᓇᑐᓄᑦ ᓄᓇᕕᒻᒥᐅᓄᑦ ᓂᐅᕈᖃᑦᑕᑐᓄᓪᓗ ᓇᑭᑐᐃᓐᓇᓕᒫᖅ ᓄᓇᕐᔪᐊᒥᑦ.


ᑖᒃᑯᐊ ᐃᓚᒌᓴᒃᑯᑦ ᑯᐯᒻᒥ (ᐃᓚᒌᓴᖅ, ᑐᑭᖃᕐᒪᑦ “ᐃᓚᒌᖑᓕᕐᓂᒥᒃ” ᐃᓄᒃᑎᑐᑦ) ᐱᒋᐊᕐᑎᑕᐅᓯᒪᔪᖅ 1967-ᒥ. ᑕᓪᓕᒪᑦ ᑯᐊᐸᐅᔪᑦ ᐱᒋᐊᕐᑎᑕᐅᒋᐊᕐᖓᓚᐅᕐᓯᒪᔪᑦ ᐃᓚᒌᓴᓕᐅᕐᓱᑎᒃ ᐱᒍᑦᔨᓂᕐᒥᒃ ᐱᓇᓱᐊᖁᓪᓗᒋᑦ ᑯᐊᐸᓄᑦ ᐃᓚᒋᔭᐅᔪᓄᑦ ᐊᒻᒪᓗ ᐃᓕᓴᕐᕕᓴᐅᔪᓐᓇᖁᓪᓗᒍ ᐃᒻᒥᓂᒃ ᒪᑭᑕᔪᓐᓇᓯᕙᓪᓕᐊᒋᐊᖃᕐᓂᒥᒃ ᐃᑲᔪᕈᑕᐅᔪᓐᓇᖁᓪᓗᒍ.  ᐅᓪᓗᒥᓕ, FCNQ-ᑯᑦ ᐱᕈᕐᐸᓪᓕᐊᓯᒪᓕᕐᐳᑦ 14-ᓂᒃ ᑯᐊᐸᓂᒃ ᓂᐅᕕᕐᕕᖁᑎᖃᓕᕐᓱᑎᒃ. ᑕᒪᓐᓇ ᐱᓇᓱᐊᕐᓂᖅ ᐱᕕᑦᓴᖃᒃᑫᓲᖑᕗᖅ ᑐᖕᖓᕕᐅᑦᓱᓂ ᑯᐊᐸᒃᑯᑦ ᖃᐅᔨᓯᒪᓕᕐᑕᒥᓐᓂᒃ ᐃᑲᔪᖃᑦᑕᐅᑎᔪᓐᓇᓱᑎᒃ ᐊᒻᒪᓗ ᐃᒻᒥᓐᓄᑦ ᐃᑲᔪᖃᑦᑕᐅᑎᓲᖑᑦᓱᑎᒃ, ᐃᓘᓐᓇᑎᒃ ᐊᑦᔨᒌᒥᒃ ᑌᒫᓪᓗᐊᖅ ᑐᖕᖓᕕᖃᕐᓱᑎᒃ. ᐅᖃᐅᓯᕆᓲᕗᑦ “ᐊᑕᐅᑦᓯᑯᑦ - ᐃᓘᓐᓇᑕ. ᐱᓇᓱᐊᕐᓗᑕ ᐱᕙᓪᓕᐊᖃᑎᒌᒍᓐᓇᖁᓪᓗᑕ ᐃᓅᓂᕗᑦ ᒪᓕᓪᓗᒍ, ᓇᓪᓕᑎᓐᓂᒃ ᐃᐱᕃᓐᓀᑦᑌᓕᓪᓗᑕ ᕿᒣᓐᓀᑦᑌᓕᓪᓗᑕᓗ.”

ᖃᖓᑦᑕᔫᖁᑎᖃᓕᕐᑐᑦ 23-ᓂᒃ ᖃᖓᑦᑕᔫᓂᒃ, ᕗᕐᔅ ᐃᐊᒃᑯᑦ ᖃᖓᑦᑕᔫᖏᑦ ᐱᓇᓱᐊᖃᑎᖃᕐᓯᒪᓕᕐᑐᑦ ᐃᓄᓐᓂᒃ ᑕᕐᕋᒥᐅᓂᒃ ᐊᕐᕌᒍᓂᒃ 65 ᐅᖓᑖᓂ ᐅᓯᒃᑲᑦᑕᑎᐅᖃᑦᑕᓱᑎᒃ ᓱᓇᑐᐃᓐᓇᓂᒃ, ᓵᑕᕐᑕᐅᔪᓐᓇᓱᑎᒃ ᐊᒻᒪᓗ ᖃᖓᑕᖃᑦᑕᓂᕐᒥᒃ ᐊᑌᓐᓇᑐᓂᒃ ᐱᕕᑦᓴᖃᕐᑐᓂᒃ ᐱᒍᑦᔨᓂᖃᕐᓱᑎᒃ ᑕᕐᕋᒥᐅᓕᒫᓄᑦ ᐅᐸᒍᑎᓲᖑᑦᓱᑎᒃ ᐊᓯᓕᒫᒥᓐᓂᒃ ᖃᖓᑦᑕᔫᓕᕆᔨᐅᒻᒥᔪᓂᒃ ᐊᖏᓂᕐᐹᒥᒃ ᐱᒍᑦᔨᓂᖃᕐᓱᑎᒃ. ᕗᕐᔅ ᐃᐊᒃᑯᑦ ᖃᖓᑦᑕᔫᖏᑦ ᐃᓘᓐᓇᓕᒫᖏᑦ ᓇᒻᒥᓂᕆᔭᐅᕗᑦ ᐊᖏᓂᕐᐹᒥᒃ ᒪᑭᕝᕕᒃ ᑯᐊᐳᕇᓴᓄᑦ ᐱᒋᐊᕐᓯᒪᑦᓱᑎᒃ 1990-ᒥᑦ, ᐱᓇᓱᑦᑎᖃᕐᓱᑎᒃ 850-ᓂᑦ ᐅᓄᕐᓂᓴᓂᒃ, ᑖᒃᑯᐊᓗ ᐊᒥᓲᓂᕐᓭᑦ 430-ᖑᔪᑦ ᐱᓇᓱᑦᓱᑎᒃ ᓄᓇᖃᕐᓱᑎᓪᓗ ᑕᕐᕋᒥ. ᐊᕐᕌᒍᓂᒃ 68-ᓂᒃ ᖃᖓᑕᖃᑦᑕᓂᕐᒥᒃ ᐱᓇᓱᐊᓕᓂᐅᓕᕐᓱᑎᒃ, ᕗᕐᔅ ᐃᐊᒃᑯᑦ ᖃᖓᑦᑕᔫᖏᑦ ᐊᖏᓂᕐᐸᐅᕗᑦ ᑲᓇᑕᐅᑉ ᐅᑭᐅᕐᑕᑐᖓᓂ ᖃᖓᑦᑕᔫᓕᕆᔨᐅᑦᓱᑎᒃ, ᐱᒍᑦᔨᖃᑦᑕᓱᑎᒃ ᖃᖓᑕᖃᑦᑕᓂᒃᑯᑦ ᒪᓕᒐᓕᐅᕐᓯᒪᔪᓂᒃ ᓄᓇᓕᓐᓄᑦ 30-ᐅᓗᐊᕐᑐᓄᑦ ᑕᕐᕋᒥᐅᓄᑦ ᓄᓇᓕᓐᓄᑦ ᐱᑐᑦᓯᒪᑎᑦᓯᔨᐅᑦᓱᑎᓪᓗ ᐋᑐᕚᒧᑦ, ᒪᓐᑐᔨᐊᓪᓚᒧᑦ, ᒍᐃᓂᐯᒻᒧᑦ ᐊᒻᒪᓗ ᐃᓐᒪᓐᑕᓐᒧᑦ. ᕗᕐᔅ ᐃᐊᒃᑯᑦ ᖃᖓᑦᑕᔫᖏᑦ ᐃᑭᒪᕕᐅᖃᑦᑕᐳᑦ 225,000-ᓗᐊᕐᑐᓄᑦ ᖃᖓᑕᕙᑦᑐᓄᑦ ᐊᒻᒪᓗ 25-ᒥᓕᐊᓐ ᐅᖓᑖᓄᑦ ᐅᖁᒣᓐᓂᓕᓐᓂᒃ ᑭᓗᒍᕌᒻᓂᒃ ᐅᓯᑲᑦᑕᖃᑦᑕᓱᑎᒃ ᐱᖁᑎᒐᓚᓐᓂ ᓱᓇᑐᐃᓐᓇᓂᒃ ᐅᓯᔭᐅᒋᐊᓕᓐᓂᒃ ᖃᖓᑦᑕᔫᒃᑯᑦ (ᖃᖓᑦᑕᔫᑦ ᐊᒥᓲᓂᕐᓭᑦ ᐃᓄᓐᓄᑦ ᖃᖓᑕᕕᐅᑦᓱᑎᓪᓗ ᐱᖁᑎᓂᓪᓗ ᐅᓯᑲᑦᑕᓲᖑᑦᓱᑎᒃ) ᐊᕐᕌᒍᑕᒫᑦ.