ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓄᑖᑦ ᐃᓄᓐᓂᒃ ᐃᑲᔪᕐᓯᐅᑎᑦᓭᑦ ᑲᒪᒋᔭᐅᓪᓚᕆᑦᑐᑦ ᑫᐋᔩᑉ ᓄᓇᓕᓕᒫᓂ ᑲᑎᔨᖏᑦ ᑲᑎᒪᑎᓪᓗᒋᑦ ᑰᑦᔪᐊᕌᐱᒻᒥ

ᑰᑦᔪᐊᖅ, ᒣ 31 2019 –ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑲᑎᒪᔨᖏᑦ ᐊᖏᕐᓯᒪᔪᑦ ᐊᒥᓱᐃᓂᒃ ᐃᓅᖃᑎᒌᑦ ᐃᑲᔪᕐᑕᐅᒍᑎᑦᓴᖏᓐᓂᒃ ᑐᕌᒐᐅᑎᓪᓗᒋᑦ ᐱᐅᓭᒋᐊᕐᓃᑦ ᖃᓄᐃᖕᖏᓯᐊᕐᓂᖏᓐᓂᒃ ᓄᓇᕕᒻᒥᐅᑦ ᐅᓪᓗᓂ ᓯᑕᒪᓂ ᑲᑎᒪᓂᖃᕐᑎᓗᒍ ᑰᑦᔪᐊᕌᐱᒻᒥ.

ᑫᐋᔩᑉ ᑲᒪᒋᓚᖓᔭᖏᑦ ᐱᐅᓭᒋᐊᕈᑏᑦ ᐃᓅᓯᖏᓐᓂᒃ ᓄᓇᕕᒻᒥᐅᑦ ᐅᖃᐅᓯᕆᔭᐅᓪᓚᕆᖃᑦᑕᑐᑦ ᐃᓕᖓᔪᑦ ᓄᑖᒧᑦ ᖃᕆᑕᐅᔦᑦ ᐊᕐᖁᑎᖓᓄᑦ ᖃᕆᑕᐅᔭᒃᑰᕈᑎᓄᐊᖓᔪᓄᑦ, ᐊᓯᑦᔨᔭᐅᓂᖏᓐᓄᓗ ᐃᓅᒐᓱᐊᕐᓂᒧᑦ ᐱᓇᓱᒐᐅᑉ ᐊᒻᒪᓗ ᐃᓘᓐᓀᓂ ᓄᓇᓕᓐᓂ ᐃᓄᑐᙯᑦ ᓴᐳᑦᔭᐅᒋᐊᓪᓚᕈᑎᑦᓴᖏᑦ.

“ᑖᓐᓇ ᐱᒻᒪᕆᐅᓚᐅᕐᑐᖅ ᑲᑎᒪᓂᖅ ᓄᓇᓕᓕᒫᓂ ᑲᑎᒪᔩᑦ ᑲᒪᖃᑎᒌᑦᑎᓗᒋᑦ ᐱᒻᒪᕆᓐᓂᒃ ᐃᓄᓐᓂᒃ ᐃᑲᔪᕐᓯᐅᑎᑦᓴᓂᒃ ᓄᐃᑎᓚᖓᔭᑦᑎᓂᒃ. ᑫᐋᔩ ᑲᒪᒋᔭᖃᑦᓯᐊᖏᓐᓇᑐᖅ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐃᓄᖏᑦᑕ ᐊᒻᒪᓗ ᑲᔪᓯᑎᑦᓯᓚᖓᑦᓱᓂ ᐱᓇᓱᐊᕐᑕᐅᒋᐊᓕᓐᓂᒃ ᐊᒥᓱᓂᒃ ᓄᑖᓂᒃ ᐃᓱᒪᒋᔭᐅᓯᒪᓕᕐᓱᑎᒃ ᕿᓄᒍᑕᐅᔪᓂᒃ ᓄᓇᓕᓕᒫᓂ ᑲᑎᒪᔨᓄᑦ ᑲᑎᒪᐅᑕᐅᑦᓱᑎᒃ,” ᑫᐋᔩᑉ ᑐᑭᒧᐊᑦᑎᓯᔨᖓ ᔨᐊᓂᕙ ᒪᓂᒃ ᑌᒣᓕᑦᓱᓂ ᐅᖃᓚᐅᕐᑐᖅ ᓯᑕᒻᒥᑐᓂ ᑲᑎᒪᓂᐅᑉ ᐃᓱᐊᓂ.

ᑭᓇᓕᒫᒃᑯᓂᒃ ᐊᑭᑭᓐᓂᐹᕐᓯᐅᕈᑏᑦ ᐅᒃᑯᐃᑕᐅᓛᕐᑐᑦ ᔫᓂ 12-ᒥ ᐱᒋᐊᕐᑕᐅᓚᕆᑦᑎᓗᒍ ᐋᕐᕿᓯᐊᕐᓯᒪᐅᑎᑦᓴᖓ ᖃᕆᑕᐅᔭᕈᑎᓄᑦ ᑭᒡᒐᑐᕈᑎᐅᑉ ᐊᑐᕐᓗᒋᑦ ᑕᕆᐅᑉ ᐃᕐᖃᖓᑎᒎᕐᑐᑦ ᖃᕆᑕᐅᔦᑦ ᐊᑦᓱᓈᖁᑎᖏᑦ ᑕᓯᐅᔭᕐᔪᐊᒥ. ᐃᓚᖃᕐᒥᓗᑎᒃ, ᐅᖄᒍᑎᐊᐱᑎᒍᑦ ᑭᒡᒐᑐᕈᑎᓂᒃ ᐱᔭᕇᕐᑕᐅᓛᕐᑐᓴᐅᓕᕐᑎᓗᒋᑦ ᐅᑭᐊᖅ ᐊᒥᓱᐃᓂ ᓄᓇᓕᓐᓂ ᐱᔪᓐᓇᓯᑎᑕᐅᓗᑎᒃ.

ᐊᒻᒪᓗ, ᐱᖓᓲᔪᕐᑐᓄᑦ ᐊᕐᕌᒍᓄᑦ ᑐᕌᖓᔪᖅ $115.8-ᒥᓕᐊᓄᑦ ᐊᖏᖃᑎᒌᒍᑎᒃ ᐃᓕᖓᔪᖅ ᐊᓯᑦᔨᑐᕐᑕᐅᓂᖏᓐᓄᑦ ᐃᓅᒐᓱᐊᕐᓂᒧᑦ ᐊᑭᓂᒃ ᐃᑲᔪᕐᓯᒪᐅᑎᓄᑦ ᐱᓇᓱᒐᕐᒧᑦ ᐊᑐᓯᓂᖃᓛᕐᓱᓂ ᔪᓓ 1-ᒥ. ᐊᒥᓱᑦ ᐃᑲᔪᕐᓯᐅᑏᑦ ᓄᓇᕕᒻᒥᐅᓂᒃ ᐃᑉᐱᐊᕈᒻᒥᓚᖀᓛᕋᓗᐊᕐᑎᓗᒋᑦ, ᑲᑎᒪᔩᑦ ᑐᑭᓯᓇᕐᑎᓯᑦᓯᐊᓚᐅᕐᑐᑦ ᐱᓇᓱᒐᐅᑉ ᑮᓇᐅᔭᑎᒍᑦ ᑲᒪᒋᔭᐅᓂᖓ ᐱᑦᓯᐊᓂᖃᓪᓚᕆᒋᐊᖃᕐᓂᖓᓂᒃ.

ᐊᑭᓕᕆᐊᖃᕐᓂᖏᓐᓄᑦ $2-ᒥᓕᐊᓐ ᐊᑭᓕᕋᑦᓴᖑᕐᓯᒪᔪᑦ ᐱᓇᓱᒐᕐᒥ, ᐃᓚᐅᖕᖏᑑᑫᓐᓇᖃᑦᑕᓚᖓᔪᑦ 5 ᐳᓭᑦ ᐃᑭᓪᓕᑎᕐᓯᒪᐅᑕᐅᓗᑎᒃ ᐊᑭᓕᐅᑎᓄᑦ ᑭᖕᖒᒪᔭᐅᓲᓄᑦ ᐊᑭᓕᕐᑕᐅᒍᑏᑦ. ᐱᓇᓱᒐᖅ ᐃᓚᐅᒍᓐᓇᓯᓚᖓᓕᕐᑎᓗᒋᑦ ᐃᓘᓐᓇᑎᒃ ᑭᖕᖒᒪᔭᐅᓲᓕᒫᑦ ᓂᐅᕕᐊᕆᔭᐅᒋᐊᖃᕐᐸᓱᑎᒃ.

ᐃᓄᑐᙯᓪᓗ ᐃᑲᔪᕐᑕᐅᒍᑎᒋᐊᓪᓚᖏᑦ ᐃᓕᒪᓚᖓᓕᕐᓱᑎᒃ. ᓄᓇᓕᓐᓂ ᐃᓄᑐᖃᕐᓄᐊᖓᔪᓂᒃ ᑲᔪᓯᑎᑦᓯᔩᑦ ᐱᓇᓱᑦᑎᑖᒍᓚᖓᓕᕐᑎᓗᒋᑦ ᐃᓘᓐᓀᓂ 14-ᓂ ᓄᓇᓕᓐᓂ ᓄᐃᑎᕆᓚᖓᑎᓪᓗᒋᑦ ᐱᓇᓱᒐᕐᓂᒃ ᐊᒻᒪᓗ ᑭᒡᒐᑐᕈᑎᓂᒃ ᑭᖕᖒᒪᓇᕐᐸᑐᑦ ᓄᐃᑎᓚᕿᓗᒋᑦ.

ᑲᑎᒪᔩᑦ ᓇᑯᕐᓴᓚᐅᕐᒥᔪᑦ ᐱᓇᓱᐊᕐᑕᖏᓐᓂᒃ ᓴᑐᕐᕖᑦ ᐃᓄᐃᑦ ᐊᕐᓀᑦ ᑲᑐᑦᔨᖃᑎᒌᓐᓂᖓᑕ ᐃᑲᔪᕐᐸᓂᖏᓐᓄᑦ ᐱᖁᔦᑦ ᓯᖁᒥᑦᓱᒋᑦ ᐱᓂᕐᓗᕕᐅᓯᒪᔪᓂᒃ ᐊᕐᓱᕈᕐᓯᒪᓂᕐᒥᓂᒃ ᐊᓂᒍᐃᒋᐊᕐᑎᓗᒋᑦ ᓴᐳᑦᔨᓯᐊᕐᐸᒪᑕ. ᑫᐋᔩᒃᑯᓂᒃ ᕿᒥᕐᕈᖁᔨᓚᐅᕐᑐᑦ ᓄᐃᑕᐅᖁᔨᑦᓱᑎᒃ ᑭᒡᒐᑐᕈᑎᓂᒃ ᓴᐳᑦᔭᐅᒋᐊᖃᕐᒥᒪᑕ ᒪᓂᔭᐅᒍᓐᓇᓯᓗᑎᒃ ᐊᖑᑏᑦ ᑌᒫᑦᓭᓇᖅ ᑖᒃᑯᓂᖓᑦᓭᓇᖅ ᑭᒡᒐᑐᕈᑎᖏᓐᓂᒃ ᓴᑐᕐᕖᑯᑦ.

ᑲᑎᒪᔩᑦ ᓇᓗᓀᕐᓯᓚᐅᕐᒥᔪᑦ ᐃᓕᔨᓯᒪᓂᕐᒥᓂᒃ $120,000-ᓂᒃ ᐱᕙᓪᓖᒋᐊᕈᑎᑦᓴᓂᒃ ᐃᓄᓐᓂᒃ ᑎᒥᒥᒍᑦ ᐱᖕᖑᐊᑎᓂᒃ ᐱᓕᐅᑎᔨᓂᒃ ᐃᓚᐅᕙᑦᑐᓂᒃ ᐅᑭᐅᕐᑕᑐᒥ ᐅᑭᐅᒥ ᐱᖕᖑᐊᓂᕐᔪᐊᓄᑦ. ᑫᐋᔩ ᐅᖃᐅᓯᖃᓚᐅᕐᒥᔪᖅ ᓄᓇᕕᒻᒥ ᖄᑭᕐᓃᑦ ᓄᐃᑕᒍᓐᓀᕙᓪᓕᐊᓂᖏᓐᓂᒃ ᐊᒻᒪᓗ ᓇᓪᓕᐊᒍᑦ ᓴᐳᑦᔨᓯᒪᒍᓐᓇᕋᔭᕐᒪᖔᕐᒥᒃ ᖄᑭᕐᓂᒧᑦ ᐱᓕᐅᑎᓃᑦ ᑲᔪᓯᑎᑕᐅᒍᑎᒋᒋᐊᓕᖏᓐᓂ.

ᐅᖃᐅᓯᕆᔭᐅᓪᓚᕆᓚᐅᕐᒥᔪᑦ ᐊᒥᓱᑦ ᐱᓇᓱᒐᕐᓂᒃ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᒉᑦ ᐃᓚᐅᑎᓪᓗᒍ ᐅᔭᕋᕐᓂᐅᕕᓐᓂ ᐱᓇᓱᐊᕆᐅᕐᓴᓂᕐᓄᑦ ᐱᓇᓱᒐᖅ ᑕᕝᕘᓇᓗ ᐱᓇᓱᑦᑎᑖᒍᒋᐊᓪᓚᓯᒪᓕᕇᕐᓱᑎᒃ ᕌᖕᑲᓚᓐᒥ ᐅᔭᕋᕐᓂᐊᕕᒻᒥ ᐊᒻᒪᓗ ᐊᓯᖏᓐᓂ ᐅᔭᕋᕐᓂᐊᕕᓐᓂ ᑖᒃᑯᓇᓂ ᐱᓇᓱᐊᕐᑐᑦ 18-ᐳᓭᑦ ᐃᓄᐃᑦ ᐱᓇᓱᕝᕕᖃᓕᕐᒪᑕ.

ᐊᐅᔭᐅᒋᐊᕕᒻᒥᒪ, ᐊᒥᓱᑦ ᑲᑎᒪᔩᑦ ᐱᓇᓱᐊᕐᑕᐅᑲᐱᒋᐊᖃᓕᕐᓂᕃᓚᐅᕐᑐᑦ ᓄᑖᑦ ᐊᕐᖁᑏᑦ ᓯᑎᓪᓕᑎᕐᑕᐅᓂᖏᑦᑕ ᐊᖏᖃᑎᖃᕈᑎᒥᒃ ᑯᐯᑉ ᑲᕙᒪᖓᓂᒃ ᐊᕐᖁᑏᑦ ᐱᐅᓴᕐᑕᐅᓂᖏᓐᓄᑦ. ᖁᐊᓴᕐᕖᓗ ᐃᓚᖏᑦ ᓄᑕᐅᓪᓕᑎᕐᑕᐅᒪᕆᒋᐊᖃᓕᕐᓱᑎᒃ. ᓄᓇᓕᓐᓂ ᐱᐅᒃᑯᑎᖃᕐᑎᓯᓂᕐᓄᑦ ᐱᓇᓱᕝᕕᒃ ᕿᒥᕐᕈᓕᕐᑐᖅ ᐃᓱᒫᓘᑕᐅᔪᓂᒃ ᐅᖃᐅᓯᕆᔭᐅᑦᓱᑎᒃ ᑕᕝᕙᓂ ᑲᑎᒪᓂᕐᒥ.

ᐊᑦᑕᓀᑦᑐᒦᑦᑎᓯᓂᕐᓄᑦ ᐊᒻᒪᓗ ᓱᒃᑯᐊᕿᑦᑌᓕᑎᑦᓯᐅᑏᑦ ᕿᒥᕐᕈᔭᐅᓚᐅᕐᒥᔪᑦ. ᓄᑖᖅ ᐱᓇᓱᐊᖃᑎᒌᓐᓂᒧᑦ ᐊᖏᖃᑎᒌᒍᑎᒃ ᐊᑎᓕᐅᕐᑕᐅᓯᒪᓕᕐᑐᖅ ᑲᑎᕕᐅᑉ ᐳᓖᓯᖏᓐᓄᑦ ᐊᒻᒪᓗ ᒪᓐᑐᔨᐊᓚᐅᑉ ᐳᓖᓯᖏᓐᓄᑦ ᐃᓄᐃᑦ ᒪᓐᑐᔨᐊᓚᒦᑦᑐᑦ ᐊᑦᑕᓀᑦᑐᒦᑎᑕᐅᓂᖏᓐᓄᑦ ᐊᒻᒪᓗ ᖃᓄᐃᓕᖕᖓᑎᑕᐅᑦᑌᓕᓂᖏᓐᓄᑦ. ᐊᒻᒪᓗ ᑲᑎᒪᔩᑦ ᑐᓴᕐᓯᒪᓕᕐᓱᑎᒃ ᓄᑖᓂᒃ ᐊᑦᑕᓇᖕᖏᑐᒦᑦᑎᓯᐅᑎᑦᓴᓂᒃ ᑎᒻᒥᔫᕐᓂᐊᕕᓐᓂ ᐊᒻᒪᓗ ᐊᖏᕐᓱᒋᑦ ᐃᑯᐊᓪᓚᑎᑦᓯᑌᓕᓂᕐᓄᑦ ᐸᕐᓀᒍᑎᓂᒃ ᓄᐃᑕᐅᓯᒪᐅᑎᖏᓐᓂᒃ ᐃᑯᐊᓚᒧᑦ ᐱᓂᕐᓗᑎᑦᓯᑌᓕᕐᓄᑦ ᑐᕌᒉᑦ ᑐᕌᖓᔪᑦ ᓄᓇᕕᒻᒥ ᓄᓇᓕᓐᓄᑦ.

ᐊᒥᓱᑦ ᐱᒋᐊᕐᑎᒐᑦᓭᑦ ᐊᒻᒪᓗ ᐱᓇᓱᒉᑦ ᓄᑕᐅᓪᓕᑎᕐᑕᐅᓛᕐᑐᑦ ᑫᐋᔩᑉ ᑲᑎᒪᔨᖏᑦ ᑲᑎᒪᓕᕐᒥᐸᑕ ᑰᑦᔪᐊᒥ ᓯᑉᑎᒻᐱᕆᐅᓕᕐᐸᑦ.