ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑯᐯᒃ ᑲᕙᒪᖓ ᐅᓄᕐᓯᒋᐊᕆᔪᕕᓂᖅ ᐊᕐᕌᒍᑕᒫᑦ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᓄᓇᕕᒻᒥᐅᑦ ᐃᓄᑐᖃᐅᔪᑦ

Photo

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐸᑎᑦᑕᓚᐅᖅᑯᖅ ᑯᐯᒃ ᑲᕙᒪᖓᑕ ᑐᓴᕐᑎᓯᐅᑎᒋᔭᖓᓂᒃ ᐅᓪᓗᒥ, ᐁᑦᑑᑎᒋᔭᕐᒥᓂᒃ $2,880,360-ᓂᒃ ᑮᓇᐅᔭᖃᕐᑎᓯᒍᑎᑦᓴᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᐃᖅᑭᓖᑦ ᑲᕙᒪᖓᓄᑦ ᐊᒻᒪᓗ ᔦᒥᓯ ᐯᒥᐅᑦ ᑲᕙᒪᖓᓄᑦ ᐱᒋᐊᕐᑎᓯᒍᑎᑦᓴᓄᑦ ᐱᕚᓪᓕᒍᑕᐅᓚᖓᔪᓄᑦ ᐃᓄᑐᖃᕐᓄᑦ ᑯᐯᒃ ᑕᕐᕋᖓᓂᒥᐅᖑᔪᓄᑦ.

ᓄᓇᕕᒻᒥ, ᑮᓇᐅᔦᑦ ᑐᕌᕐᓂᖃᓚᖓᔪᑦ ᐊᑐᓕᕐᑎᓯᓂᕐᒧᑦ ᐱᐅᓯᕐᓲᑎᐅᖕᖏᑐᒃᑯᑦ ᑕᓕᒻᒪᓄᑦ ᐊᕐᕌᒍᕐᓄᑦ ᐃᓕᖓᔪᒥᒃ ᐊᖏᖃᑎᒌᒍᑎᖓᑕ ᑯᐯᒃ ᑲᕙᒪᖓ ᐊᒻᒪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ. ᐊᖏᖃᑎᒌᒍᑎᒃ, ᓭᓂᕐᑕᐅᓚᐅᕐᒥᔪᖅ ᑐᖅᑲᑕᕐᕕᖏᓐᓄᑦ ᐃᓪᓗᓕᕆᔨᕐᔪᐊᑯᑦ ᑯᐯᒃᒥ (Ministère des Affaires municipales et de l’Habitation du Québec), ᓴᐳᑦᔨᓂᖃᓚᖓᔪᑦ ᓄᓇᓖᑦ ᐱᓇᓱᐊᒐᑦᓴᖏᓐᓂᒃ ᑐᕌᒐᕆᔭᖃᕐᑐᓂᒃ ᐱᐅᓯᒋᐊᕆᓂᕐᓂᒃ ᐃᓄᑐᙯᑦ ᐃᓅᓯᖏᑦᑕ ᖃᓄᐃᓕᖓᓂᕆᔭᖏᓐᓂᒃ. ᒫᓐᓇᐅᔪᖅ 2023 ᓄᖕᖑᐊ ᑎᑭᓪᓗᒍ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐱᓛᕐᓂᐊᑐᖅ $827,670-ᓂᒃ ᓄᓇᓖᑦ ᐱᓇᓱᐊᒐᑦᓴᖃᕐᑎᑕᐅᒍᑎᑦᓴᓄᑦ ᓴᐳᑦᔨᒐᔭᕐᑎᓗᒋᑦ ᐃᓄᑐᖃᕐᓂᒃ.

KRH-ᑯᑦ ᐱᓛᕐᓂᐊᒥᔪᑦ ᑮᓇᐅᔭᒋᐊᓪᓚᓂᒃ ᐃᒣᓪᓗᐊᑐᓂᒃ $76,350 ᐊᕐᕌᒍᑕᒫᑦ (ᐃᓚᐅᑎᓪᓗᒋᑦ 2% ᐊᕐᕌᒍᑕᒫᑦ ᐋᖅᑭᒋᐊᕐᑕᐅᒍᑏᑦ) ᑕᓪᓕᒪᓄᑦ ᐊᕐᕌᒍᕐᓄᑦ ᐊᖏᖃᑎᒌᒍᑎᒃ ᑮᓇᐅᔭᖃᕐᑎᓯᓚᖓᑎᓗᒍ ᐱᓇᓱᐊᕐᑕᖏᓐᓂᒃ ᓄᓇᕕᒻᒥ ᐃᓄᑐᙯᑦ ᑲᑎᒪᔨᖏᑦ. ᑕᒪᓐᓇ ᐱᒻᒪᕆᐅᔪᖅ ᐱᓇᓱᐊᕈᑕᐅᓂᖓ ᓄᓇᕕᒻᒥᐅᑦ ᐃᓄᑐᖃᖏᓐᓄᑦ. ᓇᓗᓀᔦᒍᑦᓂᖃᕐᒪᑦ ᑭᖕᖒᒪᒋᔭᖏᓐᓂᒃ ᐃᓄᑐᖃᐅᔪᑦ ᓄᓇᕕᒻᒥᐅᑦ ᐅᖃᓕᒪᖃᑎᖃᕐᓂᑯᑦ, ᖃᐅᔨᒋᐊᕐᕕᖃᕐᓂᑯᑦ ᐊᒻᒪᓗ ᐱᓇᓱᖃᑎᒌᓐᓂᑯᑦ ᐃᑲᔪᕐᓯᓂᖃᖁᓪᓗᒋᑦ ᑐᑭᑖᕈᑕᐅᓲᓂᒃ ᓱᕐᕃᓯᒪᓂᖃᓚᖓᔪᓂᒃ ᖃᐅᑕᒫᑦ ᐃᓅᓯᕆᔭᖏᓐᓂᒃ ᐃᓄᑐᖃᐅᔪᑦ.

ᒥᓂᔅᑕᕆᔭᐅᔪᖅ ᑲᒪᒋᔭᖃᓲᖅ ᐃᓄᑐᖃᕐᓂᒃ ᐊᒻᒪᓗ ᑲᒪᔨᖃᕆᐊᓕᓐᓂᒃ ᑲᒪᔨᓂᒃ, ᒫᑯᔨ ᐱᓓ ᐅᖃᓚᐅᕐᑐᖅ ᐅᓪᓗᒥ ᓂᓪᓕᕈᑎᐅᓯᒪᔪᖅ ᓄᐃᑕᑦᑎᓯᒋᐊᖓᓂᒃ ᑲᕙᒪᒃᑯᑦ ᐊᔪᐃᓐᓇᓂᖏᓐᓂᒃ ᖁᕝᕙᒋᐊᕆᓂᕐᒧᑦ ᖃᓄᐃᖕᖏᓯᐊᕐᓂᖏᓐᓂᒃ ᐃᓄᑐᙯᑦ ᓄᓇᕕᒻᒥ ᐊᒻᒪᓗ ᓄᓇᓕᓕᒫᓂᒃ ᑯᐯᒃ ᓄᓇᒋᔭᖓᓃᑦᑐᓄᑦ.

“ᐅᐱᒍᓱᑉᐳᖓ ᑕᑯᒋᐊᒥᒃ ᑯᐯᒃ ᑕᕐᕌᖓᓃᑦᑐᓂᒃ ᓄᓇᓕᓐᓂᒃ ᐊᐅᓚᑦᔭᒋᐊᕐᓯᒪᔪᓂᒃ ᐱᕙᓪᓕᐊᑐᐃᓐᓇᓱᑎᑦ ᐱᒋᐊᕐᑎᓯᒍᑎᓂᒃ ᓴᐳᑦᔨᓂᕐᒥᒃ ᐃᓚᒋᔭᐅᓂᕆᓲᖑᓂᖏᓐᓂᒃ ᐃᓄᑐᖃᐅᔪᑦ. ᐅᑉᐱᕈᓱᑦᓯᐊᖁᖓ ᑖᒃᑯᐊ ᓄᑖᖑᔪᑦ ᐊᖏᖃᑎᒌᓐᓂᐅᔪᑦ ᓴᐳᑦᔨᓂᖃᓚᖓᒋᐊᖏᓐᓂᒃ ᓄᓇᓖᑦ ᐱᒐᓱᐊᕐᓂᖏᓐᓂᒃ ᐱᕕᑦᓴᖃᑦᓯᐊᑎᑦᓯᓂᕐᒥᒃ ᐃᓄᑐᖃᕐᓂᒃ ᐃᓅᓯᖃᑦᓯᐊᖁᓗᒋᑦ ᐃᓗᐃᑦᑐᓯᐊᒥᒃ ᐊᒻᒪᓗ ᐃᑲᔪᕐᓯᓂᖃᕐᓗᓂ ᓄᑲᕐᓰᑦ ᑭᖑᕚᕆᔭᐅᔪᑦ ᓇᑯᕐᓴᓂᕐᓴᐅᖁᓗᒋᑦ ᖃᓄᐃᓘᕐᑎᐅᓂᕆᔭᕐᒥᓂᒃᓄI,” Ms. ᐱᓓ ᐅᖃᓚᐅᕐᑐᖅ. ᑰᑦᔪᐊᒦᓚᐅᕐᑐᖅ ᐅᖃᕆᐊᕐᑐᓯᒪᑦᓱᓂ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑭᔅᖓᑐᕐᑎᖏᓐᓄᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᓐᓄᑦ ᐊᒻᒪᓗ ᐃᓄᑐᖃᖏᓐᓄᑦ ᓄᓇᓕᐅᔫᑉ.

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᔪᐃᓐᓇᕈᑦᔨᓂᖃᖅᑯᖅ ᐱᑎᑦᓯᒐᓱᐊᕐᓂᒥᓂᒃ ᑭᖕᖒᒪᒋᓗᐊᖕᖑᐊᑕᖏᓐᓂᒃ ᐃᓄᑐᙯᑦ ᓄᓇᕕᒻᒥᐅᖑᔪᑦ. ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐱᒋᐊᕐᑎᓯᓚᐅᔪᖅ ᓄᐃᑕᐅᓂᖓᓂᒃ ᐃᓄᑐᙯᑦ ᑲᑐᑦᔨᖃᑎᒌᖏᑦ ᓄᓇᕕᒻᒥ 2006-ᖑᑎᓪᓗᖑ ᓯᕗᓪᓕᐹᖑᑎᓪᓗᒍ ᐊᖓᔫᖅᑳᕆᔭᐅᓂᕐᒧᑦ ᐹᐱ ᓯᓅᐹ. ᑌᑲᓂᐅᔪᖅ 400-ᖑᓚᐅᔪᔪᑦ ᐃᓄᑐᙯᑦ ᓄᓇᕕᒻᒥ, 800 ᐅᖓᑖᓃᓕᕐᑐᑦ ᒫᓐᓇ.

ᑐᑭᒧᐊᑦᑎᓯᔨᐅᑉ ᑐᖓᓕᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᕿᐅᓪᑕ ᓯᓅᐹ ᐅᐱᒍᓱᑦᑐᖅ ᓄᑖᒥᒃ ᐊᖏᖃᑎᒌᒍᑎᒥᒃ ᐅᖃᕐᓱᓂᓗ ᑮᓇᐅᔭᖃᕐᑎᑕᐅᒍᓐᓇᓚᖓᒋᐊᖏᓐᓂᒃ ᐊᒥᓱᐃᑦ ᓄᓇᓕᒻᒥ ᐱᓇᓱᐊᕐᑎᓯᒍᑎᑦᓭᑦ ᐱᐅᓯᒋᐊᕐᑎᓯᓂᖃᕈᓐᓇᑐᑦ ᐃᓅᓯᕆᔭᖏᓐᓂᒃ ᐃᓄᑐᙯᑦ ᓄᓇᓕᓕᒫᓃᑐᑦ.

“ᐅᑭᐅᕆᑦᓯᕙᓪᓕᐊᔪᑦ ᐃᓄᖁᑎᕗᑦ ᑌᒣᓐᓂᕆᔭᖓ ᑲᖐᒋᖕᖏᑑᑐᐃᓐᓇᕆᐊᖃᖕᖏᑕᕗᑦ. ᐃᑲᔪᕆᐊᓕᕗᑦ ᐃᓄᑐᖃᕗᑦ ᐃᓚᐅᑎᖏᓐᓇᑎᑦᓯᓂᒃᑯᑦ ᓄᓇᓕᑦᑎᓂᒃ ᐱᑦᔪᑎᒋᓗᒍ ᓲᖑᔪᑦᓯᐊᓂᒃ ᖃᐅᔨᒪᓂᖃᕐᒪᑕ ᑭᖕᖒᒪᒋᔭᑦᑎᓂᒃ ᐱᑐᑦᓯᒪᖃᑎᒌᒍᑎᒋᒍᓐᓇᑕᑦᑎᓂᒃ ᓄᑲᕐᓯᐅᔪᓄᑦ,” ᐅᖃᕐᑐᖅ ᕿᐅᓪᑕ ᓯᓅᐹ, ᑐᑭᒧᐊᑦᑎᓯᔨᐅᑉ ᑐᖓᓕᐊ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ. ᐃᓄᑐᙯᑦ ᑎᒍᒥᐊᕐᑎᐅᒪᑕ ᐃᓕᖅᑯᓯᑦᑎᓂᒃ ᐊᒻᒪᓗ ᐃᓪᓕᕆᔭᑦᑎᓂᒃ. ᐊᔪᐃᓐᓇᕈᑦᔨᔭᕗᑦ ᖃᓄᐃᖕᖏᓯᐊᕆᐊᖃᕐᓂᖏᑦ.”
 
ᑕᓯᐅᕐᓯᔭᐅᑎᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᑲᕙᒫᐲᑦ ᐱᒍᓐᓇᕕᖃᕋᔭᕐᑐᑦ ᑮᓇᐅᔭᓂᒃ ᐊᒥᓱᓄᑦ ᐊᑦᔨᒌᖕᖏᑐᓄᑦ ᐱᓇᓱᐊᕐᑎᓯᒍᑎᓄᑦ ᐱᐅᓯᒋᐊᕆᒐᔭᕐᑐᓂᒃ ᐃᓅᓯᕆᔭᖏᓐᓂᒃ ᐃᓄᑐᖃᐅᔪᑦ. ᑖᒃᑯᐊ ᐱᓇᓱᐊᕐᑎᓯᒍᑏᑦ ᐃᓚᒋᔭᖃᖅᑯᑦ ᖁᕝᕙᒋᐊᕆᓂᕐᒥᒃ ᐃᓅᖃᑎᒌᑎᒍᑦ ᐃᓚᒋᔭᐅᓕᐅᒥᑎᑦᓯᓂᒃᑯᑦ ᐃᓄᑐᖃᕐᓂᒃ ᓄᓇᓕᒋᔭᕐᒥᓄ, ᐃᓪᓕᕆᔭᖃᕐᓂᒃ ᐅᑭᐅᖃᑎᒌᖕᖏᑐᑦ ᐃᓚᒌᒍᓐᓇᓂᖏᓐᓂᒃ, ᐃᑲᔪᕐᓯᓂᒃᑯᑦ ᐃᓅᓯᕆᔭᖏᓐᓂᒃ ᐊᓂᕐᕋᒥᑕ ᐃᓗᐊᓂ, ᐃᑲᔪᕐᓯᓂᒃᑯᑦ ᐊᑐᕐᓂᓗᑦᑕᐅᑎᑦᓯᑌᓕᓂᒃᑯᑦ ᐊᒻᒪᓗ ᓴᐳᑦᔨᓕᐅᒥᓗᒋᑦ ᐊᑦᑕᓇᕐᓂᓴᐅᔪᑦ ᐃᓄᑐᙯᑦ.

ᓄᑖᖅ ᐊᖏᖃᑎᒌᒍᑎᒃ ᐃᑲᔪᕐᓯᓚᖓᔪᖅ ᐱᐅᓯᒋᐊᕆᓂᒃᑯᑦ ᑖᒃᑯᓂᖓ ᐱᓇᓱᐊᒐᑦᓴᓂᒃ ᐊᒻᒪᓗ ᐱᒋᐊᕐᑎᓯᓂᖃᕐᓗᓂ ᓄᑖᓂᒃ ᓄᓇᓖᑦ ᑎᒥᐅᔪᖁᑎᖏᓐᓄᑦ ᐃᑲᔪᕐᓯᒋᐊᕆᒍᑕᐅᖁᓗᒋᑦ ᐱᐅᓂᕆᔭᖏᓐᓂᒃ ᐃᓄᓰᖏᑦ ᐃᓘᓐᓇᓕᒫᖏᑦ ᐃᓄᑐᖃᐅᔪᑦ, ᐃᓚᒋᓪᓚᕆᒻᒥᔭᖓ ᐊᔪᐃᓐᓇᕈᑦᔨᒍᑎᒋᔭᖏᑦᑕ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᕿᓂᕐᓂᑯᑦ ᖃᓄᐃᖕᖏᓯᐊᕈᑎᑦᓴᖏᓐᓂᒃ ᐃᓘᓐᓇᓕᒫᑦ ᐃᓄᖁᑎᒋᔭᐅᔪᑦ.