ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓄᐃᑕᑎᑦᓯᓲᖅ ᐱᒻᒪᕆᐅᓂᖓᓂᒃ ᐱᓇᓱᑦᑎᑖᓕᐅᒥᒋᐊᖃᕐᓂᖏᓐᓂᒃ ᐃᓄᓐᓂᒃ ᐱᓇᓱᑦᑎᓂᒃ ᓄᓇᕕᒻᒥ ᐅᔭᕋᓐᓂᐊᓂᕐᒧᑦ ᑲᑎᒪᓂᐊᕈᓯᕐᒥᒃ

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᔪᓯᓂᖃᕐᒥᔪᖅ ᖃᓄᐃᓘᕐᑎᐅᓚᕆᖃᑕᐅᒋᐊᕐᒥᓂᒃ ᐱᓇᓱᑦᑎᑖᕐᑎᓯᖃᑦᑕᓂᒃᑯᑦ ᐃᓄᓐᓂᒃ ᓄᓇᕕᒻᒥ ᐅᔭᕋᓐᓂᐊᓂᓕᕆᓂᕐᒥᒃ. ᐃᓚᒋᔭᐅᓂᒃᑯᑦ ᑲᐅᑖᐱᒃᑯᑦ ᖃᓄᕐᑑᓂᕐᒧᑦ ᓵᕆᔭᖓᓂᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓴᐳᑦᔨᓂᖃᖅᑯᖅ ᑐᕌᒐᕆᔭᐅᔪᒥᒃ ᐊᒥᓱᖕᖑᒋᐊᕆᒐᓱᐊᕐᓂᒥᒃ ᐃᓄᓐᓂᒃ ᐱᓇᓱᑦᑎᑖᕋᓱᐊᕐᓂᑯᑦ ᐱᐅᓯᒋᐊᕆᖁᔨᒧᑦ ᐃᓅᓯᖏᓐᓂᒃ ᖃᓄᐃᖕᖏᓯᐊᕆᐊᖃᕐᓂᖏᓐᓂᓗ.


 ᓄᓇᕕᒻᒥ ᐅᔭᕋᓐᓂᐊᓂᓕᕆᓂᕐᒧᑦ ᑲᑎᒪᓂᐊᕈᓯᖃᕐᑎᓯᓂᕐᒥᒃ ᑰᑦᔪᐊᒥ ᐁᕆᓕ 30-ᒥ ᒣ 2-ᒧᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᒪᔨᒻᒪᕆᐅᑉ ᐃᑲᔪᕐᑎᖓ ᐱᓇᓱᐊᕐᑎᓯᒍᑎᑦᓴᓂᒃ ᑲᔪᓯᑎᑕᐅᒍᓐᓇᓂᐊᕐᑐᓂᒃ ᐱᕙᓪᓕᐊᑎᑦᓯᓂᕐᒧᑦ ᕕᑦᑑᔨᐊ ᑯᐊᑕ ᐅᖃᓚᐅᕐᑐᖅ ᓯᕗᓪᓕᐸᐅᑦᔭᐅᒋᐊᖃᕐᓂᖏᓐᓂᒃ ᐃᓄᐃᑦ ᐱᓇᓱᑦᑏᑦ ᐊᒥᓱᖕᖑᒋᐊᕆᐊᖃᕐᓂᖏᑦ ᐅᔭᕋᓐᓂᐊᓂᓕᕆᓂᕐᒥᒃ ᐊᕐᕌᒍᕐᓂᒃ ᙯᔪᓂᒃ 15-ᓂᒃ. “ᐃᑉᐱᒋᔭᐅᓂᖃᓗᐊᖕᖑᐊᓛᕐᑐᑦ ᐱᓇᓱᑦᑎᑖᕆᔭᐅᒐᓱᐊᕐᓂᖏᑦ ᐃᓅᓱᓐᓂᓭᑦ ᐱᓇᓱᑦᑏᑦ ᐊᕐᓀᓗ,” ᑯᐊᑕ ᐅᖃᓚᐅᕐᑐᖅ.
ᓴᖅᑭᑎᑦᓯᓂᕐᒥᓂᒃ ᑲᑎᒪᓂᐊᕈᓯᕐᒥᒃ, ᑯᐊᑕ ᐅᖃᓚᐅᕐᑐᖅ ᐅᓄᕐᓂᕆᔭᖏᑦ ᐃᓄᐃᑦ ᐱᓇᓱᑦᑎᑖᕆᔭᐅᓯᒪᔪᑦ ᒪᕐᕈᓗᐊᖕᖑᐊᖑᔫᓐᓄᑦ ᐅᔭᕋᓐᓂᐊᓂᕐᒥᒃ ᑲᒻᐸᓂᐅᔫᒃ ᑭᓕᐊᖕᑯᐊ ᐅᔮᒃᓚᓐ ᐅᔭᕋᓐᓂᐊᕕᒃ ᐊᒻᒪᓗ ᑲᓀᑎᐊᓐ ᒍᐁᐅᓪᑎᔅ ᐅᓄᕐᓯᒋᐊᓚᐅᕐᑐᑦ 164-ᓂᒃ 290-ᒧᑦ ᐊᕐᕌᒍᐃᑦ ᐊᑯᓐᓂᖏᓐᓂᒃ 2014 ᐊᒻᒪᓗ 2019.
ᑯᐊᑕ ᐅᖃᓚᐅᕐᑐᖅ ᐱᒐᓱᐊᕐᓇᑑᓚᖓᒋᐊᖓᓂᒃ ᓯᕗᓂᕐᒥᒃ ᐱᓇᓱᑦᑎᑖᓕᐅᒥᑎᑦᓯᒐᓱᐊᕐᓂᖅ ᐃᓄᑐᐃᓐᓇᓂᒃ ᑲᒻᐸᓂᐅᔪᓂᒃ ᐅᔭᖃᓐᓂᐊᓂᓕᕆᓂᕐᒥᒃ ᐱᓇᓱᐊᕐᑎᐅᔪᓂᒃ.
ᑖᒃᑯᐊ ᐱᑦᔪᑎᒋᑦᓱᒋᑦ ᖃᐅᔨᔭᐅᓯᒪᓕᕐᑐᑦ, ᑲᐅᑖᐱᒃᑯᑦ ᖃᓄᕐᑑᓂᕐᒧᑦ ᓵᖓ ᓄᐃᑦᓯᓯᒪᓕᕐᑐᖅ ᓄᑖᓂᒃ ᐱᓇᓱᖃᑎᒌᓂᒃ ᐊᑐᐃᓐᓇᐅᖏᓐᓇᖃᑦᑕᕋᔭᕐᑐᓂᒃ ᐱᕙᓪᓕᐊᑎᑦᓯᓂᒃᑯᑦ ᐱᒋᐅᕐᓭᓂᐅᔪᓂᒃ ᐊᒻᒪᓗ ᐅᓄᕐᓯᒋᐊᕆᓂᒃᑯᑦ ᐃᓄᓐᓂᒃ ᐱᓇᓱᑦᑐᓂᒃ ᐱᒍᑦᔨᔨᐅᔪᓂᒃ ᐅᔭᕋᕐᓂᐊᕕᐅᔪᓂᒃ. ᐅᔮᒃᓵᓐ ᐴᓖ ᓴᖅᑭᑎᑦᓯᓂᖃᓚᐅᕐᑐᖅ ᑕᒪᒋᓐᓄᑦ ᐅᔭᕋᓐᓂᐊᓂᕐᒥᒃ ᑲᒻᐸᓂᐅᔫᓐᓄᒃ, ᑐᑭᒧᐊᕐᑎᓯᔨᐅᕗᖅ ᐃᓄᓐᓂᒃ ᐱᓇᓱᒐᑦᓴᖃᕐᑎᓯᓂᕐᒥᒃ ᐅᔭᕋᓐᓂᐊᓂᕐᒥᒃ ᐱᒍᑦᔨᔨᐅᔪᓂᒃ ᐅᔮᒃᓚᓐᑯᓐᓂᒃ ᐊᒻᒪᓗ ᑲᓀᑎᐊᓐ ᒍᐁᐅᑎᔅᑯᓐᓂᒃ, ᐅᔭᕋᓐᓂᐊᕕᓐᓃᖃᑦᑕᓚᖓᔪᖅ ᐃᑲᔪᕆᐊᕐᓯᒪᓗᓂ ᐊᑦᔨᒌᖕᖏᑐᓂᒃ ᐱᒍᑦᔨᔨᐅᔪᓂᒃ.
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐃᒻᒪᖃᐅᑎᓕᐅᕐᓯᒪᓕᕐᑐᖅ ᑮᓇᐅᔭᒐᔭᕐᔪᐊᓂᒃ ᒥᓕᐊᓐᖏᓐᓃᑐᓂᒃ ᐊᕐᕌᒍᕐᓂᒃ ᐊᓂᒍᓕᕐᑐᓂᒃ ᐱᓇᓱᑦᑎᑖᕐᑎᓯᒐᓱᐊᕐᓂᒧᑦ, ᐱᒋᐅᕐᓭᓂᕐᓄᑦ, ᐱᓇᓱᑦᑎᙯᓐᓇᕋᓱᐊᕐᓂᒧᑦ ᐊᒻᒪᓗ ᖁᕝᕙᒋᐊᕆᓂᕐᓄᑦ ᐃᓄᑐᐃᓐᓇᓂᒃ ᐱᓇᓱᑦᑎᐅᔪᓂᒃ ᓄᓇᕕᒻᒥ. ᑲᔪᓯᑎᑕᐅᒍᓐᓇᓂᐊᕐᑐᓂᒃ ᐱᓇᓱᒐᖃᕐᑎᓯᓂᕐᒧᑦ ᐱᒍᑦᔨᕕᖓ ᑐᓂᓯᓲᖅ ᑮᓇᐅᔭᑲᓪᓚᓂᒃ ᐃᑲᔪᕐᓯᐅᑎᑦᓴᓂᒃ ᐱᓇᓱᒐᑦᓴᓂᒃ ᓄᐃᑦᓯᓂᕐᓄᑦ ᐊᒻᒪᓗ ᐱᒋᐅᕐᓭᓂᕐᓄᑦ ᐱᒋᐊᕐᑎᓯᒍᑎᓄᑦ.
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᔪᐃᓐᓇᕈᑦᔨᕗᖅ ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ ᐃᓄᐃᑦ ᐃᓅᓱᑦᑐᖏᑦ ᐃᓚᒌᖑᔪᐃᓪᓗ. ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᔪᓯᐅᑦᔨᖏᓐᓇᓚᖓᔪᖅ ᓴᐳᑦᔨᓂᕐᒥᒃ ᑮᓇᐅᔭᖃᕐᑎᓯᓂᕐᒥᓗ ᐊᒥᓱᒐᓛᓂᒃ ᐱᓇᓱᐊᕐᑎᓯᒍᑎᓂᒃ ᐱᒋᐊᕐᑎᓯᒍᑎᐅᓯᒪᔪᓂᓗ ᑐᕌᒐᕆᔭᖃᕐᑐᓂᒃ ᐱᐅᓯᒋᐊᕆᓂᕐᒥᒃ ᐃᓅᓯᕆᔭᖏᓐᓂᒃ ᓄᓇᕕᒻᒥᐅᖑᔪᑦ.   
ᑐᓴᕆᐊᓪᓛᕈᒪᑐᐊᕈᕕᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᐊᒻᒪᓗ ᑲᔪᓯᑎᑕᐅᒍᓐᓇᓂᐊᕐᑐᓂᒃ ᐱᓇᓱᒐᖃᕐᑎᓯᓂᕐᒧᑦ ᐱᒍᑦᔨᕕᖓᑕ ᖃᓄᐃᓘᕐᑎᐅᓂᖏᑦᑕ ᒥᑦᓵᓄᑦ ᖁᕝᕙᒋᐊᕆᓂᕐᓄᑦ ᓲᖑᔪᑦᓯᐊᓂᒃ ᐊᔪᐃᓐᓇᓯᐊᕐᑐᓂᓪᓗ ᐃᓄᓐᓂᒃ ᐱᓇᓱᑦᑎᓂᒃ ᐅᕗᖓ ᐁᒍᓐᓇᑐᑦ ᖁᒻᒧᐊᑎᑕᐅᓯᒪᔪᒃᑯᑦ http://www.krg.ca/krg-departments/sustainable-employment/employment-training