ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑯᐯᒃ ᐃᕐᖃᑐᐃᕕᓕᕆᓂᕐᒧᑦ ᒥᓂᔅᑕᖓ ᓲᓂᐊ ᓚᐱᐊᓪ ᓄᓇᕕᒻᒥ ᐃᕐᖃᑐᐃᕕᓕᕆᓂᖓᓂᒃ ᐋᕐᕿᒋᐊᕆᒐᓱᐊᓛᕐᑐᖅ

Photoᑯᐯᒃ ᐃᕐᖃᑐᐃᕕᓕᕆᓂᕐᒧᑦ ᒥᓂᔅᑕᖓ ᓲᓂᐊ ᓚᐱᐊᓪ ᐋᕐᕿᒋᐊᕆᒐᓱᐊᓚᖓᓂᕋᕐᑐᖅ ᐊᒥᓱᓂᒃ ᐃᓱᐃᓗᑕᓂᒃ ᐊᐅᓚᑕᐅᓂᖓᑕ ᓄᓇᕕᒻᒥ ᐃᕐᖃᑐᐃᕕᓕᕆᓂᖓᓂᒃ.

“ᐅᖃᕈᒪᕗᖓ ᐃᓕᑦᓯᓄᑦ ᑐᑭᓯᑦᓯᐊᕋᒪ ᖃᓄᐃᑦᑐᒦᒻᒪᖔᑦ,” ᓚᐱᐊᓪ ᓚᓚᐅᕐᑐᖅ ᑲᑎᖕᖓᖃᑕᐅᑦᓱᓂ ᐳᕕᕐᓂᑐᒥ ᐱᖓᔪᐊᓐᓂᐅᑎᓪᓗᒍ ᑲᑎᖕᖓᓯᑦᓱᓂ ᑲᑎᕕᒃ ᓄᓇᓕᓕᒪᑦ ᑲᕙᒪᖓᓂᒃ ᐊᒻᒪᓗ ᒪᑭᕝᕕᑯᓂᒃ.

ᐊᒥᓱᐃᑦ ᐱᓀᓗᑌᑦ ᐅᖄᒍᑕᐅᓚᐅᕐᑐᑦ ᑲᑎᖕᖓᓂᕐᒥ. ᐆᑦᑑᑎᒋᓗᒍ ᑰᑦᔪᐊᒥ ᑐᕐᖃᑌᔨᐅᑉ ᐊᓪᓚᕕᖓ ᐊᒻᒪᓗ ᐱᖁᔭᓕᕆᔨᒃᑯᑦ ᐱᑦᔪᔨᕕᖓᑕ ᐊᓪᓚᕕᖓ ᐅᒃᑯᐊᑕᐅᕐᖃᒥᓚᐅᔫᒃ ᖃᐅᔨᒋᐊᕐᕕᐅᔪᖃᕐᑎᓇᒍ ᐅᕝᕙᓘᓐᓃᑦ ᑐᓴᕐᑎᓯᔪᖃᕐᑎᓇᒍ. ᖃᖓᑦᑕᐅᑎᑦᓴᓄᑦ ᑮᓇᐅᔭᕐᑑᑎᑦᓴᖏᑦ ᖃᐅᔨᒪᔨᒋᔭᕕᓃᑦ ᑐᓴᕐᑕᐅᒋᐊᕐᑐᕈᑎᑦᓴᖏᑦ ᓄᖑᑎᕐᑕᐅᒋᐊᕐᑐᕕᓃᑦ ᐊᒻᒪᓗ ᐊᒥᓱᐃᑦ ᐱᖁᔭᓕᕆᓂᕐᒧᑦ ᐱᑦᔪᔨᕖᑦ ᓄᖑᑎᕐᑕᐅᓯᒪᓕᕐᑐᑦ.

‘’ᖃᓄᖅ ᓯᕗᒧᐊᒍᓐᓇᕿᑕ ᐱᑦᔪᔨᕖᑦ ᐅᒃᑯᐊᑕᐅᑐᐃᓐᓇᖃᑦᑕᑎᓪᓗᒋᑦ. ᒫᓐᓇ ᖃᓄᐃᑦᑐᒦᓐᓂᕗᑦ ᐅᖁᒣᑦᑐᖅ. ᑯᐯᒃᑯᑦ ᐱᑦᔪᔨᕕᓐᓂᒃ ᓄᓇᕕᒻᒥ ᐋᕐᕿᒋᐊᕆᑦᓴᓚᐅᕐᐸᑕ,’’ KRG-ᑯᑦ ᐊᖓᔪᕐᖄᖓ ᔨᐊᓂᕙ ᒪᓂᖅ ᐅᖃᐅᑏᓚᐅᕐᑐᖅ ᒥᓂᔅᑕᒥᒃ ᑲᑎᖕᖓᓯᑦᓱᑎᒃ. ‘’ᐋᕐᕿᒋᐊᕈᑎᑦᓴᓕᐊᓗᕋᑕᐅᕗᒍᑦ. ᐃᓅᖃᑎᕗᑦ ᐱᐅᓂᕐᓴᒥᒃ ᐱᒍᓐᓇᕆᐊᓖᑦ”

ᒥᓂᔅᑕ ᐅᖃᓚᐅᕐᑐᖅ ᑐᑭᓯᑦᓯᐊᓂᕋᕐᓱᓂ ᑕᖃᓗᖂᒥᒍᑎᐅᕙᓪᓛᔪᓂᒃ KRG-ᑯᑦ ᐊᖓᔪᕐᖄᖓᓄᑦ. ᐃᑲᔪᕐᑐᕈᒪᑦᓯᐊᑐᖅ KRG-ᑯᑦ ᑐᑦᓯᕋᐅᑎᖓᓂᒃ ᓄᐃᑦᓯᕙᓪᓕᐊᒍᒪᓂᕐᒥᒃ ᑕᕐᕋᓕᔮᕈᑎᒃᑯᑦ ᐃᕐᖃᑐᐃᕕᖃᕈᓐᓇᓯᓂᕐᒥᒃ ᓄᓇᕕᒻᒥ ᓱᑲᓯᐅᒥᑎᑦᓯᒐᔭᖁᒧᑦ ᐱᖁᔭᓕᕆᓂᐅᑉ ᐊᐅᓚᑕᐅᓂᖓᓂᒃ ᐊᒻᒪᓗ ᐃᑭᓪᓖᒋᐊᕋᔭᖁᒧᑦ ᐊᐅᓚᒍᑎᖏᑦᑕ ᐊᑭᑐᒨᓂᖓᓂᒃ. ᕿᓚᓈᕈᑎᖃᓚᐅᕐᑐᖅ ᑲᑎᖕᖓᓂᖃᓛᓕᕐᓂᖓᓂᒃ ᑕᒪᑐᒪ ᐃᓱᐃᓗᑕᐅᑉ ᒥᑦᓵᓄᑦ ᑕᕐᕿᐅᓚᖓᔪᒥ ᐊᒻᒪᓗ ᕿᑲᐅᑦᔭᐅᑐᐃᓐᓇᓛᕈᓐᓀᖁᔨᑦᓱᓂ ᑕᒪᑐᒥᖓ.  

ᒥᓂᔅᑕ ᐃᑲᔪᕐᑐᕈᒪᓂᖃᑦᓯᐊᓂᖓ ᐊᒥᓱᓂᒃ ᐊᐅᓚᑦᔭᕆᐊᒍᑎᐅᓯᒪᔪᓂᒃ KRG-ᑯᓄᑦ ᓂᕆᐅᓐᓇᓯᑦᓯᐊᑐᖅ ᓯᕗᓂᕐᒥ, ᓂᕆᐅᓐᓂᖃᑦᓯᐊᒍᓇᐅᓕᕐᑐᒍᑦ ᐊᓯᑦᔨᒋᐊᕈᑕᐅᒍᓐᓇᑐᓂᒃ. ᑎᑭᓯᒪᓂᖓᓂ, ᑲᑎᖕᖓᓯᓂᖓ ᓄᓇᕕᐅᑉ ᓄᓇᓕᖏᑦᑐ ᐱᖁᔭᓕᕆᕕᖏᓐᓂᒃ ᐱᐅᔫᓚᐅᕐᑐᖅ, ᐱᓂᕐᓗᑕᐅᓯᒪᔪᐃᑦ ᓴᐳᒻᒥᔨᖓᓂᒃ ᐃᓄᑦᔪᐊᒥ ᐊᒻᒪᓗ ᐱᓇᓱᑦᑎᖏᓐᓂᒃ ᓴᕿᔫᑉ ᐱᓂᐊᕐᓂᖓᓄᑦ ᐳᕕᕐᓂᑐᒥ.    

‘’ᑐᕐᑲᑌᔨᐅᑦᓱᖓ ᐅᑭᐅᕐᑕᑐᒨᕐᓯᒪᕗᖓ 2000-ᖑᑎᓪᓗᒍ. ᑕᒪᒻᓇ ᓯᕗᒧᐊᕐᑎᒍᒪᔭᕋ ᐊᒻᒪᓗ ᓵᖕᖓᔭᖃᕐᓗᖓ ᒥᑭᔫᓈᕐᑎᑐᓂᒃ. ᒥᑭᔫᓈᕐᑎᑐᓂᒃ ᓵᖕᖓᓯᑐᐊᕈᑦᑕ ᐊᖏᓂᕐᓴᒥ ᑕᑯᕐᖂᑕᑦᑎᓂᒃ ᐊᓯᐅᔨᑐᐃᓐᓇᓛᖕᖏᓇᑦᑕ.’’ ᓚᕆᐊᓪ ᓚᓚᐅᔪᖅ ᑲᑎᖕᖓᓂᕐᒥ.