ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑯᐯᒃ ᐃᕐᖃᑐᐃᕕᓕᕆᓂᕐᒧᑦ ᒥᓂᔅᑕᖓ ᓲᓂᐊ ᓚᐱᐊᓪ ᐅᖃᕆᐊᓪᓚᑐᖅ ᐱᓂᕐᓗᑕᐅᓯᒪᔪᐃᑦ ᓴᐳᒻᒥᔨᖏᑦ ᓄᓇᕕᒻᒥ ᖃᓄᐃᓘᕐᑎᐅᓂᖏᑦᑕ ᐱᒻᒪᕆᐅᓂᖏᓐᓂᒃ

 

Inukjuak Copyᓄᓇᕕᒻᒨᕆᐅᕐᓱᓂ ᑯᐯᒃ ᐃᕐᖃᑐᐃᕕᓕᕆᓂᕐᒧᑦ ᒥᓂᔅᑕᖓ ᓲᓂᐊ ᓚᐱᐊᓪ ᐅᖃᓚᐅᕐᑐᖅ ᐱᒻᒪᕆᐅᒋᐊᖓ ᐱᓂᕐᓗᑕᐅᓯᒪᔪᐃᑦ ᓴᐳᒻᒥᔭᐅᕕᖓ ᐃᑲᔪᕐᑕᐅᒋᐊᓕᓐᓄᑦ ᐅᖁᒣᑦᑐᑰᕐᑐᓄᓪᓗ.

ᐃᕐᖃᑐᐃᕕᓕᕆᓂᕐᒧᑦ ᒥᓂᔅᑕ ᐃᓄᑦᔪᐊᒦᑦᓱᓂ ᑕᑯᓂᐊᕐᑎᑕᐅᓚᐅᕐᑐᖅ ᓴᐳᒻᒥᔩᑦ ᐊᓪᓚᕕᖓᓂᒃ. ᓚᐱᐊᓪ ᖃᐅᔨᑎᑕᐅᓚᐅᕐᑐᖅ 2004-ᖑᑎᓪᓗᒍ ᖃᓄᐃᓘᕐᓂᕆᓚᐅᕐᔭᖓᓂᒃ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᓄᐃᑦᓯᓂᖃᕐᑎᓗᒍ ᐱᓂᕐᓗᑕᐅᒪᔪᐃᑦ ᐃᑲᔪᕐᑕᐅᕕᖓᓂᒃ ᓴᐳᒻᒥᔨᓂᒃ ᑮᓇᐅᔭᖃᕐᑎᑕᐅᑦᓱᑎᒃ ᑯᐯᒃ ᐃᕐᖃᑐᐃᕕᓕᕆᓂᕐᒧᑦ ᑐᕐᖃᑕᕐᕕᖓᓄᑦ. 15 ᐊᕐᕌᒍᐃᑦ ᐊᓂᒍᕐᑐᖅ ᓄᐃᑕᐅᓂᕆᓯᒪᔭᖓᑕ, ᓴᐳᒻᒥᔩᑦ ᐊᑑᑎᖃᓪᓚᕆᒋᐊᖓ ᐃᑲᔪᕐᓯᒪᓂᕐᒥᒃ ᑯᐯᒃ ᐃᕐᖃᑐᐃᕕᓕᕆᓂᖓᓂᒃ.   

ᓚᐱᐊᓪ ᒪᓕᑦᑕᐅᓚᐅᕐᑐᖅ ᑲᕙᒪᐅᑉ ᐱᓇᓱᑦᑎᖏᓐᓄᑦ ᐊᒻᒪᓗ ᒪᑭᕝᕕᑯᑦ ᑭᒡᒐᑐᕐᑎᖏᓐᓄᑦ ᐊᒻᒪᓗ ᓄᓇᓕᐅᑉ ᐃᕐᖃᑐᐃᕕᐊᐱᓕᕆᔨᖏᓐᓄᑦ. ᑭᒡᒐᑐᕐᑐᐃᑦ ᑲᑎᓯᓚᐅᕐᑐᑦ KRG-ᑯᑦ ᐱᖁᔭᓕᕆᓂᕐᒧᑦ, ᐃᓅᖃᑎᒌᓐᓂᒧᑦ-ᐱᖁᔭᓕᕆᓂᕐᒧᑦ ᐊᒻᒪᓗ ᒧᓂᓯᐹᓕᑏᑦ ᐊᐅᓚᑕᐅᓂᖏᓐᓄᑦ ᑲᒪᔨᖓᓂᒃ ᔪᐋᓐ ᕗᕐᑌᒥᒃ ᐊᒻᒪᓗ ᓴᐳᒻᒥᔩᑦ ᐱᓇᓱᑦᑎᖓᓂᒃ ᐁᑕ ᓇᔪᒻᒥᐊᓗᒻᒥᒃ. ᓇᔪᒻᒥᐊᓗᒃ ᑐᑭᓯᑎᑦᓯᓚᐅᕐᑐᖅ ᐃᑲᔪᕐᓯᓴᐅᑎᒋᒋᐊᖃᕐᓂᒥᒃ ᐱᓂᕐᓗᑕᐅᒪᔪᓂᒃ , ᐊᒻᒪᓗ ᐱᓂᕐᓗᑕᐅᒪᔪᐃᑦ ᓴᐳᒻᒥᔨᖏᑦ ᒪᓕᒍᓐᓇᕆᐊᖏᓐᓂᒃ ᐃᕐᖃᑐᐃᕕᒃᑰᓂᖏᓐᓂᒃ ᐊᒻᒪᓗ ᐃᑲᔪᕐᓗᑎᒃ ᐅᖁᒣᑦᑐᑰᕐᓂᖏᓐᓂᒃ ᖃᓄᐃᑦᑐᑰᕐᓂᒥᓂ.

ᑐᓂᓯᒪᑦᓯᐊᑐᑦ ᐃᓄᐃᑦ ᓴᐳᒻᒥᔨᖏᑦ ᐱᓂᕐᓗᑕᐅᓯᒪᔪᓂᒃ ᐃᑲᔪᕐᑏᑦ, ᑐᑭᓯᑎᑦᓱᒋᑦ ᐱᔪᓐᓇᐅᑎᖏᑦ ᐊᒻᒪᓗ ᐱᖁᔭᑎᒍᑦ ᖃᓄᐃᓘᕈᓐᓇᐅᑏᑦ, ᐊᒻᒪᓗ ᖃᐅᔨᒋᐊᕐᕕᓴᓂᒃ ᐃᑲᔪᕐᑕᐅᕕᑦᓴᓂᒃ ᑐᑭᓯᑎᑦᓱᒋᑦ.

ᓴᐳᒻᒥᔩᑦ ᐊᓪᓚᕕᓖᑦ ᑰᑦᔪᐊᒥ, ᓴᓪᓗᓂ, ᑰᑦᔪᐊᕌᐱᒻᒥ, ᐃᓄᑦᔪᐊᒥ ᐊᒻᒪᓗ ᐳᕕᕐᓂᑐᒥ, 7-ᓂᒃ ᐃᓄᑐᐃᓐᓇᓂᒃ ᓴᐳᒻᒥᔨᖃᕐᓱᑎᒃ ᐱᑦᔪᔨᕕᒻᒥᓂ. ᓴᐳᒻᒥᔩᑦ ᐱᑦᔪᔨᕕᖏᑦ ᑐᓴᐅᒪᔭᐅᒋᐊᖃᖕᖏᑐᓂᒃ ᐅᖄᓲᖑᖕᖏᑐᐃᑦ, ᐊᑭᖃᕋᑎᒃ, ᐊᒻᒪᓗ ᐊᑐᐃᓐᓇᐅᓯᐊᕐᓱᑎᒃ ᖃᓪᓗᓈᑎᑐᑦ ᐊᒻᒪᓗ ᐃᓄᑦᑎᑐᑦ. ᐱᓂᕐᓗᑕᐅᓯᒪᔪᐃᑦ ᐃᑲᔪᕐᑕᐅᒍᒪᒍᓐᓇᑐᑦ ᐱᓂᕐᓗᑕᐅᓂᕕᓂᖓ ᐊᑯᓂᓂᑕᐅᒐᓗᐊᕐᐸᑦ.