ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑯᐯᒃᒥ ᓂᕈᐊᕐᑐᐃᑦ ᖃᓄᐃᓕᓚᐅᕐᓂᖏᓐᓄᑦ

ᑰᔾᔪᐊᖅ ᑯᐯᒃ, ᐅᑦᑑᐱᕆ 2, 2018 - ᑭᒡᒐᑐᕐᓱᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑦ, ᑖᓐᓇ ᐃᑦᓯᕙᐅᑕᖓᑦ ᔨᐊᓂᕙ ᒪᓂᒃ ᐊᒻᒪᓗ ᐳᕐᑐᓂᕐᓭᑦ ᑲᑎᒪᔨᐊᐱᖏᓐᓄᑦ ᐃᓚᐅᔪᐃᑦ ᐅᐱᒍᓲᑎᖃᕐᐳᑦ ᑖᓐᓇ ᑯᐯᒃᒥ ᐊᖓᔪᕐᖄᕆᔭᐅᓂᐊᓕᕐᑐᖅ ᓂᕈᐊᕐᑕᐅᓂᒃᑯᑦ ᕗᕋᓐᓱᐊ ᓕᑰ ᑖᒃᑯᓂᖓ ᑎᒥᖁᑎᒥᓂᒃ Coalition Avenir Quebec-ᑯᓂᒃ ᐅᓄᕐᓂᓴᐅᓂᖃᕐᓱᑎᒃ ᓵᓚᖃᓚᐅᕐᒪᑕ ᐃᑉᐸᓴᖅ ᓂᕈᐊᕐᓂᖃᕐᑎᓗᒍ ᑯᐯᒃᒥ.

"ᑲᑎᕕᒃᑯᑦ ᓯᕗᓂᖃᓚᖓᓕᕐᑐᑦ ᐱᓇᓱᐊᖃᑎᖃᓚᖓᓕᕆᐊᒥᒃ ᑖᑦᓱᒥᖓ ᓄᑖᒥᒃ ᑲᕙᒪᐅᓚᖓᓕᕐᑐᒥ ᑕᒪᒃᑯᓂᖓ ᐱᒻᒪᕆᐅᓂᖃᕐᑐᓂᒃ ᓄᓇᓕᓕᒫᑎᒍᑦ ᐱᑦᔪᑕᐅᔪᓂᒃ, ᐊᒥᓲᓂᕐᓴᑎᒍᑦ, ᓇᒻᒪᓈᕐᓯᒪᖃᑕᐅᒻᒪᑕ ᑯᐯᓕᒫᒥ ᓯᕗᓪᓕᐅᔭᐅᒪᓂᖃᕐᑐᓄᑦ," ᑌᒣᓕᑦᓱᓂ ᐅᖃᓚᐅᕐᑐᖅ ᔨᐊᓂᕗ. "ᑕᒪᒃᑯᐊ ᐃᓚᖃᕐᒪᑕ ᓄᖑᑉᐸᓕᐊᖏᑐᓂᒃ ᒪᑭᑕᒐᓱᐊᕈᑏᑦ ᐱᕙᓪᓕᐊᑎᑕᐅᓂᖏᓐᓂᒃ, ᐱᓇᓱᒐᑦᓭᑦ ᐱᕕᑦᓴᐅᑎᑕᐅᓂᖏᓐᓂᒃ, ᐱᐅᔪᑦᓯᐊᓂᒃ ᒥᓂᓯᐹᓕᑎᒃᑯᑦ ᐱᒍᑦᔨᒍᑎᖏᓐᓄᐊᖓᔪᓂᒃ, ᐊᒻᒪᓗᑦᑕᐅᖅ ᐊᕐᕿᓱᕐᑕᐅᔪᖃᖃᑦᑕᓗᓂ ᑫᓪᓗᑐᐃᒍᑎᐅᓂᐊᕐᑐᓂᒃ ᐃᓅᓯᕐᒥᒃ ᑎᒍᒥᐊᕐᑎᓯᓂᕐᒥᒃ ᓄᓇᓕᑦᑎᓂ.

 

20-ᓂᒃ ᐊᕐᕌᒍᓯᒪᓕᕐᑐᓂᒃ, ᓄᓇᕕᐅᓪᓗ ᑯᐯᒃᑯᓗ ᐱᓂᐊᕐᓂᓕᕆᔨᖏᑦᑕ ᓯᕗᓕᕐᓯᔨᖏᑦ ᐊᕐᕿᓱᐃᓯᒪᓕᕐᒪᑕ ᐃᓅᖃᑎᒌᓐᓂᖃᖕᖏᑐᐃᑦ ᖃᓄᐃᓕᐅᖃᑎᒌᓐᓂᖏᓐᓂᒃ ᑐᑭᒧᐊᑦᑎᓯᓂᒃᑯᑦ ᐱᓇᓱᐊᒐᖃᒻᒪᕆᓐᓂᑯᓪᓗ ᐊᒥᓱᒻᒪᕆᓐᓂᒃ ᐱᕕᑦᓴᓂᒃ ᑕᒣᓐᓄᑦ ᐱᔪᑦᓴᐅᔮᕈᑕᐅᔪᓂᒃ. ᑲᑎᕕᒃᑯᑦ ᓯᕗᓂᖃᕐᒪᑕ ᑲᔪᓯᑎᑦᓯᒍᒪᒋᐊᒥᒃ ᑕᒪᑦᓱᒥᖓ ᖃᓄᐃᓕᐅᖃᑎᒌᓐᓂᒥᒃ ᐃᓚᖃᕐᓗᑎᒃ ᑖᒃᑯᓂᖓ ᓂᕈᐊᕐᑕᐅᖃᒻᒥᐅᓕᕐᑐᓂᒃ ᑯᐯᒃᑯᑦ ᑲᕙᒪᖓᓂᒃ. ᑕᒪᓐᓇ ᐱᓪᓗᒍ, ᐱᒻᒪᕆᐅᓂᖃᕐᒥᒪᑦ ᐃᓕᑕᕆᔭᖃᑦᓯᐊᕆᐊᖃᕆᐸᒥᒃ ᑖᒃᑯᐊ Liberal-ᑯᑦ ᑲᕙᒪᒋᓚᐅᕐᑕᖏᑦ Philippe Couillard-ᒥᒃ ᐱᓇᓱᐊᖃᑎᖃᑦᓯᐊᖃᑦᑕᓚᐅᕐᓂᖓᓄᑦ ᑲᑎᕕᒃᑯᓂᒃ ᑖᒃᑯᓇᓂ ᓯᑕᒪᐅᓚᐅᕐᑐᓂᒃ ᐊᕐᕌᒍᕐᓂᒃ ᐊᒻᒪᓗ ᑐᓂᕐᕈᑎᖃᑦᓯᐊᓚᐅᕐᓂᖓᓄᑦ ᐱᐅᓯᓕᐅᒥᑎᑕᐅᒐᓱᐊᕐᑎᓗᒍ ᐃᓅᓯᖃᑦᓯᐊᑎᑦᓯᓂᖅ ᓄᓇᕕᒻᒥ.