ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑯᐯᒃ ᑮᓇᐅᔭᕐᑕᓰᔪᖅ $6.5 ᒥᓕᐊᓐ ᐅᖓᑖᓅᕐᑐᓂᒃ ᒪᕐᕈᐃᓄᑦ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᒑᓐᓄᑦ ᓄᓇᕕᒻᒥ

ᑰᑦᔪᐊᖅ, ᐊᐅᒍᓯᑎ 10 2018. – The Gouvernement du Québec ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄ (ᑫᐋᔩ) ᒪᓂᔨᔪᖅ $6,528,572 ᑮᓇᐅᔭᖃᕐᑎᓯᐅᑎᐅᓚᖓᔪᓂᒃ ᐊᕐᕌᒍᓂ ᐱᖓᓱᓂ ᒪᕐᕈᐃᓄᑦ ᐱᒻᒪᕇᓐᓄᑦ ᐃᓄᐃᑦ ᐱᓇᓱᒐᕐᑖᑎᑕᐅᒋᐊᕐᓂᖏᓐᓄᑦ ᐃᓕᓐᓂᐊᑎᑦᓯᓃᓐᓄᑦ ᐱᓇᓱᒑᓐᓄᑦ ᓄᓇᕕᒻᒥ.

 

ᔮᓐ ᐳᑦᓴ, ᑯᐯᑉ ᐅᖃᕐᕕᒪᕆᖓᓂ ᑭᒡᒐᑐᕐᑎ ᐅᖓᕙᒥ ᐊᒻᒪᓗ ᐱᖁᔭᓕᐅᕐᕕᒥ ᓇᐹᕐᑐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ ᑐᕐᖃᑕᕐᕕᐅᑉ ᐃᑲᔪᕐᑎᖓ, ᐅᓗᒥ ᑐᓴᕐᑎᓯᔫᒃ ᑰᑦᔪᐊᒥ ᑭᒡᒐᑐᕐᓱᒍ ᐱᓇᓱᒐᑦᓴᓕᕆᓂᕐᓄᑦ ᐊᒻᒪᓗ ᐃᓅᖃᑎᒌᓂ ᑖᒃᑯᓂᖓᑦᓭᓇᖅ ᑐᕌᒐᖃᕐᑎᓯᓂᕐᓄᑦ ᑐᕐᖃᑕᕐᕕᒃ, ᕗᔮᓐᓱᐊ ᐸᓓ.

ᐅᓄᕐᓂᓖᑦ $3,445,378-ᓂᒃ ᑐᕌᕐᑐᑦ ᑲᐅᑖᐱᒃᑯᑦ ᐱᓇᓱᒐᕐᒧᑦ, ᑐᕌᒐᓕᒻᒧᑦ ᐃᓕᓐᓂᐊᑎᑕᐅᓂᑦᓴᖏᓐᓄᑦ 354 ᐃᓄᐃᑦ ᐃᓕᐅᕐᖃᓚᖓᑎᓪᓗᒋᑦ 308-ᓄᑦ ᐅᔭᕋᕐᓂᐊᕕᓐᓂ ᐱᓇᓱᒐᕐᓄᑦ ᐆᒪ Nord-du-Québec ᓄᓇᓕᓕᒫᖓᓂ. ᓴᓇᔩᑦ ᐱᓇᓱᒐᖅ, ᑲᒪᒋᔭᖃᓪᓚᕆᑦᑐᖅ ᐱᕙᓪᓕᐊᑎᑦᓯᓂᕐᓂᒃ ᓲᔪᓂᒃ ᓴᓇᔨᓂᒃ ᐱᓇᓱᐊᕈᓐᓇᓯᑎᓗᒋᑦ, ᐱᓚᖓᔪᖅ $3,083,194-ᓂᒃ ᑮᓇᐅᔭᖃᕐᑎᓯᐅᑎᓂᒃ ᐃᑲᔪᕐᓯᓗᒋᑦ ᐃᓕᓐᓂᐊᑎᑕᐅᓂᖏᑦ 525 ᐱᓇᓱᑦᑏᑦ ᐊᒻᒪᓗ ᓄᐃᑎᕐᓗᒋᑦ 300 ᐱᓇᓱᐊᕋᑦᓭᑦ. ᐃᓚᒋᔭᐅᑦᓱᑎᒃ ᑫᐋᔩᒧᑦ, ᐅᔭᕋᕐᓂᐊᓂᕐᓂᒃ ᐊᒻᒪᓗ ᓴᓇᓂᕐᓂᒃ ᑎᒥᐅᒍᑎᓖᑦ ᐃᑲᔪᕐᓯᒪᖃᑕᐅᒻᒥᔪᑦ ᑖᒃᑯᓂᖓ ᐱᒻᒪᕆᓐᓂᒃ ᓄᐃᑕᐅᓚᖓᔪᓂᒃ.

ᐅᖃᐅᓯᐅᖃᑦᑕᑐᑦ:

“ᑲᕙᒪᕗᑦ ᐱᑐᑦᓯᒪᒍᑎᑕᖃᕐᑎᓯᔪᖅ ᐱᒻᒪᕆᐅᓂᖓᓂᒃ ᒪᑭᑕᒐᓱᐊᕐᓂᐅᑉ ᐱᕙᓪᓕᐊᓂᖓᑕ ᑕᕐᕋᒥ ᐊᒻᒪᓗ ᓄᓇᓕᓐᓂᒃ ᐱᕙᓪᓕᖁᑎᑖᒍᓚᕿᔪᓂᒃ ᑎᒎᓪᓚᖃᑦᑕᖁᔨᑦᓱᓂ. ᑖᒃᑯᐊ ᐱᓇᓱᒉᑦ ᐃᑲᔪᕐᓯᓚᖓᔪᑦ ᐃᓄᓐᓂᒃ ᐱᕙᓪᓕᐊᑎᑦᓯᒋᐊᕐᑎᓗᒋᑦ ᐱᓇᓱᐊᕐᓗᑎᒃ ᐱᔪᓐᓇᐅᑎᑦᓴᒥᓂᒃ ᐊᒻᒪᓗ ᓄᐃᑎᓚᕿᓗᒋᑦ ᐱᔪᓐᓇᓯᐊᕐᓂᓭᑦ ᓄᓇᓕᓐᓂ ᐱᓇᓱᑦᑏᑦ ᐱᓇᓱᑦᑎᖁᑎᓕᒻᒥᒃ ᐱᕙᓪᓖᒍᓐᓇᓯᐊᖃᑦᑕᓚᖓᓕᕐᓗᑎᒃ. ᐅᓪᓗᒥ ᑯᐯᒻᒥ ᐃᓗᐃᒃᑲᑎᒍᑦ ᐱᓇᓱᒐᑦᓴᖃᕐᑎᓯᓂᕐᒥ, ᑖᓐᓇ ᑮᓇᐅᔭᑎᒍᑦ ᓴᐳᑦᔨᓂᖅ ᐃᓚᒋᔭᐅᔪᖅ 2018-2023-ᒧᑦ ᑯᐯᒻᒥ ᐱᓇᓱᑦᑎᖃᑦᓯᐊᓂᕐᓄᑦ ᐋᕐᕿᓯᒪᐅᑎᓕᐊᒍᓯᒪᔪᒧᑦ, ᒪᓂᔨᒍᑕᐅᓯᒪᓕᕐᑐᒧᑦ $1.3 ᐱᓕᐊᑲᓵᓂᒃ ᐊᑐᕐᑕᐅᔪᑦᓴᐅᑎᓪᓗᒋᑦ ᑐᑭᖃᑦᓯᐊᑐᓂᒃ ᑲᔪᓯᒍᓐᓇᑎᑦᓯᐅᑎᓕᐅᕐᓂᓄᑦ, ᐃᓚᐅᑎᓪᓗᒋᑦ ᑐᕃᓐᓇᑐᑎᒍᑦ ᓴᐳᑦᔨᓯᒪᓃᑦ ᐱᓇᓱᒐᑦᓴᖃᕐᕕᓄᑦ ᐃᓚᒋᓕᐅᑎᑎᑕᐅᓂᖏᓐᓂᒃ ᐊᒻᒪᓗ ᐱᓇᓱᒐᑦᓴᖃᕐᑎᑕᐅᓂᖏᓐᓄᑦ ᑲᔪᓯᓚᖓᔪᓂᒃ ᓄᓇᓕᑐᖃᑦᓴᔦᑦ ᐊᒻᒪᓗ ᐃᓄᐃᑦ.”

ᕗᔮᓐᓱᐊ ᐸᓓ, ᑐᕐᖃᑕᕐᕕᒃ ᐱᓇᓱᒐᑦᓴᖃᕐᑎᓯᕐᓂᓄᑦ ᐊᒻᒪᓗ ᐃᓅᖃᑎᒌᓂ ᑖᒃᑯᓭᓐᓇᓂᒃ ᑐᕌᒐᖃᕐᓂᓄᑦ

“ᐃᓄᐃᑦ ᐅᓄᕐᓂᓴᖏᑦ ᐅᕕᒃᑲᐅᕗᑦ ᐊᒻᒪᓗ ᐱᔪᓐᓇᓯᒍᓐᓇᓯᐊᕐᓂᒥᒃ ᑕᑕᑦᓱᑎᒃ. ᐅᐱᒪᔪᖓ ᑲᕙᒪᑦᑎᓂᒃ ᐊᐅᓚᑦᔦᒋᐊᕐᓂᖃᕐᒪᑦ ᑕᑯᑦᓴᓯᐊᓂᒃ, ᐃᓗᒡᒍᓯᖅ ᐃᓱᒪᒋᑦᓱᒍ ᐋᕐᕿᒋᐊᕐᓯᒪᔪᓂᒃ ᐊᐅᓚᑦᔦᒋᐊᕈᑎᖃᕐᓱᑎᒃ ᓴᐳᑦᔭᐅᒍᑎᖏᓐᓂᒃ ᐃᓄᐃᑦ ᐱᓇᓱᑦᑏᑦ ᓄᓇᕕᒻᒥ. ᑲᐅᑖᐱᒃᑯᑦ ᐊᒻᒪᓗ ᓴᓇᔩᑦ ᐱᓇᓱᒑᒃ ᐱᕙᓪᓕᖁᑎᖃᓚᐅᔫᒃ ᐱᓇᓱᑦᑎᑖᕐᓂᑐᐃᓐᓇᐅᖏᑦᑐᒧᑦ, ᑭᓯᐊᓂ ᑎᒥᐅᓂᑎᒍᑦ ᐱᓇᓱᐊᖃᑎᑦᓴᑖᕐᓗᑎᒃ, ᐊᑐᐃᓐᓇᐅᖃᑦᑕᓚᖓᓕᕐᑎᓗᒋᑦ ᓈᒻᒪᑐᓂᒃ ᐱᔪᓐᓇᐅᑎᓖᑦ ᓄᓇᓕᓐᓂ ᐱᓇᓱᑦᑎᓭᑦ. ᑖᒃᑯᐊ ᐱᓇᓱᒑᒃ ᓴᐳᑦᔨᓂᖃᓚᖓᔫᒃ ᓄᓇᕕᒻᒥ ᒪᑭᑕᒐᓱᐊᕐᓂᒥᒃ ᐊᒻᒪᓗ ᐱᐅᓯᑎᑦᓯᓕᐅᒥᓗᑎᒃ ᐃᓅᓯᕐᒥᓂ ᐃᓱᕐᕆᒍᑎᑦᓴᖏᓐᓂᒃ ᓄᓇᕕᒻᒥᐅᑦ.”
ᔨᐊᕗᔨ ᑭᐊᓕ, ᑐᕐᖃᑕᕐᕕᒃ ᑲᒪᒋᔭᓕᒃ ᓄᓇᖃᕐᖄᑐᕕᓂᓕᕆᓂᕐᓂᒃ

“ᑐᓂᔨᕕᒋᓗᒋᑦ ᐊᒥᓱᑦ 100-ᐃᑦ ᓄᓇᕕᒻᒥᐅᑦ ᐊᑐᐃᓐᓇᖃᕈᓐᓇᓯᐅᑎᖏᓐᓂᒃ ᐊᑭᓕᕐᑐᑕᐅᑦᓯᐊᕕᓐᓂᒃ ᐱᓇᓱᒐᕐᓂᒃ ᐊᓇᕐᕋᒥᑕ ᓴᓂᐊᓂ, ᑖᒃᑯᐊ ᐱᓇᓱᑦᑎᓴᓕᐅᕐᓂᓄᑦ ᐃᓕᓐᓂᐊᑎᑦᓯᓃᑦ ᐱᓇᓱᒉᑦ ᓈᒻᒪᑐᓂᒃ ᐱᕙᓪᓖᓯᒪᓚᖓᔪᑦ ᓄᓇᕕᒻᒥ ᐃᓅᖃᑎᒌᓐᓂᒥᒃ ᐊᒻᒪᓗ ᒪᑭᑕᒐᓱᐊᕐᓂᒥᒃ. ᐊᓕᐊᑉᐳᖓ ᑲᕙᒪᕗᑦ ᑲᔪᖏᕐᑐᐃᓕᕐᒪᑦ ᖃᑭᒋᐊᕐᕖᑦ ᐱᕈᕐᐸᓕᐊᓂᖏᓐᓂᒃ ᐊᒻᒪᓗ ᓄᐃᑎᕐᑕᐅᒋᐊᓚᖓᓕᕐᓱᑎᒃ ᐃᓕᓐᓂᐊᑎᑕᐅᓂᖏᑦ ᓄᓇᓕᓐᓂ ᐱᓇᓱᐊᕐᑐᓭᑦ.”
ᔮᓐ ᐳᑦᓴ, ᑯᐯᑉ ᐅᖃᕐᕕᒪᕆᖓᓂ ᑭᒡᒐᑐᕐᑎ ᐅᖓᕙᒥ ᐊᒻᒪᓗ ᐱᖁᔭᓕᐅᕐᕕᒥ ᓇᐹᕐᑐᓄᑦ, ᐆᒪᔪᓄᑦ ᐊᒻᒪᓗ ᒥᕐᖑᐃᓯᕐᕕᓄᑦ ᑐᕐᖃᑕᕐᕕᐅᑉ ᐃᑲᔪᕐᑎᖓ
 


“ᓴᓇᔩᑦ ᐊᒻᒪᓗ ᑲᐅᑖᐱᒃᑯᑦ ᐱᓇᓱᒑᒃ ᓄᐃᑕᓗᑎᒃ ᑭᓯᐊᓂᐅᕘᒃ ᓄᓇᕕᐅᑉ ᒪᑭᑕᒐᓱᐊᕐᓂᓂᒃ ᐱᕙᓪᓕᐊᓂᖓᓄᑦ ᐊᒻᒪᓗ ᐃᒻᒥᓂᕐᓱᕈᓐᓇᓯᓂᕐᓄᑦ. ᐃᓚᓖᒃ ᐊᑦᔨᒌᖕᖏᑐᓂᒃ ᐱᓇᓱᒐᕐᓂᒃ ᐊᒥᓱᓄᑦ ᐃᓄᓐᓄᑦ ᑐᓱᓕᕐᓇᕈᓇᕐᓂᒃ ᖃᐅᔨᒪᓂᕐᒥᓂᒃ ᐊᒻᒪᓗ ᐱᓇᓱᐊᕈᓐᓇᐅᑎᒥᓂᒃ ᐱᕙᓪᓕᒋᐊᕐᑎᓯᒍᒪᔪᓄᑦ, ᓄᑖᓂᓪᓗ ᐱᓇᓱᐊᕆᐅᕈᒪᔪᓄᑦ ᐅᕝᕙᓘᓐᓃᑦ ᓄᑖᓂᒃ ᐱᓇᓱᒐᕐᓴᑖᕈᒪᔪᓄᑦ. ᑲᔪᓯᓂᒋᒃ ᑖᒃᑯᐊ ᒪᕐᕈᐃᒃ ᑫᐋᔩᒧᑦ ᓴᐳᒻᒥᔭᐅᓂᓖᒃ ᐱᓇᓱᒑᒃ ᒪᓂᔨᒍᑕᐅᓚᖔᔫᒃ ᓄᓇᕕᒻᒥᐅᓄᑦ ᐱᓇᓱᒐᑦᓴᒋᐊᓪᓚᓂᒃ ᐊᒻᒪᓗ ᐃᓕᓐᓂᐊᕋᑦᓴᒋᐊᓪᓚᓂᒃ ᐊᒻᒪᓗ ᓄᐃᑦᓯᓚᕿᐅᑕᐅᓗᑎᒃ ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᒍᑎᓂᒃ ᐊᕐᖁᑎᒋᓗᒋᑦ ᑐᑭᖃᑦᓯᐊᑐᑦ ᐃᓚᐅᕕᖃᕐᓂᖏᑦ ᓄᓇᓖᑦ ᐃᓄᖏᑦᑕ.”
ᔨᐊᓂᕙ ᒪᓂᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑐᑭᒧᐊᑦᑎᓯᔨᖓ

ᐱᔭᐅᓚᕿᓯᒪᔪᑦ:

•    ᓴᓇᔩᑦ ᐊᒻᒪᓗ ᑲᐅᑖᐱᒃᑯᑦ ᐱᓇᓱᒑᒃ ᓄᐃᑕᑎᑦᓯᒍᑕᐅᔫᒃ Gouvernement du Québec ᒪᑭᑕᒐᓱᐊᕐᓂᓂᒃ ᐱᕙᓪᓕᐊᖁᔨᓂᖓᓂᒃ ᑕᕐᕋᒥ. ᐃᓚᐅᑎᓪᓗᒋᑦ ᓄᐃᑎᕆᒋᐊᕐᓂᓄᑦ ᐱᓇᓱᑦᑎᒪᕆᓐᓄᑦ ᐃᓚᒋᓕᐅᑎᑎᑦᓯᒋᐊᕈᑎᓂᒃ ᐊᒻᒪᓗ ᐅᓄᕐᓰᒋᐊᕐᓂᓂᒃ ᐃᓄᐃᑦ ᐱᓇᓱᒐᕐᑖᓚᕿᒍᓐᓇᐅᑎᖏᓐᓂᒃ, ᐱᓇᓱᒑᒃ ᓈᒻᒪᖁᐊᕇᑦᑎᓯᐅᑕᐅᓚᖓᔫᒃ ᐱᓇᓱᑦᑎᓭᑦ ᐱᔪᓐᓇᓯᐊᕐᑐᑦ ᐊᒥᒐᒍᓐᓀᓂᖏᓐᓂᒃ ᐊᒻᒪᓗ ᓴᓇᓂᕐᓄᑦ ᐅᔭᕋᕐᓂᐊᓂᕐᓄᓗ ᐱᓇᓱᕝᕖᑦ ᑭᖕᖒᒪᑦᓯᕙᓐᓂᖏᓐᓂᒃ.

•    ᑲᐅᑖᐱᒃᑯᑦ ᐱᓇᓱᒐᖅ ᐃᑲᔪᕐᓯᔪᖅ ᓄᐃᑎᕐᑕᐅᓂᖏᓐᓂᒃ ᐱᓇᓱᒐᑦᓭᑦ ᐅᑯᐊ ᐱᓇᓱᐊᖃᑎᒌᒍᑎᒋᕙᑦᑕᖏᓐᓄᑦ: Glencore, Canadian Roylaties ᐊᒻᒪᓗ ᓄᓇᕕᒻᒥ ᐅᔭᕋᕐᓂᐊᕕᑦᓴᓂᒃ ᖃᐅᔨᓴᕐᓂᓄᑦ ᑮᓇᐅᔦᑦ. ᐃᓕᔭᐅᓚᖓᔪᑦ $39.5 ᒥᓕᐊ ᓴᓂᐊᓃᑦᑐᑦ ᓄᓇᕕᒻᒥ ᐅᔭᕋᕐᓂᐊᓂᕐᓄᑦ ᑲᔪᓯᖏᓐᓇᓚᖓᔪᓂᒃ ᐱᓇᓱᒐᑦᓴᖃᕐᑎᓯᓂᕐᓄᑦ ᐊᒻᒪᓗ ᐃᓕᓐᓂᐊᑎᑦᓯᓂᕐᓄᑦ ᐋᕐᖀᓯᒪᐅᑎᖓᑕ ᑫᐋᔩᑉ ᐊᒻᒪᓗ ᐱᓇᓱᐊᖃᑎᖏᑦᑕ.

•    ᑐᕌᒐᖓ ᓴᓇᔩᑦ ᐅᓄᕐᓰᒋᐊᕐᓂᖅ ᐃᓄᓐᓂᒃ ᓴᓇᔨᓂᒃ ᓄᓇᕕᒻᒥ ᐊᕐᖁᑎᒋᑦᓱᒋᑦ ᐱᑦᔪᑎᖃᓪᓚᕆᑦᑐᓂᒃ ᐱᓇᓱᐊᕐᑕᐅᒍᓐᓇᕆᐊᓕᓐᓂᒃ ᐱᕙᓪᓕᐊᑎᑦᓯᓃᑦ ᐊᒻᒪᓗ ᐃᓕᓐᓂᐊᑎᑦᓯᓃᑦ. ᑐᖕᖓᕕᒋᓗᒋᑦ ᐃᓗᒡᒍᓯᕐᒥᒃ ᐱᑐᑦᓯᒪᕕᓕᒃ ᑲᒪᒍᓯᖅ, ᐱᓇᓱᒐᖅ ᓴᐳᑦᔨᓂᖃᓲᖅ ᐃᓚᐅᔪᓂᒃ ᐱᕙᓪᓕᐊᒐᓱᐊᕐᓂᓕᒫᖏᓐᓂ. ᐱᖓᓱᐃᓂᒃ ᐊᕕᑦᑐᐃᓯᒪᐅᑎᓕᒃ: ᐱᓇᓱᑦᑎᑖᒍᖕᖏᓂᖏᓐᓂᒃ ᐃᓕᓐᓂᐊᑎᑦᓯᓂᖅ, ᐱᓇᓱᐊᕐᑎᓗᒋᑦ ᐃᓕᓐᓂᐊᑎᑦᓯᓂᖅ ᐊᒻᒪᓗ ᐱᓇᓱᒐᕐᑖᕋᓱᐊᕐᑎᓗᒋᑦ ᓴᐳᑦᔨᓯᒪᓂᖅ. ᒪᓂᔨᓯᒪᓲᒍᒻᒥᔪᖅ ᓯᕗᓪᓕᐹᓂᒃ ᐃᓕᓴᕆᐅᓯᔪᓂᒃ ᐃᓕᓭᒍᑎᓂᒃ ᐊᒻᒪᓗ ᓴᓇᔨᓄᑦ ᐱᔪᓐᓇᓯᐊᕈᑕᐅᔪᓂᒃ ᐱᒃᑲᓂᕆᐊᕈᑎᓂᒃ.

•    2018-2023-ᒧᑦ ᓇᓂᓕᒫᖅ ᐱᓇᓱᑦᑎᓴᓕᐅᕐᓂᓄᑦ ᐋᕐᖀᓯᒪᐅᑎᒃ ᐅᒃᑯᐃᑕᐅᓚᐅᔫᖅ ᒣ 22, 2018-ᒥ ᐊᒻᒪᓗ ᓄᐃᑦᓯᒍᑕᐅᖃᑦᑕᓂᐊᕐᓱᓂ $1.3 ᐱᓕᐊᓐ ᐅᖓᑖᓅᕐᑐᓂᒃ ᑮᓇᐅᔦᕐᓯᒪᐅᑎᓂᒃ ᐊᕐᕌᒍᓄᑦ ᑕᓪᓕᒪᓄᑦ ᑐᕌᕐᑐᓂᒃ. ᓄᐃᑕᐅᓯᒪᑦᓱᓂ 47-ᓄᑦ ᐊᐅᓚᑦᔦᒋᐊᕈᑎᖏᓐᓄᑦ 11 ᑲᕙᒪᒃᑯᑦ ᐱᓇᓱᕝᕕᖏᑦᑕ ᐃᓕᒃᑰᑎᕐᑐᑦ ᐊᒻᒪᓗ ᑎᒥᖁᑎᖏᑦᑕ ᐋᕐᖀᓯᒪᐅᑏᑦ ᒪᕐᕈᐃᓂᒃ ᑐᕌᒐᓖᑦ: ᐅᓄᕐᓂᓭᑦ ᐃᓄᐃᑦ ᐱᓇᓱᒐᑦᓴᑖᕐᑎᓗᒋᑦ ᐊᒻᒪᓗ ᓄᐃᓗᒍ ᐊᕙᑎᒥᒃ ᐃᑉᐱᒍᓱᒍᑕᐅᔪᖅ ᐱᓚᕿᑎᑦᓯᒋᐊᕈᑎᒃ ᐱᓇᓱᑦᑏᑦ ᐱᔪᓐᓇᕆᐊᓕᖏᓐᓂᒃ ᐱᓇᓱᐊᕐᓗᑎᒃ ᑯᐯᑉ ᓱᑲᑦᑐᒥᒃ ᐊᓯᑦᔨᕙᓪᓕᐊᓂᖃᓕᕐᑑᑉ ᒪᑭᑕᒐᓱᐊᕈᑎᓕᕆᕕᖓᓂ.