ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐱᐅᓯᒋᐊᕈᑏᑦ ᓂᕿᓂᒃ ᐊᓯᖏᓐᓂᓗ ᐱᓪᓗᑐᕆᐊᓕᓐᓂᒃ ᐃᑲᔪᕐᓯᒍᑎᓄᑦ

ᓈᓭᒪᒍᑏᑦ ᓂᐅᕕᐊᑦᓴᓂᒃ ᐃᓚᐅᒍᓐᓇᑐᓂᒃ ᓂᕿᓄᑦ ᐊᓯᖏᓐᓄᓗ ᐱᓪᓗᑐᕆᐊᓕᓐᓄᑦ ᐃᑲᔪᕐᓯᒍᑏᑦ ᐊᑖᒍᑦ ᐱᐅᓯᒋᐊᕐᑕᐅᓯᒪᓕᕐᑐᑦ ᐃᑯᓪᓚᐅᒥᑎᑦᓯᓱᑎᒃ ᐊᑭᖏᓐᓂᒃ ᐊᓯᒋᐊᓪᓚᖏᓐᓄᑦ ᓂᕿᓄᑦ ᐊᒻᒪᓗ ᓂᕿᐅᒐᑎᒃ ᐱᓪᓗᑐᕆᐊᓕᓐᓄᑦ ᓂᐅᕕᐊᑦᓴᓄᑦ ᓂᐅᕕᕐᕕᓂ ᓇᓂᑐᐃᓐᓇᖅ ᑕᒫᓂ ᓄᓇᖁᑎᓕᒫᒥ.

ᐊᓯᑦᔨᑐᑦ ᐃᒻᒧᐊᓂ, 30%-ᓄᑦ ᐊᑭᑭᓪᓕᒋᐊᕈᑎ ᐊᑐᖃᑦᑕᓂᐊᓕᕐᑐᖅ ᓄᑖᕕᓂᓕᒫᓄᑦ ᓰᕐᓇᑐᓄᑦ ᐊᒻᒪᓗ ᐱᕈᕐᑐᓄᑦ. ᓱᓕᒋᐊᓪᓚᒃ, ᓂᐅᕕᐊᑦᓭᑦ ᐃᓚᐅᔪᑦ ᐊᒥᓱᐃᓕᖓᔪᑦ ᓂᐅᕕᐊᑦᓴᓂᒃ ᐊᕕᑦᑐᐃᒪᒍᑏᑦ ᐊᑖᓂ ᐃᓚᒋᐊᕐᓯᒪᓕᕐᒥᔪᑦ ᖃᓗᓯᓕᕐᓱᑎᒃ ᐃᓘᓐᓀᓂᒃ ᐊᒥᒉᓈᕈᑎᓕᒫᓂᒃ ᐊᒻᒪᓗ ᓂᐅᕕᐊᑦᓴᓕᐅᕐᑎᓕᒫᓂᒃ.

“ᑮᓇᐅᔭᕐᑎᒍᑦ ᐅᖁᒣᓪᓕᐅᓂᖅ ᐃᓚᒌᓄᑦ ᐊᐳᐊᔭᐅᔪᖅ ᐊᑦᓱᕈᕐᓇᑐᐊᓘᕗᖅ,” ᐅᖃᕐᐳᖅ ᔨᐊᓂᕙ ᒪᓂᒃ, ᐃᑦᓯᕙᐅᑕᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ (KRG). “ᓂᕿᓂᒃ ᐃᑲᔪᕐᓯᒍᑎᖃᕐᑎᓯᓂᖅ ᐱᒻᒪᕆᐅᕗᖅ ᓄᓇᓕᓕᒫᑎᒍᑦ ᓴᓇᕐᕈᑕᐅᒐᒥ ᐃᑲᔪᕐᑐᒪᕆᐅᑦᓱᓂ ᐊᑭᑭᓪᓕᑎᕆᓂᑦᑎᓂᒃ ᓂᐅᕕᐊᑦᓭᑦ ᐊᑭᖏᓐᓂᒃ ᑕᒪᑐᒪ ᐱᕕᖃᕐᓂᓕᒫᖓᓄᑦ.”

ᓂᕿᓂᒃ ᐊᓯᖏᓐᓂᓗ ᐱᓪᓗᑐᕆᐊᓕᓐᓂᒃ ᐃᑲᔪᕐᓯᒍᑏᑦ ᓄᓇᕕᒻᐅᒥᓕᒫᓄᑦ ᐱᒍᑕᐅᕗᑦ ᐊᑭᑭᓪᓕᒋᐊᕈᑎᓂᒃ 20 ᐊᒻᒪᓗ 40% ᐊᑯᓐᓂᖓᓃᑦᑐᓂᒃ 1500 ᐅᖓᑖᓃᑦᑐᓄᑦ ᓂᕿᓄᑦ, ᓇᒻᒥᓂᖅ ᓴᓗᒪᐅᑎᓄᑦ, ᐃᓪᓗᓯᐅᑎᓄᑦ, ᐊᓐᓄᕌᓄᑦ ᐊᒻᒪᓗ ᐊᓯᖏᓐᓄᑦ ᓂᐅᕕᐊᑦᓴᓄᑦ ᓂᐅᕕᐊᓄᑦ ᓄᓇᕕᒻᒥ ᓂᐅᕕᕐᕕᓂᒃ. ᓂᐅᕕᐊᑦᓭᑦ ᐃᓚᐅᔪᑦ ᐃᑲᔪᕐᓯᒍᑎᓂ ᖃᓗᓯᔪᑦ ᒪᑯᓂᖓ: ᑏ, ᐸᑕ, ᐳᓐᓂᖅ ᐊᒻᒪᓗ ᓴᓇᐅᒐᖅ; ᐱᕈᕐᑐᕕᓃᑦ ᐊᒻᒪᓗ ᓰᕐᓇᑐᕕᓃᑦ ᐃᒥᒉᑦ; ᖁᒻᒧᔪᒻᒦᑐᑦ ᓂᖀᑦ, ᐱᕈᕐᑐᐃᑦ ᐊᒻᒪᓗ ᓰᕐᓇᑐᐃᑦ; ᐲᓇᑦ ᐸᑕ, ᐱᑕᑦᓴᖅ, ᐊᐅᐸᕐᑐᐊᓗᒃ ᐊᒻᒪᓗ ᐅᓪᓛᕈᒥᑕᑦᓴᔭᖅ; ᐱᐊᕋᕐᒥᒃ ᓴᓗᒪᑦᓯᐅᑏᑦ, ᐅᕝᕙᐅᑎ, ᐊᓐᓄᕌᓄᑦ ᐅᕝᕙᐅᑎ ᐊᒻᒪᓗ ᐃᖂᑎᑦᓴᔭᖅ; ᐊᓐᓄᕌᑦ ᐊᒻᒪᓗ ᐃᑎᒐᕐᓯᐅᑏᑦ; ᐊᒻᒪᓗ ᒪᙯᓯᐅᑏᑦ ᐅᕐᓱᖏᑦ ᐊᒻᒪᓗ ᓯᑭᑑᑦ ᐊᒻᒪᓗ ᕿᐊᕐᖑᔫᑦ ᐅᕐᓱᕈᑎᖏᑦ.

“ᒪᑭᕝᕕᒃ ᑌᒪᖕᖓᓕᒫᖅ ᐱᐅᑦᓴᓲᖑᕗᖅ ᐃᓚᐅᒋᐊᒥᒃ ᑕᒪᑐᒧᖓ ᐃᑲᔪᕐᓯᒪᐅᑎᒧᑦ ᐃᑯᓪᓚᑎᑦᓯᔪᒧᑦ ᐃᓅᓯᐅᑉ ᐊᑭᑐᓗᐊᕐᓂᖓᓂᒃ ᓄᓇᕕᐅᑉ ᐃᓗᐊᓂ. ᑌᒣᑦᑐᓂᒃ ᐋᕐᕿᓯᒪᔪᖃᖕᖏᑐᐊᕐᐸᑦ, ᐃᓄᐃᑦ ᐱᓗᐊᕐᑐᖅ ᐊᑦᓱᕈᓗᐊᖕᖑᐊᕋᔭᕐᑐᑦ ᓵᒥᓂᒃ ᓂᕿᖃᕐᑎᓯᒐᓱᓪᓗᑎᒃ.

ᓂᐅᕕᕐᕖᑦ ᑌᒣᓘᖃᑕᐅᔪᑦ ᑌᒃᑯᐊᖑᕗᑦ ᑯᐊᐯᑦ ᐊᒻᒪᓗ ᓄᐊᑕᓐ ᓂᐅᕕᕐᕕᖏᑦ ᓄᓇᓕᓐᓂ, ᐊᒻᒪᓗ ᓂᐅᕕᕐ’ᕕ ᑰᔾᔪᐊᒥ, ᐊᒻᒪᓗ ᐅᕐᓱᐊᓗᒻᒥᒃ ᓂᐅᕐᕈᓯᕐᑏᑦ ᐊᑦᑐᐊᑎᓪᓗᒍ ᓂᐅᕐᕈᓯᕐᓂᖓᓄᑦ ᒪᙯᓯᐅᑎᓂᒃ ᐅᕐᓱᓂᒃ ᐊᒻᒪᓗ ᓯᑭᑑᑦ ᐊᒻᒪᓗ ᕿᐊᕐᖑᔫᒃ ᐅᕐᓱᕈᑎᖏᓐᓂᒃ. ᐃᑲᔪᕐᓯᒍᑕᐅᔪᑦ ᓂᑦᑕᒍᑎᖏᑦ ᓂᐅᕕᕐᕖᑦ ᖁᓕᕈᐊᖏᓐᓂ ᐊᒻᒪᓗ ᑐᖑᔪᕐᑌᑦ ᓂᐱᖕᖓᑌᑦ ᐊᑭᓕᔮᕈᑏᑦ ᐊᑐᕐᑕᐅᔪᑦ ᓇᓗᓀᒃᑯᑕᐅᑦᓱᑎᒃ ᐃᓚᐅᒍᓐᓇᑐᓄᑦ ᓂᐅᕕᐊᑦᓴᓄᑦ. ᓱᓀᑦ ᓂᐅᕕᐊᑦᓭᑦ ᐃᓚᐅᒍᓐᓇᒪᖔᑕ ᖃᐅᔨᒪᒍᑏᑦ ᐱᔭᐅᒍᓐᓇᒥᔪᑦ ᓄᓇᓕᓐᓂ ᓂᐅᕕᕐᕖᑦ ᑲᒪᔨᒻᒪᕆᖏᓐᓂᒃ ᐊᒻᒪᓗ KRG-ᑯᑦ ᖃᕆᑕᐅᔭᓄᑦ ᐅᒃᑯᐃᕕᖓᓂᒃ ᐅᕙᓂ Nunavik Cost-of-Living Reduction Measures.

ᔪᓓ 15-ᒥ, ᐊᑭᓕᐅᑏᑦ $875-ᓂᒃ ᑐᕌᕐᑎᑕᐅᓛᕐᒥᔪᑦ ᐃᓚᐅᒍᓐᓇᑐᓄᑦ ᐃᓄᒻᒪᕆᓐᓄᑦ ᓄᓇᓖᑦ ᐃᓗᐊᓂ ᐃᓄᒻᒪᕆᓐᓂᒃ ᐃᑲᔪᕐᓯᐅᑏᑦ ᐊᑖᒍᑦ ᑕᒪᓐᓇᓗ ᐃᓚᐅᒻᒥᓱᓂ ᓄᓇᕕᒻᒥ ᐃᓅᓯᐅᑉ-ᐊᑭᑐᓂᖓᓂᒃ ᐃᑯᓪᓚᑎᑦᓯᒍᑏᑦ ᐋᕐᕿᓯᒪᐅᑎᖏᓐᓄᑦ. ᐊᕐᕌᒎᒃ ᒪᕐᕈᑕᒫᑦ ᐊᑭᓕᕐᑕᐅᒍᑏᑦ ᑖᑦᓱᒪ ᐱᓂᐊᕐᓂᖓᑕ ᐊᑖᒍᑦ ᑐᕌᖓᓲᖑᕗᑦ ᐃᑯᓪᓚᐅᒥᑎᑦᓯᓂᕐᒧᑦ ᐃᓚᖏᓐᓂᒃ ᐊᑦᓱᕈᕐᓇᑐᓂᒃ ᐃᓄᐃᑦ-ᒪᑭᑕᐅᑎᖃᕐᓂᖓᑎᒍᑦ ᐃᓄᒻᒪᕇᑦ ᖃᓄᐃᓕᖓᓂᖏᓐᓂᒃ, ᑕᒪᒃᑯᐊ ᖃᓗᓯᑎᓪᓗᒋᑦ ᐃᑭᑦᑐᐊᐱᓐᓂᒃ ᓇᒻᒥᓂᖅ ᑮᓇᐅᔭᓕᐅᕐᓂᖓᓂᒃ ᐊᒻᒪᓗ ᑲᕙᒪᒃᑯᑦ ᐃᓄᓐᓂᒃ ᐃᑲᔪᕐᓯᐅᑎᖏᓐᓂᒃ ᐋᕐᕿᓱᕐᓯᒪᖕᖏᑐᓂᒃ ᓄᓇᕕᒻᒥ ᐃᓅᓯᐅᑉ ᐊᑭᑐᓂᓪᓚᕆᖓᓄᑦ.

ᐅᖓᑕᒥᐅᑌᑦ ᖃᐅᔨᒪᔭᑦᓭᑦ

ᑮᓇᐅᔭᖃᕐᑎᓯᒍᑏᑦ ᓄᓇᕕᒻᒥ ᐃᓅᓯᐅᑉ-ᐊᑭᑐᓂᖓᓂᒃ ᐃᑯᓪᓚᑎᑦᓯᒍᑏᑦ ᐋᕐᕿᓯᒪᐅᑎᖏᓐᓂᒃ ᐊᑭᓕᕐᑕᐅᓲᖑᕗᑦ ᑯᐯᒃᑯᑦ ᑲᕙᒪᖓᓂᒃ ᒪᓕᑦᓱᓂ ᐊᖏᖃᑎᒌᓐᓂᒥᒃ ᐱᑦᔪᑎᓕᒻᒥᒃ ᑮᓇᐅᔭᖃᕐᑎᓯᓂᕐᒥᒃ ᐋᕐᕿᓯᒪᒍᑎᓂᒃ ᑐᕌᖓᔪᓂᒃ ᐃᑯᓪᓚᑎᑦᓯᓂᕐᒧᑦ ᐃᓅᓯᐅᑉ ᐊᑭᑐᓂᖓᓂᒃ ᓄᓇᕕᐅᑉ ᐃᓗᐊᓂ. ᖃᑦᓯᑦ ᑮᓇᐅᔦᑦ ᑕᒪᑐᒧᖓ ᐊᑐᐃᓐᓇᐅᓂᖓ 2018-2019-ᒥ ᑲᑎᑦᓱᒋᑦ $13 ᒥᓕᐊᓐᖑᕗᑦ.

ᑖᑦᓱᒪᑦᓭᓇᐅᑉ ᐊᖏᖃᑎᒌᓐᓂᐅᑉ ᐊᑖᓂ, ᖃᒧᖓᐅᓕᔪᒥᒃ ᖃᐅᔨᓴᕈᑎᖃᕐᒥᔪᖅ ᓄᓇᕕᒻᒥᐅᑦ ᓂᐅᕕᕐᓂᒥᒍᑦ ᐱᐅᓯᖏᓐᓂᒃ ᓯᓚᑦᑐᓴᕐᕕᒃ ᓚᕚᓪᒥ ᑐᕌᖓᑎᓪᓗᒍ ᐱᕙᓪᓕᐊᓂᕐᒧᑦ ᐆᑦᑐᕋᐅᑎᖃᕈᑎᑦᓴᒥᒃ ᐃᓅᓯᐅᑉ ᐊᑭᑐᓂᖓᓂᒃ ᓇᓗᓀᕐᓯᒍᑎᓂᒃ. ᓱᓇᒥᑦᑐᑦ ᐅᖄᒍᑏᑦ ᖃᒻᒥᓂᑕᐅᓂᕐᐹᓂᒃ ᑐᑭᓯᒍᑕᐅᓯᒪᔪᓂᒃ ᐱᔭᐅᒍᓐᓇᑐᑦ ᐅᕙᓂ www.nunivaat.org. KRG-ᑯᑦ ᐊᒻᒪᓗ ᑯᐯᒃᑯᑦ ᑲᕙᒪᖓᑦ ᑲᔪᓯᑎᑦᓯᔪᑦ ᐊᖏᖃᑎᒌᒐᓱᐊᕐᓂᒥᒃ (ᒪᑭᕝᕕᒃ ᓰᒥᒑᖑᑎᓪᓗᒍ) ᓄᑕᐅᓯᓕᑎᕆᒍᒪᒧᑦ ᐊᑯᓂᐅᔪᒧᑦ ᑮᓇᐅᔭᖃᕐᑎᓯᒍᑎᓂᒃ ᐃᑲᔪᕐᑐᓴᓂᒃ ᐃᑯᓪᓚᑎᑦᓯᓂᕐᒥᒃ ᓄᓇᕕᒻᒥ ᐃᓅᓯᐅᑉ ᐊᑭᑐᓗᐊᕐᓂᖓᓂᒃ.

ᓄᓇᕕᒻᒥ ᐃᓅᓯᐅᑉ ᐊᑭᑐᓂᖓᓂᒃ ᐃᑯᓪᓚᑎᑦᓯᒍᑏᑦ ᐋᕐᕿᓯᒪᒍᑎᖏᑦ ᓇᓗᓀᕐᑕᐅᓲᖑᕗᑦ ᑲᑐᑦᔭᐅᓱᑎᒃ ᒪᑭᕝᕕᒧᑦ ᐊᒻᒪᓗ KRG-ᑯᓄᑦ. ᑐᑭᒧᐊᒍᑎᓕᐊᖑᓯᒪᔪᑦ ᐋᕐᕿᓯᒪᐅᑎᓕᒫᓄᑦ ᖃᖓᓕᒫᖅ ᐋᕐᕿᒋᐊᕐᑕᐅᒍᓐᓇᑐᑦ ᐅᕝᕙᓘᓐᓃᑦ ᐊᓯᐅᑎᑕᐅᒍᓐᓇᑐᑦ. KRG-ᑯᑦ ᑲᒪᔨᐅᕗᑦ ᐋᕐᕿᑕᐅᓯᒪᔪᑦ ᑲᔪᓯᑎᑕᐅᓂᖓᓂᒃ.