ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐃᓄᑦᔪᐊᖅ: ᑎᒻᒥᔫᕐᓂᐊᕕᐅᑉ ᐅᒃᑯᐃᑕᐅᓂᖓ ᐊᒻᒪᓗ ᓄᓇᓕᓐᓂ ᐊᐅᓚᑦᓯᔩᑦ ᑲᑎᒪᓂᖓ

Inukjuak Airport Terminal Inauguration

ᓴᐅᒥᒻᒥᑦ ᑕᓕᕐᐱᒧᑦ: ᐅᖓᕙᒧᑦ ᑯᐯᑉ ᐅᖃᕐᕕᒪᕆᖓᓂ ᑭᒡᒐᑐᕐᑎ ᔮᓐ ᐳᑦᓴ, ᑫᐋᔩᑉ ᑐᑭᒧᐊᑦᑎᓯᔨᖓ ᔨᐊᓂᕙ ᒪᓂᒃ, ᐃᓄᑐᖃᖅ ᓘᑲᓯ ᐃᖃᓗᒃ, ᐃᓄᑦᔪᐊᑉ ᓯᕗᓕᕐᑎᖓ ᐸᐅᓗᓯ ᖃᓴᓪᓗᐊᖅ, ᑫᐋᔩᒃᑯᓂ ᑲᑎᒪᔨ ᓵᔪᐃᓕ ᐅᐃᑖᓗᑦᑐᖅ, ᐊᒻᒪᓗ ᐱᑐᕝᕕᒃ ᓄᓇᒥᒃ ᑎᒍᒥᐊᕐᑎᑯᑦ ᐊᖓᔪᕐᖄᖓ ᐃᐊᕆᒃ ᐊᑕᒍᑦᑖᓗᒃ.

 ᐃᓄᑦᔪᐊᖅ, ᑯᐯᒃ ᔫᓂ 19, 2018 – ᔨᐊᓂᕙ ᒪᓂᒃ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᑐᑭᒧᐊᑦᑎᓯᔨᖓ, ᔮᓐ ᐳᑦᓴ, ᐅᖓᕙᒥ ᑯᐯᒃ ᐅᖃᕐᕕᒪᕆᖓᓂᒃ ᑭᒡᒐᑐᕐᑎ, ᐊᒻᒪᓗ ᐸᐅᓗᓯ ᖃᓴᓪᓗᐊᖅ, ᑕᕐᕋᒥ ᓄᓇᓖᑦ ᑲᕙᒫᐱᖓᑕ ᓯᕗᓕᕐᑎᖓ, ᐅᒃᑯᐃᓯᓚᐅᕐᑐᑦ ᓄᑖᒥᒃ ᐃᓄᑦᔪᐊᒥ ᑎᒻᒥᔫᕐᓂᐊᕕᒻᒥᒃ.

ᑲᑎᓂᐅᓚᐅᕐᑐᖅ ᓇᓗᓀᕐᓯᒍᑎᐅᓚᐅᕐᑐᖅ ᐱᔭᕇᕐᑕᐅᓂᖏᓐᓂᒃ ᐱᒻᒪᕇᑦ ᐱᓇᓱᐊᕐᑕᐅᓯᒪᓕᕐᓂᖏᑦᑕ ᑎᒻᒥᔫᕐᓂᐊᕕᐅᑉ ᐊᕐᕌᒍᓂ ᐊᒥᓱᓂ, ᐅᑯᐊ ᐃᓚᐅᑎᓪᓗᒋᑦ:

• ᓄᑖᖅ, ᐊᖏᓂᕐᓴᖅ ᑎᒻᒥᔫᓂᑦᓰᕕᒃ;
• ᑎᒻᒥᔫᕐᓂᐊᕕᐅᑉ ᓄᓇᒃᑰᔫᖃᐅᑎᖓ ᐃᓱᕐᕆᓇᕐᓂᓴᖅ ᐱᔪᓐᓀᓇᕐᑎᓯᔨᓄᑦ ᐱᓇᓱᑦᑎᓄᑦ;
• ᐊᖏᓕᒋᐊᕐᑕᐅᓂᖓ ᑎᒻᒥᔫᑦ ᓄᕐᖃᖓᕕᖓ ᐃᓱᕐᕆᓇᕐᓂᓴᖅ ᑎᒻᒥᔫᓄᑦ; ᐊᒻᒪᓗ
• ᐊᒥᓱᑦ ᓄᓇᓕᓐᓂ ᑕᑯᒥᓇᕐᑐᓕᐅᕐᑏᑦ ᐱᓇᓱᐊᕐᓯᒪᔭᖏᑦ.

“ᓄᑕᐅᓪᓕᑎᕐᑕᐅᓂᖓ ᑎᒻᒥᔫᕐᓂᐊᕕᑦᑕ ᑲᔪᓯᒋᐊᖃᓚᐅᕐᑐᖅ ᓄᓇᕕᒻᒥᐅᑦ ᖃᓄᐃᖕᖏᓯᐊᕆᐊᖃᕐᓂᖏᓐᓄᑦ ᐊᒻᒪᓗ ᐱᕈᕐᐸᓕᐊᓂᖓᓄᑦ ᓄᓇᕕᐅᑉ. ᓄᑖᖅ ᑎᒻᒥᔫᕐᓂᐊᕕᒃ ᐃᓄᑦᔪᐊᒥ ᐱᖓᓲᔪᕐᑑᒍᑕᐅᔪᖅ ᐱᓇᓱᒐᖅ ᐱᔭᕇᕐᑕᐅᕙᓪᓕᐊᓯᒪᓕᕐᑐᖅ ᐊᕐᕌᒍᓂ ᐊᓂᒍᕐᓯᒪᔪᓂ ᐊᒻᒪᓗ ᓄᐃᑕᐅᓚᕿᓯᒪᑦᓱᓂ ᐱᓇᓱᐊᖃᑎᒌᓐᓂᖏᓐᓄᑦ ᑫᐋᔩᑉ ᐊᒻᒪᓗ ᑯᐯᑉ ᑲᕙᒪᖓᑕ ᐃᖏᕐᕋᐅᑎᓕᕆᕕᖏᓐᓄᑦ,” ᓚᓚᐅᕐᑐᖅ ᑫᐋᔩᑉ ᑐᑭᒧᐊᑦᑎᓯᔨᖓ ᔨᐊᓂᕙ ᒪᓂᒃ. "ᓄᓇᓕᑦᑎᓂ ᑎᒻᒥᔫᕐᓂᐊᕖᑦ ᐃᑎᕐᕕᐅᒪᑕ ᓄᓇᕕᒻᒧᑦ ᐊᒻᒪᓗ ᐊᓕᐊᑦᓱᖓ ᐃᓄᑦᔪᐊᒥᐅᑦ ᐃᓇᖁᓇᕐᑐᒥᒃ ᑐᖕᖓᓱᑦᑎᓯᕕᖃᓕᕐᒪᑕ ᐃᓚᒥᓂᒃ, ᐃᓚᓐᓈᒥᓂᒃ ᐊᒻᒪᓗ ᐃᓐᓂᐊᑐᓂᒃ."

$25.2 ᒥᓕᐊᕌᕐᑐᕕᓂᖅ ᐃᓄᑦᔪᐊᑉ ᑎᒻᒥᔫᕐᓂᐊᕕᖓᓂᒃ ᓴᓇᓂᖅ ᐱᒋᐊᕐᑕᐅᓚᐅᕐᓯᒪᔪᖅ 2015-ᒥ ᐊᒻᒪᓗ ᐊᑐᕐᑕᐅᓂᖃᕐᓯᒪᓕᕐᓱᓂ 2016-ᒥᓂᑦ. ᑎᒻᒥᔫᕐᓂᐊᕖᑦ 13-ᓂ ᓄᓇᕕᒻᒥ ᓄᓇᓕᓐᓂ, ᐃᓚᐅᑎᓪᓗᒍ ᐃᓄᑦᔪᐊᒦᑦᑐᖅ, ᐱᒋᔭᐅᔪᑦ Ministère des Transports, de la Mobilité durable et de l’Électrification des transports-ᒧᑦ (ᐃᖏᕐᕋᐅᑎᓕᕆᓂᕐᓄᑦ, ᐊᐅᓚᒍᓐᓇᓂᕐᓄᑦ ᐊᒻᒪᓗ ᐃᖏᕐᕋᐅᑏᑦ ᐃᑯᒪᐅᑎᖃᕈᑎᖏᓐᓄᑦ, MTMDET). ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑲᒪᒋᔭᖃᕐᓯᒪᓕᕐᑐᖅ ᐊᐅᓚᑕᐅᓂᖏᓐᓂᒃ, ᐃᖏᕐᕋᐅᑕᐅᓂᖏᓐᓂᒃ ᐊᒻᒪᓗ ᐱᔪᓐᓀᓇᕐᑎᑕᐅᓂᖏᓐᓂᒃ ᑖᒃᑯᐊ ᑎᒻᒥᔫᕐᓂᐊᕖᑦ 1996-ᒥᓂᑦ.

ᐃᓄᑦᔪᐊᑉ ᑎᒻᒥᔫᕐᓂᐊᕕᖓ ᐅᒃᑯᐃᑕᐅᒌᕐᑎᓗᒍ, ᑫᐋᔩᑉ ᑐᑭᒧᐊᑦᑎᓯᔨᖓ ᐊᒻᒪᓗ ᐃᓄᑐᙯᑦ ᐱᒍᑦᔭᐅᓂᖏᓐᓂᒃ ᐊᐅᓚᑦᓯᔩᑦ ᑲᑎᓯᓚᐅᕐᑐᑦ ᓂᕈᐊᕐᑕᐅᓯᒪᔪᓂᒃ ᓄᓇᓖᑦ ᑲᑎᒪᔨᖏᓐᓂᒃ ᑐᑭᓯᐅᑎᑦᓴᖁᑎᒥᓂᒃ ᐅᖃᐅᓯᖃᕐᓱᑎᒃ ᓄᓇᓕᓐᓂ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᒐᕐᓄᑦ ᐊᒻᒪᓗ ᐅᐃᒪᓇᕐᑐᖁᑎᒋᔭᐅᔪᓄᑦ.