ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓄᓇᕕᒃ ᐃᓗᐃᒃᑲᓂᒃ ᐅᖄᒍᑎᐊᐱᑦᑖᓂᐅᔭᓕᕐᑐᖅ ᐊᒻᒪᓗ ᐊᑦᔭᑲᑦᑕᑕᐅᒍᓐᓇᑐᑦ ᐱᔪᓐᓇᓯᑎᑕᐅᓗᑎᒃ, ᑳᓇᑕᒥ ᑌᒣᑦᑐᖃᖕᖏᑐᑑᑲᓵᓕᕐᓱᓂ

ᑰᑦᔪᐊᖅ, ᑯᐯᒃ, ᒣ29 2018 – ᐃᓘᓐᓇᑎᒃ ᓄᓇᕕᒻᒥ ᓄᓇᓖᑦ ᑯᐯᒃ ᑕᕐᕋᖓᓃᑦᑐᑦ, ᐅᖄᒍᑎᐊᐱᑦᑖᓂᐅᔭᓕᕐᑐᑦ ᐊᒻᒪᓗ ᑎᒍᒥᐊᕐᑕᐅᒍᓐᓇᑐᑦ ᐱᔪᓐᓇᓯᑎᑕᐅᓗᑎᒃ ᓇᑯᕐᒪᑦ ᐱᒻᒪᕆᒃ ᐊᖏᖃᑎᖃᕈᑎᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (ᑫᐊᔩᑉ) ᐊᒻᒪᓗ Ice Wireless ᐅᐊᔭᖃᖕᖏᑐᑎᒍᑦ ᐱᔪᓐᓇᕈᓐᓇᑎᑦᓯᐅᑎᒃ.


14,000 ᐅᖓᑖᓅᕐᑐᑦ ᐃᓄᖏᑦ - ᐃᓘᓐᓇᑲᓵᑎᒃ ᐃᓄᐃᑦ - ᐊᒥᓲᖕᖏᑐᓂ ᐅᖓᓯᑦᑕᓕᓐᓂᒥᐅᑦ ᓄᓇᓕᐅᖃᑎᒥᓂᒃ ᑳᓇᑕᒥ ᓱᓕ ᐅᖄᒍᑎᐊᐱᖕᖃᖕᖏᒪᑕ ᐊᒻᒪᓗ ᓇᔪᕐᑎᒋᔭᐅᖏᓐᓇᕈᓐᓇᑐᓂᒃ ᑭᒡᒐᑐᕐᑕᐅᒍᑎᖃᕋᑎᒃ. ᑳᓇᑕᒥᐅᓄᑦ ᐅᓄᕐᓂᓴᓄᑦ ᑌᒣᑦᑐᐃᑦ ᐃᓱᕐᕆᐅᑎᐅᕙᓕᕐᑎᓗᒋᑦ, ᑖᓐᓇ ᑭᒡᒐᑐᕈᑎᒃ ᐊᑐᐃᓐᓇᐅᓛᓕᕐᑐᖅ ᒣ ᐱᒋᐊᕐᖃᒥᐅᑎᓪᓗᒍ ᐱᒋᔭᐅᓗᓂ ᑫᐋᔩᑉ ᑕᒫᓂ ᖃᕆᑕᐅᔭᒃᑰᑎᑦᓯᐅᑎᖁᑎᖓᓄᑦ ᐱᓇᓱᐊᖃᑎᖃᓛᓕᕐᑎᓗᒋᑦ Ice Wireless-ᒥᒃ.
“ᑫᐋᔩ, ᐊᕐᖁᑎᒋᑦᓱᒍ ᑕᒫᓂ ᖃᕆᑕᐅᔭᒃᑰᕈᓐᓇᑎᑦᓯᐅᑎᒃ, ᑲᔪᓯᑎᑦᓯᔪᖅ ᐱᓇᓱᐊᕐᓂᒥᒃ ᓲᖑᓯᑎᑦᓯᕙᓪᓕᐊᓂᕐᓄᑦ ᑐᓴᐅᒪᐅᑎᒍᑎᖃᕈᑎᓄᑦ ᐱᖁᑎᒻᒪᕆᓐᓂᒃ ᓄᓇᓕᓕᒫᓂ. ᑖᓐᓇ ᐊᖏᖃᑎᖃᕈᑎᒃ Ice Wireless-ᒥᒃ ᐅᖄᒍᑎᐊᐱᓐᓄᑦ ᐊᒻᒪᓗ ᐊᑦᔭᑲᑦᑕᑕᐅᒍᓐᓇᑐᑦ ᐱᔪᓐᓇᓯᑎᑕᐅᓂᖏᓐᓄᑦ ᑐᕌᕐᑕᑎᓐᓄᑦ ᑎᑭᐅᑎᒋᐊᕈᓐᓇᓯᒍᑎᕗᑦ. ᑫᐋᔩ ᓲᔫᒍᑎᖃᑦᓭᓇᕐᐸᑐᖅ ᑲᒪᒋᔭᖃᕐᓂᒥᒍᑦ ᐱᕙᓪᓕᐊᑎᑦᓯᒐᓱᐊᕐᓱᓂ ᐃᑯᒪᐅᑎᐊᕈᕐᓅᑐᓂᒃ ᐃᓱᕐᕆᐅᑎᖃᕐᑎᓯᒍᒪᒧᑦ ᓄᓇᕕᒻᒥᐅᓂᒃ ᑯᐯᑉ ᓯᕿᓂᖓᓃᑦᑐᑦ ᐃᓱᕐᕆᐅᑎᒋᕙᑦᑕᖏᑦᑕ ᐊᑦᔨᖏᓐᓂᒃ," ᓚᓚᐅᕐᑐᖅ ᑫᐋᔩᑉ ᑐᑭᒧᐊᑦᑎᓯᔨᖓ ᔨᐊᓂᕙ ᒪᓂᒃ.
ᐊᑐᕐᓱᒋᑦ 3G/LTE ᐱᓪᓗᑯᒋᐊᓕᑎᒎᕈᑏᑦ, ᓂᐅᕕᕐᑏᑦ ᑭᒡᒐᑐᕐᑕᐅᓂᖃᖃᑦᑕᓛᓕᕐᑐᑦ ᑳᓇᑕᒥᐅᑦ ᐊᓯᖏᑦᑕ ᐃᓱᕐᕆᐅᑎᒋᕙᑦᑕᖏᑦᑕ ᐊᑦᔨᖏᓐᓂᒃ ᐆᑦᑑᑎᒋᓗᒋᑦ ᐊᓪᓚᕕᖃᕈᓐᓇᓯᓗᑎᒃ ᖃᕆᑕᐅᔮᐱᑎᒍᑦ ᓇᓂᑐᐃᓐᓇᖅ, ᐃᓕᐅᕐᖃᒐᕐᑕᖏᓐᓂᓗ ᐱᒍᓐᓇᓯᓗᑎᒃ, ᐅᖄᒍᑎᖃᕈᓐᓇᓯᓗᑎᒃ ᐊᒻᒪᓗ ᖃᕆᑕᐅᔭᒃᑰᑐᓂᒃ ᓄᐃᑦᓯᒍᓐᓇᓯᓗᑎᒃ ᐅᖄᒍᑎᐊᐱᒥᑎᒍᑦ, ᓚᓚᐅᕐᑐᖅ ᓭᒫᕐ ᐱᓭ, Ice Wireless ᐊᖓᔪᕐᖄᖓ.
“ᑐᑭᓯᑦᓴᐅᔫᔮᖕᖏᑐᖅ ᖃᓄᖅ ᑳᓇᑕᒥᐅᒍᖃᑕᐅᔪᑦ ᐅᖄᒍᑎᐊᐱᓐᓄᑦ ᑭᒡᒐᑐᕐᑕᐅᓯᒪᖕᖏᒪᖔᑕ 2018-ᒍᓕᕋᑕᕐᑎᓗᒍ. ᓯᕗᓂᕐᒥ ᐱᓚᕿᒐᓱᐊᕐᓂᖃᕐᓯᒪᔪᒍᑦ ᐱᔪᓐᓇᐅᑎᓂᒃ ᒥᓂᑕᐅᓯᒪᖁᓇᒋᑦ ᐅᖓᓯᑦᑐᒦᑦᓴᓕᕐᑑᓃᑦ ᑕᕐᕋᒥ ᓄᓇᓖᑦ ᐅᖓᓯᑦᑕᕆᔭᐅᒋᐊᓪᓚᓯᒪᒻᒪᑕ ᕿᒣᓐᓇᑕᐅᓯᒪᔪᕐᑎᑐᑦ ᐊᒻᒪᓗ ᓄᓇᕕᒻᒥ ᑖᑦᓱᒥᖓ ᑭᒡᒐᑐᕈᑎᖃᕐᓗᑕ ᑕᑯᑎᑦᓯᓛᕈᓐᓇᓯᑦᓱᑕ, ᐱᓇᓱᐊᖃᑎᒋᓗᒋᑦ ᐱᒋᐊᕐᑎᓯᔩᑦ ᐃᓄᓐᓂᒃ ᑲᒪᒋᔭᖃᑦᓯᐊᑐᑦ ᓇᒻᒥᓂᓖᑦ ᐱᓇᓱᕝᕖᑦ ᐆᑦᑑᑎᒋᑦᓱᒋᑦ Ice Wireless ᐊᒻᒪᓗ ᓯᕗᓂᕐᒥᒃ ᐃᓱᒪᒋᔭᖃᑦᓯᐊᑐᑦ ᑲᕙᒣᑦ ᑎᒥᖁᑎᖏᑦ ᐆᑦᑑᑎᒋᑦᓱᒋᑦ ᑫᐋᔩ, ᑲᑐᑦᔨᓗᑕ ᐱᔪᓐᓇᓯᓂᕆᓂᐊᕐᑕᑎᓐᓂᒃ ᐃᓕᒃᑰᕈᑎᒋᓗᒋᑦ ᐱᕐᖃᔭᕋᔭᖕᖏᑕᑦᑎᓂᒃ ᓄᐃᑦᓯᖃᑎᒌᓚᕿᓗᑕ," ᓚᓚᐅᕐᑐᖅ ᐱᓭ.
“ᑕᒪᓐᓇ ᐅᖄᒍᑎᐊᐱᓐᓄᑦ ᑭᒡᒐᑐᕈᑎᒃ ᓄᓇᕕᒻᒥᐅᓂᒃ ᑐᓴᐅᒪᐅᑎᑦᓯᐊᕈᓐᓇᑎᑦᓯᓚᕿᓛᓕᕐᑐᖅ ᐃᓚᒌᓂᒃ ᐊᒻᒪᓗ ᐃᓚᓐᓈᕇᓂᒃ, ᓇᓂᑐᐃᓐᓈᕋᓗᐊᕈᑎᒃ 14-ᓂ ᓄᓇᓕᓕᒫᓂ ᓄᓇᓕᓐᓂ, ᐅᕝᕙᓘᓐᓃᑦ ᖃᓪᓗᓈᑦ ᓄᓇᖓᓃᒐᓗᐊᕈᑎᒃ ᐊᐅᓪᓚᓯᒪᓗᑎᒃ ᐱᓇᓱᐊᕆᐊᕐᓯᒪᓗᑎᒃ ᐅᕝᕙᓘᓐᓃᑦ ᐃᓱᒪᒥᓪᓗᑎᒃ," ᒪᓂᒃ ᓚᓚᐅᕐᑐᖅ.
ᑖᓐᓇ ᐊᖏᖃᑎᒌᒍᑎᒃ ᐱᑦᔪᑎᒋᑦᓱᒍ, Ice Wireless ᒪᓂᔨᓯᒪᔪᖅ ᖃᐅᔨᒪᒍᑎᒥᓂᒃ, ᑲᔪᓯᑎᑦᓯᒍᓐᓇᐅᑎᒥᓂᒃ, ᑳᓇᑕᒥ ᐊᒻᒪᓗ ᐊᓯᖏᓐᓂ ᑎᑭᐅᑎᔮᖃᕐᑎᓯᒍᓐᓇᐅᑎᒥᓄᑦ ᐊᒻᒪᓗ ᐊᑐᕈᓐᓇᕕᖃᕐᓱᑎᒃ ᑲᒥᐸᓂᒥᒃ ᓄᐃᑦᓯᓯᒪᔪᒥᒃ Iristel ᑳᓇᑕᓕᒫᒥ ᐅᖄᒍᑎᓂᒃ ᐱᑐᑦᓯᒪᑎᑦᓯᕕᒻᒥᒃ. ᑫᐋᔩ, ᐊᕐᖁᑎᒋᓗᒍ ᑕᒫᓂ ᖃᕆᑕᐅᔭᒃᑰᑎᑦᓯᐅᑎᒃ, ᒪᓂᔨᓯᒪᓚᖓᔪᖅ ᐊᓕᑎᕈᓐᓇᐅᑎᑕᖏᓐᓂᒃ ᐊᒻᒪᓗ ᑎᑭᐅᑎᔮᖃᕈᓐᓇᐅᑎᖏᓐᓂᒃ ᑐᓴᐅᒪᐅᑎᒍᑎᓄᐊᖓᔪᓄᑦ ᐱᖁᑎᒻᒪᕆᒻᒥᑎᒍᑦ.
ᐃᓘᓐᓇᑎᒃ ᐅᖄᒍᑎᐊᐱᓐᓂᒃ ᐱᔪᓐᓇᑎᑦᓯᓂᕐᓄᑦ ᐸᕐᓀᓯᒪᐅᑏᑦ ᐃᓚᓖᑦ ᑕᑭᓂᓕᐅᕐᑕᐅᓯᒪᖕᖏᑐᓂᒃ ᐅᖄᒍᓐᓇᑎᑦᓯᐅᑎᓂᒃ, ᐊᓪᓚᖃᑦᑕᐅᑎᒍᑎᓂᒃ ᐊᒻᒪᓗ ᓄᐃᑦᓯᒍᓐᓇᐅᑎᑕᖏᓐᓂᒃ ᑳᓇᑕᓕᒫᒥ ᐱᔪᓐᓇᓚᖓᑎᓪᓗᒋᑦ, ᔪᓀᑎᔅ ᓯᑌᔅᒥᓪᓗ ᐊᒻᒪᓗ ᒥᐊᒃᓯᑯᒥ ᐊᑭᖏᓐᓄᑦ ᐱᒋᐊᕐᕕᒋᔭᐅᑎᓪᓗᒍ $59 ᓇᓕᑭᓐᓂᐸᐅᓗᓂ. Ice Wireless ᓯᕗᓪᓕᐸᐅᑦᓱᓂ ᑳᓇᑕᒥ ᑎᒍᒥᐊᕐᑎᐅᖄᓯᔪᖅ ᐊᕐᖁᓯᐅᕆᓂᕐᓄᑦ ᐱᑐᑦᓯᒪᑎᑦᓯᐅᑎᑎᒍᑦ ᐊᑭᓖᒍᑏᑦ ᐊᑕᑎᒍᓐᓀᓗᒋᑦ ᐅᓪᓗᑕᒫᑦ ᐅᕝᕙᓘᓐᓃᑦ ᑕᕐᕿᑕᒫᑦ ᐊᑭᓕᕆᐊᓖᑦ ᓄᐃᑕᒍᓐᓀᑎᓪᓗᒋᑦ. ᐅᖄᒍᓐᓇᓂᕐᓄᑦ ᐊᒻᒪᓗ ᐊᓪᓚᖃᑦᑕᐅᑎᒍᓐᓇᓂᕐᓄᑦ ᐸᕐᓀᒍᑏᑦ ᐱᒋᐊᕈᓐᓇᓛᕐᑐᑦ ᑕᕐᕿᑕᒫᑦ $19-ᕌᑐᐃᓐᓇᓗᑎᒃ ᓇᓕᑭᓐᓂᐹᑎᒎᕐᑐᑦ.
ᐱᓇᓱᐊᖃᑎᒌᓯᔪᓄᑦ ᑐᑭᓯᐅᑎᑦᓴᒋᐊᓪᓓᑦ
 ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.
 ᑫᐋᔩᑉ ᑕᒫᓂ ᖃᕆᑕᐅᔭᒃᑰᑎᑦᓯᕕᖁᑎᖓ ᑲᔪᓯᑎᑦᓯᓲᖅ ᖃᕆᑕᐅᔭᒃᑰᑎᑦᓯᐅᑎᓂᒃ ᐊᒻᒪᓗ IP-ᑯᑦ ᐱᑐᑦᓯᒪᐅᑎᓂᒃ ᐱᔪᓐᓇᑎᑦᓯᒍᑎᓂᒃ ᓄᓇᕕᓕᒫᒥ.
 Ice Wireless ᐃᓱᕐᕆᐅᑎᖃᕐᓂᓂᒃ ᑐᖕᖓᕕᓕᒃ ᓄᓇᓕᓕᒫᓂ ᐊᑦᔭᑲᑦᑕᑕᐅᒍᓐᓇᑐᓂᒃ ᐱᑐᑦᓯᒪᐅᑎᒍᑎᓂᒃ ᐃᖏᕐᕋᑎᑦᓯᔨᐅᑦᓱᓂ (MNO) ᑲᔪᓯᑎᑦᓯᔨᐅᑦᓱᓂ ᓄᑖᒍᓂᕐᐹᓂᒃ 3G/LTE-ᑰᑐᓂᒃ ᑳᓇᑕᒥ ᓄᓇᓖᑦ ᐅᖓᓯᑦᑐᒦᑦᑐᑦ ᐊᒻᒪᓗ ᓄᓇᕐᓚᐅᖏᑦᑐᑦ ᑭᒡᒐᑐᕐᓱᒋᑦ.
 Iristel ᐊᖏᓂᕐᐸᐅᖃᑕᐅᔪᖅ ᐱᒐᓱᐊᕐᑎᒪᕆᐅᖃᑕᐅᔪᖅ ᓄᓇᓕᓐᓂ ᐱᔪᓐᓇᑎᑦᓯᔨᓄᑦ ᐊᒻᒪᓗ VoIP-ᑎᒎᕐᑐᓂᒃ ᒪᓂᔨᓯᒪᔨᐅᑦᓱᓂ ᑳᓇᑕᒥ.