ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᕋᑦᓭᑦ: ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᖓ ᐃᓄᑦᔪᐊᒥ ᓵᓚᓐᓃᔪᑦ $500ᓴᐅᓴᓂᒃ 2017-ᒥ ᐅᑭᐅᕐᑕᑐᒥ ᐱᔪᑦᓴᐅᔮᕐᑎᓯᓂᕐᓄᑦ ᓵᓚᖃᕐᑎᓯᓂᕐᓄᑦ ᖁᕕᐊᓲᑎᖃᕐᓂᒥ

AIP Unaaq

ᕕᕗᐊᔨ 6, 2018 - ᑰᑦᔪᐊᖅ, ᑯᐯᒃ – ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᑫᐋᔩ) ᐊᓕᐊᒍᑦᔨᕗᑦ ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᖓᓂᒃ ᐃᓄᑦᔪᐊᒥ, ᓄᓇᓕᓐᓂ ᓴᐳᑦᔨᓯᒪᓂᕐᓄᑦ ᐃᓚᒌᑦᑐᓂᒃ ᐱᕙᓪᓖᒋᐊᕐᑎᐅᓱᑎᒃ ᓯᕗᓕᕐᑎᐅᓂᕐᒥᒃ, ᐃᒻᒥᓂᒃ-ᐅᐱᒪᒋᔭᖃᕐᓂᒥᒃ ᐊᒻᒪᓗ ᐱᐅᓯᑐᖃᕐᑎᒍᑦ ᖃᐅᔨᒪᓂᕐᓂᒃ ᑎᒎᓪᓚᔭᐅᑎᑦᓯᓂᕐᓂᒃ, ᓵᓚᖃᓚᐅᕐᒪᑕ ᐅᑭᐅᕐᑕᑐᒥ ᐱᔪᑦᓴᐅᔮᕐᑎᓯᓂᕐᓄᑦ ᖁᕕᐊᓲᑎᖃᑎᖃᕐᓂᖃᕐᑎᓗᒍ ᔭᓄᐊᔨ 31, 2018-ᒥ, ᐊᑐᕗᐊᒥ.

ᑫᐋᔩᑉ ᑐᑭᒧᐊᑦᑎᓯᔨᖓ ᔨᐊᓂᕙ ᒪᓂᒃ ᑖᕙᓃᓚᐅᕐᑐᖅ ᒪᓕᑦᓯᒪᑦᓱᓂ ᐅᓈᒃᑯᑦ ᑭᒡᒐᑐᕐᑎᖏᓐᓂᒃ ᐊᒻᒪᓗ ᒪᑭᕝᕕᑯᑦ ᐊᖓᔪᕐᖄᖓᓂᒃ ᓵᓕ ᒍᐊᒥᒃ ᑕᑯᓐᓇᑕᐅᓂᖃᕐᑎᓗᒋᑦ ᐁᑦᑐᑕᐅᑦᓱᑎᒃ ᐱᔭᐅᒍᒪᓪᓚᕆᑦᑐᓂᒃ $500,000-ᓂᒃ ᓵᓚᖃᕈᑎᓂᒃ. ᑲᑎᑦᓱᑎᒃ, $2,4 ᒥᓕᐊᓐ ᐅᖓᑖᓅᕐᑐᑦ ᐊᕕᑦᑕᐅᓚᐅᕐᑐᑦ ᓯᑕᒪᐅᔪᕐᑐᓄᑦ ᐁᑦᑑᑎᐅᑦᓱᑎᒃ ᓇᓪᓕᑳᕐᑕᐅᓯᒪᔪᓄᑦ ᐱᖓᓱᐃᓂᒃ ᐊᑦᔨᒌᖕᖏᑐᓂᒃ ᐱᑦᔪᑎᖃᕐᓱᑎᒃ ᐁᑦᑐᑕᐅᓂᖃᕐᑎᓗᒋᑦ.


"ᐱᒋᐊᕐᐸᓕᐊᑎᓪᓗᒋᑦ, ᐱᒻᒪᕆᐅᓯᒪᔪᖅ ᐅᕙᑦᑎᓄᑦ ᓴᐳᑦᔨᓂᕗᑦ ᓂᕈᐊᕐᑕᐅᓂᖏᓐᓂᒃ ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᖓᑕ ᐊᒻᒪᓗ ᐅᐱᒪᒍᑦᔨᒪᕆᓕᕐᓱᒋᑦ," ᓚᓚᐅᕐᑐᖅ ᔨᐊᓂᕙ ᒪᓂᒃ. "ᑖᓐᓇ ᐱᒋᐊᕐᑎᓯᒪᔭᖓ ᐱᒻᒪᕆᐅᑦᓱᑎᒃ ᐆᑦᑑᑎᑦᓯᐊᒍᒻᒪᑦ ᖃᓄᖅ ᓄᓇᓕᓐᓂ ᑐᖕᖓᕕᓖᑦ ᐱᓇᓱᐊᕐᑌᑦ ᐱᒻᒪᕆᑎᒍᑦ ᖃᓄᐃᓕᖕᙰᓯᐊᕈᓐᓇᒪᑕ ᐃᓚᒋᓕᐅᑎᑎᑦᓯᐊᓚᕿᑦᓱᒋᑦ ᓄᓇᕕᒻᒥᐅᑦ ᓄᓇᓕᒥᓂ ᐱᓇᓱᐊᕈᑎᒋᑦᓯᐊᓱᒋᑦ ᑲᒪᖃᑕᐅᑎᑦᓱᒋᓪᓗ ᖃᓄᐃᓪᓗᐊᑐᑐᐃᓐᓇᓂᒃ ᐅᑭᐅᓖᑦ."


ᓄᐃᑕᐅᓯᒪᑦᓱᓂ 2001-ᒥ, ᐅᓈᖅ ᐊᖑᑏᑦ ᑲᑐᑦᔨᖃᑎᒌᓐᓂᖓ ᐱᒋᐊᕐᑎᑕᐅᓯᒪᔪᖅ ᐊᖑᑎᓄᑦ ᑲᑎᔪᓄᑦ ᐱᓇᓱᐊᓚᖓᓕᕐᓱᑎᒃ ᐅᕕᒃᑫᑦ ᐃᓱᐃᓪᓘᕈᑎᒋᕙᑦᑕᖏᓐᓂᒃ ᐊᒻᒪᓗ ᐱᓀᓗᑕᓂᒃ ᐋᕐᕿᓱᐃᒋᐊᕐᓗᑎᒃ ᐊᑯᓐᓂᖃᕐᓂᖏᑦ ᐃᓄᑐᙯᑦ ᐊᒻᒪᓗ ᐅᕕᒐᕐᓂᓭᑦ ᓄᐃᑕᒍᓐᓀᑎᒋᐊᓯᑦᓱᒍ. ᑌᑦᓱᒪᓂᓂᑦ, ᑲᑐᑦᔨᖃᑎᒌᓐᓂᒃ ᓄᐃᑦᓯᓚᕿᓯᒪᓕᕐᑐᖅ ᐃᓅᖃᑎᒌᑦᓯᐊᓂᕐᒥᒃ ᐃᓄᑦᔪᐊᒥ ᐱᕙᓪᓕᐊᑎᑦᓱᒍ ᐃᓄᐃᑦ ᐃᓗᒡᒍᓯᖓ, ᓄᐃᑎᕐᓱᒋᓪᓗ ᕿᑲᑐᐃᓐᓇᓇᖕᖏᑐᐃᑦ ᐱᓇᓱᒉᑦ ᐊᒻᒪᓗ ᓄᓇᓖᑦ ᑭᒡᒐᑐᕐᓱᒋᑦ.


ᐃᓄᑐᙯᑦ ᐱᓇᓱᐊᖃᑕᐅᓪᓚᕆᑉᐸᒥᔪᖅ ᐅᓈᒃᑯᓂᒃ, ᖃᐅᔨᒪᔭᒥᓂᒃ ᐃᓕᓐᓂᐊᑎᑦᓯᓱᑎᒃ, ᑕᓯᐅᕐᓯᔨᒋᔭᐅᑦᓱᑎᒃ, ᐅᓂᒃᑳᕕᖃᕐᓱᑎᒃ ᐊᒻᒪᓗ ᓄᓇᒥ ᐱᓯᑎᐅᒍᑎᓂᒃ ᐃᓕᓐᓂᐊᑎᑦᓯᓱᑎᒃ. ᐃᓗᒡᒍᓯᒧᐊᖓᔪᑦ ᐃᓕᓐᓂᐊᑎᑦᓯᐅᑕᐅᓲᑦ ᓯᓚᒥ ᐅᕝᕙᓘᓐᓃᑦ ᐊᓪᓚᕕᒻᒥ, ᐊᒥᓱᑦ ᑲᑐᑦᔨᖃᑎᒌᓐᓂᐅᑉ ᐱᓇᓱᒐᖏᑦ ᐱᓇᓱᐊᕈᓐᓇᑎᑦᓯᐅᑕᐅᕙᑦᑐᑦ ᐃᓄᑐᖃᕐᓂᒃ, ᐊᖑᑎᓂᒃ ᐊᒻᒪᓗ/ᐅᕝᕙᓘᓐᓃᑦ ᐅᕕᒃᑲᓂᒃ.

 

-30-

 


ᑐᑭᓯᒋᐊᕐᕕᓴᖅ:
ᔮᓐ-ᕕᓕᑉ ᑐᐳᐊ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961 ext. 2219
| www.krg.ca

 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.