ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᕋᑦᓭᑦ: ᑫᐋᔩ ᑐᓴᕐᑎᓯᔪᖅ ᑐᓂᕐᕈᓯᒍᑎᓂᒃ $1 ᒥᓕᐊᓂᒃ ᑐᕌᕐᑐᓂᒃ ᓄᑖᒧᑦ ᐃᓱᐊᕐᓯᕕᒃ ᒪᒥᓴᕐᕕᒧᑦ

Isuarsivik contribution 001 Isuarsivik contribution 002

ᑰᑦᔪᐊᖅ, ᑯᐯᒃ, ᔭᓄᐊᔨ 23, 2018 – ᑭᖑᓂᖓᒍᑦ ᐱᕙᓪᓕᐊᒪᕆᑦᓯᒪᓕᕐᑑᑉ ᐸᕐᓀᓂᓂᐅᑉ ᐃᓱᐊᕐᓯᕕᒃ ᒪᒥᓴᕐᕕᐅᑉ ᓴᓇᔭᐅᓂᑦᓴᖓᓄᑦ ᐊᒻᒪᓗ ᐃᖕᖏᕐᕋᓯᑎᑕᐅᓂᑦᓴᖓᓄᑦ ᓄᑖᑉ ᓄᓇᓕᓕᒫᒥ ᒪᒥᓴᕐᕕᐅᓚᖓᔫᑉ, ᐊᒻᒪᓗ ᑖᑦᓱᒥᖓ ᐅᖃᐅᓯᖃᕐᓯᒪᓂᖏᑦᑕ ᑲᕙᒪᑐᖃᒃᑯᑦ ᐊᒻᒪᓗ ᑯᐯᒃᑯᑦ ᑲᕙᒪᖓᑕ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ (ᑫᐊᔩ) ᐊᓕᐊᓕᕐᑐᖅ ᑐᓴᕐᑎᓯᒋᐊᒥᒃ ᒪᓂᔨᓚᖓᓕᕋᒥ ᑲᑎᓂᓕᓐᓂᒃ $1 ᒥᓕᐊᓂᒃ ᐱᖁᑎᒻᒪᕆᐅᑉ ᐊᑭᖏᓐᓄᑦ ᐊᑐᕐᑕᐅᔪᑦᓴᓂᒃ. ᑫᐋᔩ ᑮᓇᐅᔭᖃᕐᑎᓯᓚᖓᔪᖅ ᑖᑦᓱᒥᖓ ᐱᓇᓱᒐᕐᒥᒃ ᐊᕐᕌᒍᓂ 3-ᓂ ᐃᓕᔭᐅᖃᑦᑕᓚᖓᔪᓂᒃ: $350,000-ᓂᒃ 2018-ᒥ ᐊᒻᒪᓗ 2019-ᒥ, ᐊᒻᒪᓗ $300,000-ᓂᒃ 2020-ᒥ.

ᓄᑖᖅ ᒪᒥᓴᕐᕕᒃ ᓂᕆᐅᒋᔭᐅᔪᖅ ᐃᓗᐃᒃᑲᑎᒍᑦ ᐃᖏᕐᕋᓂᖃᓛᓕᕐᓂᖓ 2020-ᐅᓕᕐᐸᑦ ᑰᑦᔪᐊᒥ. ᑖᒃᑯᐊ ᐱᐅᓭᒋᐊᕈᑏᑦ ᐱᖁᑎᒻᒪᕆᒻᒥᒃ ᐃᓚᐅᓕᕐᑎᓗᒋᑦ, ᓄᑖᖅ ᐃᓱᐊᕐᓯᕕᒃ ᓄᓇᓕᓕᒫᓂ ᒪᒥᓴᕐᕕᒃ ᐃᒣᑦᑎᓯᒍᓐᓇᓚᕿᓚᖓᑎᓪᓗᒍ:
•    ᐊᑐᐃᓐᓇᐅᑎᑕᐅᖃᑦᑕᓛᓕᕐᑐᑦ ᐃᓗᒡᒍᓯᒥᒃ ᒪᓕᑦᓯᐊᑐᑦ ᑭᒡᒐᑐᕐᑕᐅᔪᑦ ᒪᒥᓴᕐᓂᑎᒍᑦ ᐃᓘᓐᓇᖏᑦᑕ ᓄᓇᕕᒻᒥᐅᑦ ᐊᕐᕌᒍᑕᒫᑦ ᐃᑎᕐᓯᒪᒍᓐᓇᓯᑎᓪᓗᒋᑦ 175 ᑭᒡᒐᑐᕐᑌᑦ ᑎᑭᓪᓗᒋᑦ. ᐅᓪᓗᒥ ᐊᕐᕌᒍᑕᒫᑦ ᐃᑎᕐᓯᒪᕕᐅᒍᓐᓇᐸᑦᑐᖅ 45-ᑐᐃᓐᓇᓄᑦ.
•    ᐅᐃᒪᓇᕐᑐᑦ ᐃᑎᕐᑎᑕᐅᑲᐱᒍᓐᓇᓯᓗᑎᒃ ᐊᒻᒪᓗ ᓴᐳᑦᔭᐅᒍᓐᓇᓯᓗᑎᒃ ᓄᑕᕋᑦᓴᓖᑦ ᐊᕐᓀᑦ ᐊᒻᒪᓗ ᕿᑐᕐᖓᖏᑦ.
•    ᐃᓚᒌᓄᑦ ᐋᕐᕿᓯᒪᔪᑦ ᑲᒪᒋᔭᖃᕈᓰᑦ ᐃᓚᐅᖃᑦᑕᓯᑎᓪᓗᒋᑦ ᑭᒡᒐᑐᕐᑌᑦ ᐃᓚᖏᑦ ᐊᒻᒪᓗ ᕿᑐᕐᖓᖏᑦ ᒪᒥᓴᕐᓂᖏᓐᓄᑦ. ᑖᒃᑯᐊ ᐃᓚᖃᕐᑎᓗᒋᑦ ᐃᓚᒌᑦ ᐊᒻᒪᓗ ᐁᑉᐸᕇᑦ ᐋᕐᕿᓲᑎᓂᖏᓐᓂᒃ ᐊᒻᒪᓗ ᐱᕙᓪᓕᑎᒋᐊᕐᓗᒋᑦ ᕿᑐᕐᖏᐅᓯᐊᕈᑎᓂᒃ ᐃᓕᓴᕐᑕᐅᓂᕐᒥᑎᒍᑦ.
•    ᐱᓇᓱᐊᖃᑎᖃᕐᓂᖅ ᐃᓚᐅᑎᓪᓗᒋᑦ ᐃᕐᖃᑐᐃᕕᓕᕆᓂᕐᓃᑐᑦ ᑯᐯᑉ ᐃᕐᖃᑐᐃᕕᖓᑕ ᐅᐃᕆᓯᒪᔪᓂᒃ ᒪᒥᓴᕐᑎᓯᓂᕐᓄᑦ ᐱᓇᓱᒐᖏᑦ (Programme de traitement de la toxicomanie de la Cour du Québec).

 

"ᓱᒃᑯᓇᕐᑐᓂᒃ ᐊᑐᕐᓂᓗᓐᓂᓄᑦ ᐱᓀᓗᑌᑦ ᑭᓇᓕᒫᒃᑯᓂᒃ ᓄᓇᕕᒻᒥ ᖃᓄᐃᓕᖕᙰᓯᒪᓲᑦ" ᓚᓚᐅᕐᑐᖅ ᑫᐊᔩᑉ ᑐᑭᒧᐊᑦᑎᓯᔨᖓ ᔨᐊᓂᕙ ᒪᓂᒃ. "ᖃᐅᔨᒪᓇᑦᓯᐊᑐᖅ - ᑌᒫᓪᓗ ᑐᓴᕐᑕᐅᑎᑦᓯᓯᒪᑦᓱᑎᒃ ᐃᓱᐊᕐᓯᕕᒻᒥᒃ ᐸᕐᓀᑏᑦ - ᐃᒫᒃ ᓄᑖᖅ ᓄᓇᓕᓕᒫᓂ ᒪᒥᓴᕐᕕᒃ ᓄᐃᑕᑎᑦᓯᓚᖓᔪᖅ ᓄᓇᓖᑦ ᑲᑎᒍᑎᖃᕐᓂᖓᓂᒃ ᑎᒍᓯᒋᐊᓪᓚᓂᖃᕐᓗᑎᒃ ᓄᓇᓕᓕᒫᓂ ᓯᕗᓂᑦᓴᒥᒃ, ᓄᑭᑖᕐᑎᓗᒋᑦ ᐃᓄᐃᑦ ᐊᒻᒪᓗ ᐃᓅᒡᒍᓯᕗᑦ ᐅᖑᒪᒍᓐᓇᓯᓗᒍ."


ᑖᒃᑯᐊ ᑐᓂᕐᕈᑏᑦ ᐱᐅᓯᐅᒥᑎᑦᓯᓚᖓᓂᖏᑦ ᖃᐅᔨᒪᓇᕐᑐᑦ ᐃᓚᖃᕐᑎᓗᒋᑦ ᐱᒻᒪᕆᓐᓂᒃ ᑐᓂᕐᕈᓯᓂᒋᐊᓪᓚᓂᒃ ᐱᔭᐅᑎᓚᖓᔭᖏᓐᓂᒃ ᓄᓇᕕᐅᑉ ᐱᓇᓱᐊᖃᑎᖏᓐᓄᑦ ᑯᐯᒃᑯᑦ ᑲᕙᒪᖓᑕ ᐊᒻᒪᓗ ᑲᕙᒪᑐᖃᒃᑯᑦ, ᐊᒻᒪᓗ ᒪᑭᕝᕕᒃ ᑯᐊᐳᔦᓴᒃᑯᑦ, ᐃᑲᔪᕐᓯᓗᑎᒃ ᓄᐃᑕᐅᓂᖓᓄᑦ ᓴᑑᑎᖏᓐᓂᒃ ᐊᑭᓕᕈᓐᓇᓯᑎᓗᒋᑦ ᑮᓇᐅᔭᕐᑑᑎᖏᑦ ᑖᑦᓱᒪ ᐱᒻᒪᕆᐅᑉ ᐱᓇᓱᒐᐅᑉ.

 

-30-


ᑐᑭᓯᒋᐊᕐᕕᓴᖅ:
ᔮᓐ-ᕕᓕᑉ ᑐᐳᐊ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961 ext. 2219
 
www.krg.ca

 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ 1978-ᒥ ᑎᒥᖕᖑᑎᑕᐅᓯᒪᔪᖅ ᐃᓄᓐᓄᐊᖓᔪᖅ ᐃᓕᒃᑰᑎᕐᑎᓯᒐᓂ, ᐊᑖᒎᕐᓱᓂ ᔦᒥᔅ ᐯ ᐊᒻᒪᓗ ᑯᐯᑉ ᑕᕐᕋᖓᑕ ᐊᖏᖃᑎᒌᒍᑎᐅᑉ, ᑖᓐᓇ ᑎᒥ ᐊᖓᔪᕐᖃᐅᕕᖃᕐᐳᖅ ᑯᐯᑉ ᑕᕐᕋᖓᑕ ᓄᓇᓕᒫᑲᓵᖓᓂᒃ 55 ᖁᓛᓂ ᐱᑦᔪᑎᒋᓗᒋᑦ ᓄᓇᓖᑦ ᑲᒪᒋᔭᖃᕐᓂᖏᑦ, ᐃᖏᕐᕋᐅᑎᓕᕆᓂᖅ, ᐊᕙᑎ, ᐳᓖᓯᖃᕐᓂᖅ, ᐱᓇᓱᒐᑦᓴᓕᕆᓂᖅ, ᐱᓇᓱᒋᐅᕐᓴᑎᑦᓯᓂᖅ, ᓂᕐᓯᑕᐅᑦᑕᑐᓕᕆᓂᖅ, ᐯᕆᑦᓯᕕᖃᕐᑎᓯᓂᖅ, ᓄᑕᐅᓪᓕᕈᓐᓇᑐᓕᕆᓂᖅ, ᓄᓇᐅᑉ ᐊᑐᕐᑕᐅᓂᖓᓄᑦ ᐸᕐᓀᒍᑎᓕᐅᕐᓂᖅ, ᐃᓄᓐᓂᒃ ᐊᑦᑕᓀᑦᑐᒦᑦᑎᓯᓂᖅ ᐊᒻᒪᓗ ᐱᕙᓪᓕᐊᑎᑦᓯᓂᖅ ᒪᑭᑕᒐᓱᐊᕈᑎᓂᒃ.