ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᓴᓇᔩᑦ

ᓴᓇᔩᑦ ᐱᓇᓱᒐᖅ ᑰᑦᔪᐊᒦᑦᑐᖅ ᐊᒻᒪᓗ ᑲᔪᓯᑎᑦᓯᕕᐅᕙᑦᓱᓂ ᑭᒡᒐᑐᕈᑎᓂᒃ ᐃᓘᓐᓀᓂ ᓄᓇᓕᖏᓐᓂ ᓄᓇᕕᐅᑉ. ᑐᕌᒐᓕᒃ ᒪᓂᔨᓯᒪᓂᕐᒥᒃ ᐱᓇᓱᒐᑦᓴᓯᐅᕈᑦᔨᓂᕐᓂᒃ ᐊᒻᒪᓗ ᐃᓕᓐᓂᐊᑎᑦᓯᓂᕐᓄᑦ ᑭᒡᒐᑐᕈᑎᓂᒃ ᓴᓇᓂᕐᒥ.

ᑕᑲᒃᑯᐊ ᐃᓕᓐᓂᐊᑎᑦᓯᓃᑦ ᒪᓂᔭᐅᓯᒪᔪᑦ:

ᐃᓗᓯᕐᓱᓂᕐᓄᐊᖓᔪᓂᒃ ᐊᒻᒪᓗ ᐊᑦᑕᓀᑦᑐᒦᓐᓂᓄᑦ ᓴᓇᕕᓐᓂ ᐃᓕᓐᓂᐊᑎᑦᓯᓂᖅ
o    ᑖᑦᓱᒥᖓ ᐃᓕᓐᓂᐊᑎᑕᐅᒋᐊᖃᓲᑦ ᑭᓇᓕᒫᒃᑯᑦ ᐱᓇᓱᐊᓚᖓᔪᑦ ᓴᓇᕕᓐᓂ. ᐱᖁᔭᖅ ᓴᓇᔨᓂᒃ ᑖᑦᓱᒥᖓ ᐃᓕᓐᓂᐊᓯᒪᓂᕐᒥᓄᑦ ᐊᓂᒍᐃᒍᑎᑖᕐᓯᒪᒋᐊᖃᕐᓂᕃᔪᖅ.

ᐃᓚᐅᒍᓐᓇᑐᑦ; 16-ᓂᒃ ᐅᖓᑖᓄᓪᓗ ᐅᑭᐅᖃᕐᓗᑎᒃ

 

ᓴᓇᓯᑎᐅᒍᑎᑦᓭᑦ, ᐳᕐᑐᓂᓕᒃ 1-ᒥᒃ / ᐊᐅᔭᒥ ᐱᓇᓱᐊᕐᑐᑦ ᐱᓯᑎᐅᒍᑎᑦᓴᖏᑦ
o    ᑕᓐᓇ ᐃᓕᓐᓂᐊᑎᑦᓯᓂᖅ ᒪᓂᔨᓯᒪᐅᑕᐅᔪᖅ ᓴᓇᔨᑦᓭᑦ ᐱᒋᐊᕐᕕᓕᐅᑎᖓᓂᒃ ᐃᓚᖃᕐᒥᓱᓂ ᐃᓕᓐᓂᐊᑎᑦᓯᕕᐅᑉ ᐃᓗᐊᓂ ᐃᓕᓭᓂᕐᓂᒃ ᐊᒻᒪᓗ ᓴᓇᔪᓃᑦᑐᓂᒃ ᐃᓕᓐᓂᐊᑎᑦᓯᓂᖅ. ᕿᒥᕐᕈᑕᐅᒋᐊᓖᑦ ᑭᑎᑦᔪᑎᓐᓂᐊᓂᕐᓄᐊᖓᔪᑦ ᓴᓇᓂᕐᓂ ᐊᒻᒪᓗ ᐃᓚᐅᔪᑦ ᐱᒋᐅᕐᓴᑎᑕᐅᑎᓗᒋᑦ ᐃᓪᓗᐊᐱᒻᒥᒃ ᓴᓇᑎᑕᐅᑦᓱᑎᒃ.

ᐃᓚᐅᒍᓐᓇᑐᑦ; ᓇᓗᓀᕐᑐᓯᒪᔭᐅᓂᖃᕐᓗᑎᒃ 1,000 ᐅᖓᑖᓅᕐᑐᓂᒃ ᐃᑲᐅᕐᓂᖃᕐᓯᒪᓗᑎᒃ ᓴᓇᓂᕐᒥ ᐱᓇᓱᐊᕐᓗᑎᒃ

 

ᓴᓇᓯᑎᐅᒍᑎᑦᓭᑦ, ᐳᕐᑐᓂᓕᒃ 2-ᒥᒃ
o    ᑖᓐᓇ ᐃᓕᓐᓂᐊᑎᑦᓯᓂᖅ ᐃᓚᓕᒃ ᐃᓕᓐᓂᐊᑎᑦᓯᓂᒻᒪᕆᓐᓂᒃ ᓴᓇᔨᐅᓂᕐᓄᐊᖓᔪᓂᒃ ᐃᓕᓐᓂᐊᑎᑦᓯᕕᐅᑉ ᐃᓗᐊᓂ ᐊᒻᒪᓗ ᓴᓇᔪᓃᑦᑐᓂᒃ. ᐊᕐᖁᑎᒋᑦᓱᒋᑦ ᓴᓇᔭᐅᓂᖏᑦ ᒥᑭᔪᕐᓓᑦ ᐃᓪᓗᐊᐲᑦ, ᐃᓚᐅᔪᑦ ᖃᐅᔨᓴᕐᑎᑕᐅᔪᑦ ᐃᓱᒪᑦᓴᓯᐅᕈᑎᖃᕐᓱᑎᒃ ᐆᑦᑑᑎᒋᓗᒋᑦ ᖁᓛᑦ ᐊᒥᐊᖏᓐᓂᒃ ᐊᒻᒪᓗ ᐃᑭᐊᕐᒥᐅᑕᑦᓯᑐᐃᓂᕐᓂᒃ, ᐊᓯᖃᕐᒥᑎᓗᒋᑦ. ᐃᓕᓐᓂᐊᑎᑦᓯᕕᐅᑉ ᐃᓗᐊᓂ ᐃᓕᓐᓂᐊᑎᑦᓯᓂᖅ ᐃᓚᓕᒃ ᕿᒥᕐᕈᓂᕐᓂᒃ ᓴᓇᓂᕐᓄᐊᖓᔪᓂᒃ ᑭᑎᑦᔪᑎᓐᓂᐊᓂᕐᓂᒃ ᓯᓚᑐᒍᑎᑦᓴᓂᒃ.

ᐃᓚᐅᒍᓐᓇᑐᑦ: ᓇᓗᓀᕐᑐᓯᒪᔭᐅᓂᖃᕐᓗᑎᒃ 500 ᐅᖓᑖᓅᕐᑐᓂᒃ ᐃᑲᐅᕐᓂᖃᕐᓯᒪᓗᑎᒃ ᓴᓇᓂᕐᒥ ᐱᓇᓱᐊᕐᓗᑎᒃ ᐊᒻᒪᓗ/ᐅᕝᕙᓘᓐᓃᑦ ᐱᔭᕇᕐᓯᒪᓗᑎᒃ CS1 ᖁᓛᓃᑦᑐᒥᒃ

 

ᓴᓇᓯᑎᐅᒍᑎᑦᓭᑦ, ᐊᓪᓚᓯᒪᔪᓂᒃ ᐊᑐᕐᓂᖅ
o        ᑖᓐᓇ ᐃᓕᓐᓂᐊᑎᑦᓯᓂᖅ ᐃᓚᖃᓲᖅ ᐱᒋᐅᕐᓴᑎᑦᓯᒍᑎᓂᒃ ᐊᒥᓱᐃᓂᒃ ᐱᒻᒪᕆᓐᓂᒃ ᖃᐅᔨᒪᔭᐅᓪᓚᕆᒋᐊᓕᓐᓂᒃ ᐃᓕᖓᑦᓱᑎᒃ ᓴᓇᓂᕐᓄᑦ. ᐃᓚᐅᔪᑦ ᐃᓕᑦᓯᒐᔭᕐᑐᑦ ᐊᐅᓚᑕᐅᑦᓯᐊᕈᑎᖏᓐᓂᒃ ᐱᒋᐅᕐᐸᓕᐊᓯᒪᓂᖏᓐᓂᒃ ᓇᓗᓀᕐᑐᐃᓯᒪᕕᒻᒥᒃ ᐱᓚᕿᓗᑎᒃ, ᐃᑦᑑᓂᐅᑎᑦᓴᓄᓪᓗ ᐸᕐᓀᓯᒪᐅᑎᓂᒃ, ᐃᒻᒪᖃᐅᑎᓄᑦ ᓇᓗᓀᕐᑕᐅᒍᑎᑖᕐᓯᒪᓗᑎᒃ ᐊᒻᒪᓗ ᐊᒥᓱᐃᓂᒃ ᐊᓯᖏᓐᓂᒃ ᐱᒻᒪᕆᓐᓂᒃ ᐱᓇᓱᐊᕈᓐᓇᓯᒪᐅᑎᓂᒃ. ᕿᒥᕐᕈᔭᐅᓛᕐᒥᔪᑦ ᑕᕝᕙᓂ ᑭᑎᑦᔪᑎᓐᓂᐊᓂᑎᒍᑦ ᓯᓚᑐᒍᑎᑦᓭᑦ ᐃᓕᖓᔪᑦ ᓴᓇᓂᕐᓄᑦ.

ᐃᓚᐅᒍᓐᓇᑐᑦ: ᓇᓗᓀᕐᑐᓯᒪᔭᐅᓂᖃᕐᓗᑎᒃ 500 ᐅᖓᑖᓅᕐᑐᓂᒃ ᐃᑲᐅᕐᓂᖃᕐᓯᒪᓂᖏᑦ ᓴᓇᓂᕐᒥ

 

ᐃᓪᓘᑉ ᐃᓗᖏᓐᓂ ᐱᔭᕇᕐᓯᒪᔪᓕᐅᕐᓂᖅ
o        ᐃᓪᓘᑉ ᐃᓗᖏᓐᓂ ᐱᔭᕇᕐᓯᒪᔪᓕᐅᕐᓂᓂᒃ ᐃᓕᓐᓂᐊᑎᑦᓯᓂᖅ ᓄᐃᑕᐅᒍᑎᖃᕐᓯᒪᔪᖅ ᑐᕌᖓᑎᓪᓗᒍ ᓴᓇᔨᓄᑦ ᐱᓯᑎᖕᖑᓕᐅᒥᒍᒪᔪᓄᑦ ᓴᓇᓯᑎᐅᓂᕐᒥᑎᒍᑦ. ᑖᓐᓇ ᐃᓕᓐᓂᐊᑎᑦᓯᓂᖅ ᐃᓚᖃᓲᖅ ᐃᓕᑦᓯᑎᑕᐅᒍᑎᖏᓐᓂᒃ ᐱᑦᓯᐊᕋᓱᐊᕐᑕᐅᒋᐊᖃᕐᓂᓴᓂᒃ ᐆᑦᑑᑎᒋᓗᒋᑦ ᐅᒃᑯᐊᑦ, ᐃᓪᓕᓇᐅᔦᑦ, ᓇᑎᓕᕐᑐᐃᓃᑦ.

ᐃᓚᐅᒍᓐᓇᑐᑦ: ᓇᓗᓀᕐᑐᓯᒪᔭᐅᓂᖃᕐᓗᑎᒃ 1000 ᐅᖓᑖᓅᕐᑐᓂᒃ ᐃᑲᐅᕐᓂᖃᕐᓯᒪᓂᖏᑦ ᓴᓇᓂᕐᒥ

 

ᐊᓯᖏᑦ ᐱᓇᓱᒉᑦ ᒪᓂᔭᐅᓯᒪᔪᑦ ᓴᓇᔩᑦ ᐱᓇᓱᒐᕐᒧᑦ:

ᐱᓇᓱᐊᕐᓗᑎᓗ ᐃᓕᓐᓂᐊᑎᑌᑦ - ᐱᓇᓱᒐᑦᓴᓕᕆᓂᕐᓄᑦ ᑭᒡᒐᑐᕈᑏᑦ
o    ᐊᕐᕌᒍᑕᒫᑦ, ᐱᓇᓱᐊᕐᑐᓂᒃ ᐃᓕᓐᓂᐊᑎᑦᓯᓂᕐᓄᑦ ᐱᓇᓱᒐᖅ ᐃᑲᔪᕐᓯᒍᑕᐅᑎᑦᓯᓯᒪᓕᕐᑐᖅ 130-ᓂᒃ ᐃᓄᓐᓂᒃ ᓴᓇᔨᓂᒃ ᐱᓇᓱᒐᕐᑖᓚᕿᑎᑦᓱᒋᑦ ᐊᒻᒪᓗ ᐱᓯᑎᐅᒍᑎᒥᓂᒃ ᐱᕙᓪᓕᐊᑎᑦᓯᒍᓐᓇᓚᕿᑦᓱᑎᒃ ᓴᓇᓂᕐᓂ. ᓴᓇᕕᑦᓴᐅᓂᓕᒫᖓᓂ, ᐱᒋᐅᕐᓴᑐᑦ ᐱᓇᓱᐊᖃᑎᖃᕐᑎᑕᐅᓲᑦ ᐃᓕᓐᓂᐊᑎᑦᓯᔨᐅᑦᓱᑎᓗ ᐱᓇᓱᑦᑎᓂᒃ ᐃᓕᓴᕐᑕᐅᓱᑎᒃ ᓴᓇᔨᑦᓯᐊᒍᒍᑎᐅᓲᓂᒃ. ᓴᓇᔩᑦ ᐱᓇᓱᒐᖅ ᓇᓗᓀᕐᑐᐃᕕᐅᓯᒪᓲᖅ ᑌᒫᒃ ᐱᒋᐅᕐᓴᑎᑕᐅᓯᒪᓕᕐᑐᓂᒃ ᐃᓗᓕᖏᓐᓃᑎᓗᒋᑦ ᐱᒋᐅᕐᓴᑐᑦ ᐊᓪᓛᐱᖁᑎᖏᑦᑕ.

 

ᑐᓴᓕᑌᓐᓇᑎᑦᓯᒍᑏᑦ ᓴᓇᓂᕐᓄᑦ ᐱᓇᓱᒐᐅᓲᓂᒃ
o    ᐊᕐᕌᒍᒥ ᒪᕐᕈᕕᑦᑎᓗᒍ, ᓴᓇᔩᑦ ᐱᓇᓱᒐᖅ, ᐱᓇᓱᐊᖃᑎᐅᑎᓪᓗᒍ ᑲᑎᕕᒃ ᐃᓕᓴᕐᓂᓕᕆᕕᒃ, ᒪᓂᔨᓯᒪᓲᖅ ᑐᓴᕐᑎᑕᐅᓕᑌᓐᓇᕈᑎᖏᓐᓂᒃ ᓴᓇᓂᕐᓄᑦ ᐱᓇᓱᒐᐅᓲᑦ ᓄᓇᕕᒻᒥ ᐃᓕᓵᑦ ᐃᓕᓴᕐᑕᐅᑎᓪᓗᒋᑦ. 15 ᐃᓕᓵᑦ ᐃᓄᑦᔪᐊᓕᐊᕈᓐᓇᑎᑕᐅᓛᕐᑐᑦ ᐃᓚᐅᒋᐊᕐᑐᓗᑎᒃ ᐱᓇᓱᐊᖃᑎᒌᓄᑦ ᑕᑯᔭᕐᑐᑎᑕᐅᓗᑎᒃ ᓄᓇᕕᒻᒥ ᐱᒋᐅᕐᓴᕕᒻᒥᒃ. ᐃᓕᓵᑦ ᐆᑦᑐᕋᕐᑎᑕᐅᑎᓪᓗᒋᑦ ᐊᑦᔨᒌᖕᖏᑐᓂᒃ ᓴᓇᓂᕐᓄᐊᖓᔪᓂᒃ ᐱᓇᓱᒐᕐᓂᒃ ᐆᑦᑑᑎᒋᓗᒋᑦ ᓴᓇᓂᖅ, ᓱᓪᓗᓕᓕᕆᓂᖅ ᐊᒻᒪᓗ ᐸᕐᖄᕈᑎᓐᓂᐊᓂᖅ, ᓂᐱᑎᕆᓂᖅ ᐊᒻᒪᓗ ᐅᖁᒣᑦᑐᓂᐅᑎᓂᒃ ᐊᐅᓚᐅᑎᓐᓂᐊᓂᖅ. ᐃᓕᓵᑦ ᐱᓇᓱᐊᕐᑎᑕᐅᒍᓐᓇᕕᖃᕐᒥᑎᓪᓗᒋᑦ ᓴᓇᓂᕐᒧᑦ ᐱᓇᓱᒐᕐᒥᒃ ᓴᓇᔭᐅᑎᓪᓗᒋᑦ ᕿᔪᐃᑦ ᓴᓇᕐᕈᑎᖃᐅᑏᑦ ᐃᕐᓯᕖᑦ.

 

ᑐᕌᒐᓪᓚᕆᓖᑦ ᐱᓇᓱᒉᑦ
o    ᓴᓇᔩᑦ ᐱᓇᓱᒐᖅ ᐃᓚᐅᕙᒻᒥᔪᖅ ᑐᕌᒐᓪᓚᕆᓕᓐᓄᑦ ᐱᓇᓱᒐᕐᓄᑦ. ᕿᓄᕕᐅᓯᒪᑦᓱᓂ, ᐱᓇᓱᒐᖅ ᓄᐃᑦᓯᓂᖃᓲᖅ ᐱᓇᓱᐊᖃᑎᒌᓚᖓᔪᓂᒃ ᓄᓇᓕᓯᓐᓂ ᐱᓇᓱᐊᓚᖓᓗᑎᒃ ᑲᔪᓯᑎᑦᓯᓗᑎᒃ ᐱᓇᓱᒐᕐᒥᒃ. ᐱᓚᕿᓯᒪᔭᕗᑦ ᖃᒻᒥᐅᓂᕐᐹᖅ ᓴᓇᔭᐅᓂᖓ ᓄᑖᑉ ᐸᓯᖃᐅᑎᐅᑉ ᐃᓄᑦᔪᐊᒥ ᑯᐊᐸᒃᑯᑦ ᓴᓂᐊᓃᑦᑐᖅ.

ᐃᓚᐅᑎᓪᓗᒋᑦ ᐱᓇᓱᒐᑦᓴᓯᐅᕈᑦᔨᓂᕐᓄᑦ ᐊᒻᒪᓗ ᐃᓕᓐᓂᐊᑎᑦᓯᓂᕐᓄᑦ ᑭᒡᒐᑐᕐᓂᓄᑦ, ᓴᓇᔩᑦ ᐱᓇᓱᒐᖅ ᐊᑐᐃᓐᓇᐅᕗᖅ ᐃᑲᔪᕈᓐᓇᓱᓂ ᓴᓇᔨᓂᒃ ᐱᓇᓱᑦᑎᓂᒃ ᐊᐅᓚᑦᓯᓂᖏᑎᒍᑦ ᓴᓇᓂᕐᓄᐊᖓᔪᓂᒃ ᓯᑯᑦᓴᔭᓂᒃ. ᑖᑦᓱᒧᖓ ᓯᑯᑦᓴᔭᓕᕆᓂᕐᒧᑦ ᐃᓚᐅᒋᔭᐅᓪᓚᕆᑦᑎᓗᒋᑦ ᐱᓯᒪᔪᑦ Commission de la construction du Québec (CCQ)-ᒥᑦ ᐱᑦᔪᑎᒋᑦᓱᒋᑦ ᐃᑦᑑᓂᐅᑎᑖᕐᑕᐅᑎᑦᓭᑦ ᑮᓇᐅᔦᑦ, ᐃᓅᓯᕐᒨᓕᖓᔪᑦ ᐃᒻᒪᖃᐅᑏᑦ, MÉDIC Construction (ᓇᒻᒥᓂᕆᔭᐅᔪᑦ ᐃᒻᒪᖃᐅᑎᖃᕐᑎᓯᓂᕐᓄᑦ ᐸᕐᓀᓯᒪᐅᑏᑦ), ᐅᓯᖏᓪᓗ.

ᑭᖑᓂᖓᒍᑦ ᑲᒪᒋᔭᐅᓂᖏᑦ CCQ-ᑯᓄᑦ ᓇᓗᓀᕐᑕᐅᓯᒪᓃᑦ ᐃᑲᐅᕐᓂᓄᑦ ᐊᒻᒪᓗ ᐱᓯᑎᐅᒍᑎᒋᒋᐊᓕᖏᑦ, ᐊᒻᒪᓗ ᐱᓇᓱᐊᕐᑕᐅᔪᓂᒃ ᑐᓴᕐᑎᑕᐅᓂᖏᑦ (ᐆᑦᑑᑎᒃ ᑭᖑᓂᖓᒍᑦ ᐱᔭᖃᕆᐊᕐᓃᑦ ᐊᓂᒍᐃᓯᒪᓂᕐᓄᑦ ᐱᓇᓱᐊᕆᐅᕐᓴᓯᒪᓂᕐᓂᒃ ᐃᓕᓴᕐᓂᓂᒃ) ᐃᓚᐅᔪᑦ ᐊᒥᓱᓄᑦ ᐊᓯᖏᓐᓄᑦ ᑭᒡᒐᑐᕈᑎᓄᑦ ᐊᑐᐃᓐᓇᐅᑎᑕᐅᔪᓄᑦ ᓴᓇᔩᑦ ᐱᓇᓱᒐᕐᒧᑦ.

 

ᐅᓪᓗᒥ ᐅᕙᑦᑎᓄᑦ ᐅᖄᓚᖓᕗᓯ ᐱᓇᓱᒐᕐᑎᓂᒃ ᑐᓴᕆᐊᑦᓯᐊᓗᓯ!

1-877-964-2961

Facebook: @Sanajiitproject

facebook