ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᐊᑦᑕᓇᖕᖏᑐᑦᓯᐊᒥᒃ ᐊᓕᐊᒋᓗᒍ ᐃᒪᖅ!

 ᑰᑦᔪᐊᖅ, ᔪᓓ 5, 2017 - ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒥᒃ ᐱᒍᑦᔨᕕᖓ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᐱᒋᐊᖕᖓᐅᑎᖃᓯᒋᕗᖅ ᑕᒡᒐᓂ ᐅᐱᕐᖔᖑᓚᖓᔪᒥᒃ ᖃᐅᔨᓵᕆᖃᑦᑕᖏᓐᓇᓂᕐᒥᒃ ᖁᕝᕙᕆᐊᒋᖏᓐᓇᖃᑦᑕᓂᒃᑯᑦ ᐅᒥᐊᕐᑐᓂᕐᒥᒃ ᐊᑦᑕᓇᕐᑐᒦᑦᑌᓕᒋᐊᖃᕐᓂᐅᑉ ᒥᑦᓵᓄᑦ. ᐊᑦᔨᒌᖕᖏᑐᑦ ᐱᒋᐊᕐᑎᓯᒍᑎᑦᓭᑦ ᐸᕐᓇᑕᐅᓯᒪᖕᖑᓱᑦᑐᑦ ᖃᐅᔨᓵᕆᓂᕐᒧᑦ ᐊᒻᒪᓗ ᖁᕝᕙᒋᐊᕆᓂᕐᒧᑦ ᐊᑦᑕᓇᖕᖏᑐᒥᒃ ᐱᐅᓯᖃᕆᐊᖃᕐᓂᒥᒃ ᐃᒫᓃᑦᑐᖃᓕᕈᓂ ᓯᓈᓃᑦᑐᖃᓕᕈᓂᓗ. ᑐᓵᒐᓱᐊᖃᑦᑕᓗᑎᑦ ᓄᓇᓕᐅᑉ ᑐᓴᐅᑎᖓᓂᒃ ᐊᒻᒪᓗ ᓄᓇᓖᑦ ᑐᓴᐅᑎᖏᓐᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᐅᑉ ᒥᑦᓵᓄᑦ ᐅᖃᐅᓯᖃᕐᑐᓂᒃ ᐊᒻᒪᓗ ᐊᓯᖏᓐᓂᒃ ᑐᓴᕋᑦᓴᓂᒃ ᐊᑐᐃᓐᓇᐅᓯᐊᕆᐊᖃᕐᓂᒥᒃ ᐅᒥᐊᕐᑐᓂᕐᒧᑦ, ᐃᖃᓪᓕᐊᒋᐊᕐᓂᒧᑦ ᐊᒻᒪᓗ ᐳᐃᑦᔪᕋᕆᐊᕐᑐᓂᕐᒧᑦ.

 ᐱᔭᕆᐊᑐᖕᖏᑐᑦ ᐊᑦᑕᓀᑦᑐᒦᒐᓱᐊᕈᑏᑦ ᐃᓱᒪᒥᐅᑎᐅᒋᐊᓖᑦ ᐃᓕᑦᓯᓂᒃ ᐊᓐᓇᑎᑦᓯᒍᓐᓇᑐᑦ ᑐᓴᐅᒪᔭᐅᑦᓯᐊᕆᐊᖃᕐᐳᑦ:

ᐊᑐᕐᑕᐅᒋᐊᓖᑦ ᐳᑦᑕᐅᑏᑦ! ᑌᒣᑦᑐᐃᑦ ᐳᑦᑕᐅᑏᑦ ᐊᑐᕐᑕᐅᓗᑎᒃ ᐃᓄᒻᒥᒃ ᐃᒫᖕᖏᓚᖀᒍᓐᓇᓚᕆᑦᑐᑦ;

ᑐᓴᕐᑎᓯᓗᓯ ᐊᓯᓯᓐᓂᒃ ᓇᒧᖕᖓᓂᐊᕐᒪᖔᑦᓯ ᐅᒥᐊᕐᑐᓗᓯ ᖃᔭᕆᐊᕐᑐᓗᓯᓘᓐᓃᑦ (ᓇᒧᖕᖓᓂᐊᕐᒪᖔᑦᓯ, ᓱᓇᓂᒃ ᐊᑦᔭᓯᓂᐊᕐᒪᖔᑦᓯ) ᑐᓴᕐᑎᓯᒍᓐᓇᓯᑦᓴᕋᔭᕐᒪᑕ ᕿᓂᓚᖓᔪᑦ ᐊᖓᔪᕐᖄᖏᓐᓂᒃ ᓇᓂ ᕿᓂᕐᑕᐅᔪᑦᓴᐅᒪᖔᑦᓯ ᖃᐅᔨᒪᓂᕐᓴᐅᓕᕐᓗᑎᒃ, ᑎᑭᕝᕕᓴᓯ ᖄᖏᐅᑎᕋᑕᕐᑎᓗᒍ ᑎᑭᕋᑕᖕᖏᑯᑦᓯ.

ᐱᐅᒃᑯᑎᓂᒃ ᐅᓯᓗᓯ ᐆᑦᑑᑏᑦ ᐊᑦᓱᓈᒋᐊᓪᓓᑦ, ᐊᒻᒪᓗ ᑐᓴᕐᑕᐅᑎᒍᑎᑦᓭᑦ ᐅᖄᒍᑏᑦ ᐊᒻᒪᓗ ᓇᓃᒻᒪᖔᑦᓯ ᖃᐅᔨᒪᐅᑏᑦ.


ᓂᓪᓕᒪᔪᒧᑦ ᓇᒃᑲᕈᕕᑦ, ᐅᐃᒪᔮᕐᑌᓕᑦᓯᐊᓗᑎᑦ. ᐃᓱᒪᒋᓯᓗᒍ 1-10-1 ᒪᓕᒐᖅ:

1: ᓯᕿᓂᖁᑎᐅᑉ ᐃᑭᒡᕌᐱᖓᓂ ᓯᕗᓪᓕᐹᒥ ᐃᑉᐱᒍᓱᓚᖓᔪᑎᑦ ᓂᓪᓕᒪᔪᒨᕆᐊᑲᓪᓚᓂᕐᒥᒃ: ᑎᒦᑦ ᖁᐊᕐᓵᖓᓂᖓᓂ ᐊᓂᕐᑎᕆᓃᑦ ᓱᒐᓗᓗᐊᕐᑎᑌᓕᑦᓯᐊᓗᒍ;

10: 10 ᒥᓂᑦᔅ ᐊᓂᒍᕐᐸᑕ, ᐊᒡᒐᑎᑦ ᐊᒻᒪᓗ ᓂᐅᒃᑭᒃ ᐊᑐᕈᓐᓇᖏᕐᐸᓕᐊᓚᖓᔫᒃ: ᑕᕝᕙᓃᓐᓂᓃᕕᑦ ᐃᒻᒥᓂᒃ ᐃᓅᓕᒋᐊᕐᓗᑎᑦ;

1: ᐃᑲᐅᕐᓂᐅᑉ ᓴᓂᐊᓂ ᖃᐅᔨᒪᒍᓐᓇᖏᕋᔭᕐᑐᑎᑦ ᑎᒦᑦ ᖁᐊᕐᑎᓗᒍ.

 

“ᐳᑦᑕᖁᑎᒥᒃ ᐊᑐᕐᓂᖅ ᐊᒻᒪᓗ ᑐᑭᓯᒪᑦᓯᐊᓂᖅ 1-10-1 ᐱᖁᔭᖓᓂᒃ ᐃᑲᔪᕐᓯᒪᒍᓐᓇᑐᖅ ᐃᒫᓄᑦ ᓇᐅᒃᑭᐅᑎᑦᓴᓂᕈᕕᑦ”, ᑐᑭᓯᓇᕐᑎᓯᒋᐊᕐᑐᖅ ᑯᕇᒃ ᓕᖕᑲᐅᑦ, ᑐᑭᒧᐊᕐᑎᓯᔨ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒧᑦ ᐱᒍᑦᔨᕕᖓᓂᒃ. “ᐳᑦᑕᖁᑎᒥᒃ ᐊᑐᕈᕕᑦ ᐳᑦᑕᑎᑕᐅᒍᓐᓇᕕᖃᑦᓯᐊᑐᑎᑦ, ᐊᒻᒪᓗ ᐅᐃᒻᒪᓂᐅᔭᓚᕿᒍᓐᓀᓗᑎᑦ, ᐊᒻᒪᓗ ᖃᐅᔨᒪᒐᓱᐊᕐᓗᑎᑦ ᖃᓄᖅ ᐱᐅᓯᖃᕋᔭᕐᒪᖔᕐᐱᑦ ᐃᒫᓄᑦ ᓇᐅᒃᑭᐅᑎᑦᓴᓂᕈᕕᑦ, ᐃᓕᓐᓂᒃ ᐃᑲᔪᕐᓯᓯᒪᓚᖓᔪᖅ ᐊᐅᓚᑦᓯᒍᓐᓇᓂᕐᓂᒃ ᐊᓂᕐᑎᕆᓂᕐᓂᒃ ᓯᕗᓪᓕᐹᒋᒐᔭᕐᑕᖓᓂᒃ ᓇᐅᒃᑭᐅᑎᓂᕐᓂᒃ”.

ᐸᕐᓇᓯᒪᑦᓯᐊᓗᑎᑦ ᐊᒻᒪᓗ ᐊᓕᐊᒋᑦᓯᐊᓗᒍ ᐃᒪᖅ ᐊᑦᑕᓇᖕᖏᑐᒥᒃ!

-30-

ᖃᐅᔨᒋᐊᓗᒍ:
ᔫᓕᐊᓐ ᕕᐊᐅ-ᐱᑏᑦ
ᑐᓴᐅᒪᖃᑎᒌᑦᑐᓕᕆᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᓚᐅᑎᖓ. 819-964-2961, ext. 2388
| www.krg.ca  | www.krpf.ca

 

ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐃᓄᓕᒫᓄᑦ ᑎᒥᖁᑎᒋᔭᐅᕗᖅ ᓄᐃᑕᐅᔪᕕᓂᖅ 1978-ᖑᑎᓪᓗᒍ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᑎᒍᑦ. ᑎᒥᐅᔪᖅ ᐊᐅᓚᑦᓯᓂᖃᕐᑐᖅ ᐃᓘᓐᓇᑲᓴᑦᓯᐊᖓᓂᒃ ᑯᐯᒃ ᑕᕐᕋᖓᓂᒃ 55 ᖁᓛᖓᓂᒃ ᐊᐅᓚᑦᓯᓂᖃᕐᓱᓂ ᑲᕙᒫᐱᒃᑯᓕᕆᓂᕐᒥᒃ, ᐃᖏᕐᕋᐅᑎᓕᕆᓂᕐᒥᒃ, ᐊᕙᑎᓕᕆᓂᕐᒥᒃ, ᐳᓖᓯᓕᕆᓂᕐᒥᒃ, ᐱᓇᓱᒐᑦᓴᓕᕆᓂᕐᒥᒃ, ᐱᓇᓱᒐᕐᓂᒃ ᐱᒋᐅᕐᓭᓂᕐᒥᒃ, ᑮᓇᐅᑦᔭᓵᑎᒍᑦ ᐊᑦᑕᓇᕐᑐᒦᑦᑎᓯᑦᑌᓕᕐᓂᒥᒃ, ᐯᕆᑦᓯᕕᓕᕆᓂᕐᒥᒃ, ᓄᑕᐅᓯᓕᕈᓐᓇᑐᓕᕆᓂᕐᒥᒃ, ᓄᓇᐅᑉ ᐊᑐᕐᑕᐅᓂᖓᑕ ᐸᕐᓇᓯᒪᐅᑎᓕᕆᓂᕐᒥᒃ, ᓇᐅᓕᒫᓂᒃ ᐊᑦᑕᓇᕐᑐᒦᑦᑎᓯᑦᑌᓕᓂᕐᒥᒃ ᐊᒻᒪᓗ ᒪᑭᑕᒐᓱᐊᕐᓂᓕᕆᓂᕐᒥᒃ ᐱᕙᓪᓕᐊᑎᑦᓯᓂᕐᒥᒃ.