ᑲᑎᕕᒃ ᓄᓇᓕᓕᒫᑦ ᑲᕙᒪᖓ

ᑐᓴᕋᑦᓭᑦ: ᓄᑖᖅ ᑲᑎᕕᐅᑉ ᐳᓖᓯᖏᑦᑕ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᖓ

ᑰᑦᔪᐊᖅ, ᑯᐯᒃ. ᔫᓂ 8, 2017 – ᑲᑎᕕᐅᑉ ᐳᓖᓯᖏᑦ ᐅᓪᓗᒥ ᓄᐃᑦᓯᓚᖓᓕᕐᑐᑦ ᓄᑖᒥᒃ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᑦᑖᒥᓂᒃ, www.krpf.ca, ᓄᐃᑕᖃᑦᑕᓚᖓᔪᑦ ᐃᓄᑦᑎᑑᕐᑐᑦ, ᖃᓪᓗᓈᕐᑎᑑᕐᑐᑦ ᐊᒻᒪᓗ ᐅᐃᒍᐃᑎᑑᕐᑐᑦ. ᓄᑖᖅ ᓄᐃᑕᑎᑦᓯᕕᒃ ᐱᕙᓪᓖᒋᐊᕈᑕᐅᓚᖓᔪᖅ ᐊᑦᑕᓀᑦᑐᒦᒍᑎᑦᓴᓂᒃ ᓯᓚᑦᑐᓭᒍᑎᓂᒃ ᐊᑦᑕᓇᕐᑐᒦᑦᑎᓯᑦᑌᓕᒍᑎᓂᒃ, ᐊᒻᒪᓗ ᐃᓗᓕᖃᕐᓗᑎᒃ ᐊᓯᖏᓐᓂᒃ ᑐᓴᕋᑦᓴᓂᒃ ᑐᑭᓯᐅᑎᑦᓴᓂᓪᓗ ᐃᓕᖓᔪᓂᒃ ᑭᓇᑐᐃᓐᓇᑯᑦ ᓄᓇᕕᒻᒥ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ.

ᑲᑎᕕᐅᑉ ᐳᓖᓯᖏᓐᓄᑦ, ᓄᑖᖅ ᖃᕆᐅᔭᒃᑯᑦ ᑕᑯᑦᓴᐅᑎᑦᓯᕕᖓ ᑕᑯᑦᓴᐅᑎᑦᓯᒍᑎᒃ ᐱᕙᓪᓕᖁᑎᐅᓚᖓᔪᖅ ᓄᓇᓕᓐᓃᑐᓂᒃ ᑐᓴᐅᒪᐅᑎᖃᕐᓂᑎᒍᑦ ᐊᒻᒪᓗ ᓲᖑᓯᑎᕐᓗᒋᑦ ᐱᓇᓱᐊᖃᑎᒌᓐᓃᑦ ᓄᓇᓕᓕᒫᓂ ᐊᒻᒪᓗ ᓄᓇᓕᓐᓄᑦ ᑐᓴᐅᒪᔭᐅᓂᕐᓴᐅᓚᖓᓕᕐᓱᑎᒃ. ᓄᓇᕕᒻᒥᐅᓂᒃ ᒪᓂᔨᕕᐅᖃᑦᑕᓚᖓᒐᒥ ᑐᑭᓯᐅᑎᑦᓴᓂᒃ ᐅᓪᓗᑕᒫᑦ ᐱᓇᓱᐊᕐᑕᖏᓐᓄᑦ ᐊᒻᒪᓗ ᐃᖏᕐᕋᓂᖏᓐᓄᑦ ᓄᓇᓕᓕᒫᑦ ᐳᓖᓯᖏᑦᑕ, ᐃᓘᓐᓇᖏᑦ ᑕᒪᒃᑯᐊ ᐊᑕᐅᓯᕐᒦᑎᓪᓗᒋᑦ ᓇᓂᓕᒫᕈᓐᓀᓗᑎᒃ.

"ᕿᓚᓈᓕᕐᑐᒍᑦ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᖃᓯᒐᑦᑕ," ᓚᓚᐅᕐᑐᖅ ᒥᓯᐊᓪ ᒪᕐᑌ, ᑲᑎᕕᐅᑉ ᐳᓖᓯᖏᑦᑕ ᐊᖓᔪᕐᖄᖓ ᐊᒻᒪᓗ ᑲᒪᔨᒻᒪᕆᖓ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ ᐱᓇᓱᕝᕕᖓᑕ ᑲᑎᕕᒃ ᓄᓇᓕᓕᒫᑦ ᑲᕙᒪᐅᑉ (ᑫᐋᔩ). "ᐋᕐᕿᓱᕐᓯᒪᔭᐅᔪᖅ ᑭᓇᑐᐃᓐᓇᑯᑦ ᓇᓗᓇᕈᓐᓀᑎᓗᒍ ᐅᒃᑯᐃᕈᓐᓇᓂᐊᕐᑕᖓᓂᐅᒃ ᑕᑯᒐᓱᐊᕈᒪᔪᑦ ᐊᒻᒪᓗ ᐃᓘᓐᓇᑎᒃ ᑕᑯᒐᓱᐊᕐᑐᑦ ᑕᑯᖃᑦᑕᓚᖓᓕᕆᐊᖏᑦ ᐃᑲᔪᕐᓯᒍᓐᓇᑐᓂᒃ ᑐᑭᓯᐅᑎᑦᓴᓂᒃ. ᐱᖁᑎᑦᓯᐊᒪᕆᐅᓚᖓᔪᖅ ᐱᕙᓪᓖᓯᐊᕈᑕᐅᓗᓂ ᓄᐃᑕᑎᑦᓯᓯᐊᕐᓂᑎᓂᒃ ᐱᓇᓱᐊᓲᕗᓐᓂᒃ ᐊᒻᒪᓗ ᐃᖏᕐᕋᓂᕆᓲᕗᓐᓂᒃ."

ᓄᑖᖅ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᒃ ᐃᓕᒪᕕᐅᓚᖓᔪᖅ ᓇᓂᔨᐅᑏᑦ ᓇᓗᓀᒃᑯᑕᖏᓐᓄᑦ ᐊᑦᔨᒌᖕᖏᑐᓂ ᓄᓇᓕᓐᓂ ᑭᒡᒐᑐᕐᕕᓂᒃ, ᐆᑦᑑᑎᒋᓗᒋᑦ ᑲᑎᕕᐅᑉ ᐳᓖᓯᖏᑦᑕ ᐊᓪᓚᕕᖏᓐᓂᒃ, ᓄᓇᓕᓐᓂ ᖃᒥᑎᕆᔩᑦ ᐱᓇᓱᕝᕕᖏᓐᓂᒃ, ᐋᓐᓂᐊᓯᐅᑎᒃᑯᓂᒃ, ᐊᒻᒪᓗ ᐃᓅᓯᓕᕆᔨᒃᑯᓂᒃ ᐊᒻᒪᓗ ᐅᕕᒃᑫᑦ ᓴᐳᒻᒥᔨᖏᓐᓂᒃ. ᑲᑎᕕᐅᑉ ᐳᓖᓯᖏᑦ ᐸᕐᓀᒍᑎᖃᕐᓯᒪᒻᒥᔪᑦ ᖃᒻᒥᐅᓂᕐᐹᓂᒃ ᑐᓴᕐᑎᓯᖃᑦᑕᓚᖓᑦᓱᑎᒃ ᓱᓇᑐᐃᓐᓇᓄᑦ ᑲᒪᒋᔭᒥᓄᑦ, ᐃᑉᐱᒍᓱᓕᕐᑎᓯᒋᐊᕈᑎᓂᒃ ᐊᒻᒪᓗ ᐱᓇᓱᒐᖏᓐᓂᒃ ᑫᐋᔩᑉ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓄᑦ ᐱᓇᓱᕝᕕᖓᑕ ᐃᓕᖓᔪᓂᒃ ᐃᑯᐊᓪᓚᑎᑦᓯᑌᓕᓂᕐᓄᑦ, ᖁᑭᐅᓯᓕᔭᑦᓯᐊᕈᑎᓂᒃ ᐊᑦᑕᓇᕈᓐᓀᑎᓗᒋᑦ, ᐊᒻᒪᓗ ᐊᓯᐅᒪᔪᓂᒃ ᕿᓂᕐᓂᓂ ᐱᓇᓱᐊᕐᑕᐅᔪᓂᒃ.

ᐊᓯᒋᒻᒥᔭᖓ ᓄᑖᑉ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᐅᑉ ᐱᕙᓪᓖᒋᐊᕐᓂᖅ ᐱᓇᓱᒐᑦᓭᑦ ᓄᐃᑎᕐᑕᐅᓂᖏᓐᓂᒃ ᑕᑯᑦᓴᐅᑎᑦᓯᓂᕐᓂᒃ ᐳᓖᓯᐅᒍᒪᔪᓄᑦ. ᑕᑯᒐᓱᐊᕐᑐᑦ ᖃᐅᔨᓚᕿᖃᑦᑕᓂᐊᕐᒪᑕ ᐊᒥᓱᐃᓂᒃ ᐃᓱᐊᕐᑑᓂᖏᓐᓂᒃ ᐃᓚᒋᓕᐅᑎᒍᑎᒃ ᑲᑎᕕᐅᑉ ᐳᓖᓯᖏᓐᓄᑦ ᐊᒻᒪᓗ ᐱᑕᑦᓯᑐᕆᐊᓕᓐᓂᒃ ᓱᒐᓗᓗᐊᕈᓐᓀᑎᓪᓗᒋᑦ ᐱᔭᕆᐊᑭᑦᑑᓗᑎᒃ ᑕᑯᒐᑦᓴᖃᕐᑎᑕᐅᓗᑎᒃ. ᐊᓯᖏᑦ ᐊᑐᐃᓐᓇᐅᖃᑦᑕᓂᐊᕐᑐᑦ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᒻᒥ ᑐᓴᕐᑎᓯᒍᓰᑦ ᐱᖁᔦᑦ ᓯᖁᒥᑕᐅᑉᐸᑕ, ᐅᓐᓂᓗᒍᑎᖃᕐᓂᖅ ᐳᓖᓯᒥᒃ, ᐊᒻᒪᓗ ᐃᑲᔪᕐᑕᐅᒍᑎᑦᓴᖏᓐᓂᒃ ᐱᖁᔦᑦ ᓯᖁᒥᑦᓱᒋᑦ ᐱᓂᕐᓗᕕᐅᔪᓂᒃ.

ᓄᓇᕕᒻᒥ ᓄᑖᒍᓂᕐᐹᓂᒃ ᖃᐅᔨᒋᐊᕈᒪᔪᑦ ᐅᕝᕙᓘᓐᓃᑦ ᑐᑭᓯᒋᐊᓪᓚᕈᒪᔪᑦ ᓄᓇᓕᓐᓂ ᑭᒡᒐᑐᕈᑎᓂᒃ, ᐅᕗᖕᖓᕈᓐᓇᓕᕐᑐᑦ ᑲᑎᕕᐅᑉ ᐳᓖᓯᖏᑦᑕ ᖃᕆᑕᐅᔭᒃᑯᑦ ᑕᑯᑦᓴᐅᑎᑦᓯᕕᖓᓄᑦ ᐅᓪᓗᒥᑕᒐ!


–30–

ᐱᕕᐅᔪᖅ:
ᔮᓐ-ᕕᓕᑉ ᑐᐳᐊ                                                           ᔪᓕᐊᓐ ᕕᐅ-ᐱᑎᑦ
ᑐᓴᐅᒪᐅᑎᓕᕆᓂᕐᓂᒃ ᑲᔪᓯᑎᑦᓯᔨ                                        ᑐᓴᐅᒪᐅᑎᓕᕆᓂᕐᓂᒃ ᑲᒪᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ                                             ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᒍᑎᖓ 819-964-2961, ᐱᑐᑦᓯᒪᐅᑎᖓ 2219                 ᐅᖄᒍᑎᖓ 819-964-2961, ᐱᑐᑦᓯᒪᐅᑎᖓ 2388
                                                       

 

ᑲᑎᕕᐅᑉ ᓄᓇᓕᓕᒫᓂ ᐳᓖᓯᖏᑦ ᓄᐃᑕᐅᓯᒪᔪᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ 1996-ᒥ ᐃᑲᔪᕐᑕᐅᓱᑎᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑭᒡᒐᑐᕐᑎᒪᕆᒻᒧᑦ ᑳᓇᑕᒥ ᐊᒻᒪᓗ Ministère de la Sécurité publique du Québec (ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᕕᖓ). ᑲᑎᕕᐅᑉ ᐳᓖᓯᖏᑦ ᐳᓖᓯᓐᓂᐊᕕᓖᑦ ᐃᓘᓐᓀᓂ 14-ᓂ ᓄᓇᓕᓐᓂ. ᐱᒐᓱᐊᒐᖏᑦ ᑲᑎᕕᐅᑉ ᐳᓖᓯᖏᑦᑕ ᐊᒻᒪᓗ ᐃᓗᓐᓇᖏᑦᑕ ᑖᒃᑯᐊ ᐃᓚᖏᑦᑕ ᒪᓕᓪᓗᒍ ᐳᓖᓯᓐᓄᑦ ᐱᖁᔭᖅ ᓄᐃᑕᖏᓐᓇᑎᑦᓯᓂᖅ ᓄᓪᓚᖓᓐᓇᑐᒥᒃ, ᑐᑮᕈᓯᒪᖕᖏᓂᕐᒥᒃ ᐊᒻᒪᓗ ᑭᓇᓕᒫᒃᑯᑦ ᐊᑦᑕᓀᑦᑐᒦᑦᑎᑕᐅᓂᖏᓐᓂᒃ; ᐱᓂᕐᓗᑎᑦᓯᑌᓕᔨᐅᓗᑎᒃ ᐊᒻᒪᓗ ᓄᐃᑎᑦᓯᑌᓕᔨᐅᓗᑎᒃ ᐊᒻᒪᓗ ᐱᖁᔭᕐᓂᒃ ᓯᖁᒥᑕᐅᑎᑦᓯᑌᓕᔨᐅᓗᑎᒃ ᐱᖁᔭᐅᑉ ᐊᑖᒍᑦ ᐊᒻᒪᓗ ᓄᓇᓖᑦ ᐱᖁᔮᐱᖏᑦᑕ ᑲᑎᕕᐅᑉ ᓄᓇᖁᑎᖓᓂ; ᐊᒻᒪᓗ ᐱᖁᔭᕐᓂᒃ ᓯᖁᒥᑦᓯᔪᓂᒃ ᑎᒍᓯᔨᐅᓗᑎᒃ.